Yesu apaasha muntu muifuku dia Sabato

Bafadisee abaadi bashikue Yesu na kukimba kabingilo ka kumukuata. Abaadi abakula’shi tabadia kupasha muntu muifuku dia Sabato nya. Yesu bapetele muntu mpofu kuete kuteka ka pa lusa muishinda muifuku dia Sabato. Aye nkulungula batumiibua baaye’shi: ‘Talayi bukome bua Yehowa biabukiebe kupaasha uno muntu.’ Yesu batshile nsenga aye nkusoba na mata akupu, bashingile yawa muntu ku meso. Aye nkumulungula’shi: ‘Nda oketumpe mema mu meso muishiba dia Siloame.’ Yawa muntu bakitshine nka biabia, akupu, babangile kumona bua musango waye wa kumpala kasha bamutanda.

Bantu abaadi bakaanye bikata. Abo nkuakula’shi: ‘Uno nyi muntu ashalanga bua kuteka ka pa lusa su, mmuntu mumuifuane?’ Yawa muntu bambile’shi: ‘Naami yawa batandikilue mpofu!’ Bantu nkumuipusha’shi: ‘Buakinyi tokii dingi mpofu?’ Pabaadi muibalungule bibaadi bikitshikie, abamutuadile kui Bafadisee.

Yawa muntu balunguile Bafadisee’shi: ‘Yesu bandamika matekie ku meso ande, akupu bandungula bua nketumpa mema. Panebikitshi, nabanga kumona.’ Bafadisee nkuakula’shi: ‘Su Yesu mmukupaashe muifuku dia Sabato, bukome buaye tabufiki ku’Efile Mukulu nya.’ Kadi bangi abambile’shi: ‘Su bukome buaye tabufiki kui Efile Mukulu, tabaadia kuikala na ngobesha ya kupaasha nya.’

Bafadisee abaadi betamine nshaye na nyinaye bua kuibepusha’shi: ‘Buakinyi muana eenu kuete kumona binobino?’ Bamutande abapushishe moo muanda Bafadisee abakuile’shi muntu oso alesha lukumiino mui Yesu, abamusumbula paasha pa kitumbuilo. Abo nkuakula’shi: ‘Tatuuku’tue. Muipusheyi aye nabene.’ Bafadisee nkumuela nkonko ibungi na bibaadi muakule’shi: ‘Ne mupue kuinulondela bianka. Buakinyi nukianungiele nkonko?’ Bafadisee abafiitshile munda, abo kumusumbula paasha.

Yesu baadi muende akepeteena na yawa muntu aye nkumuipusha’shi: ‘We na lukumiino mui Mesiya su?’ Aye nkumualuula’shi: ‘Nadia kumuuka.’ Yesu nkumulungula’shi: ‘Nnami winyi Mesiya.’ Yesu baadi mumuleshe kalolo kakata. Muanda, tabaadi penda mumupashe nya, bamukuashishe dingi buadia kuikala na lukumiino.