Otentekiesha su?

We mubadikie kalolo Kitenta kia Mulami kia mueshi oso bua kino kipua su? Tompanga su we kualuula ino nkonko ayilondo:

“Kushintuluka pa kualuula binangu biobe akupushisha kinyi?” (Bena Loma 12:2)

Mu kuno kushintuluka ta mutekie penda kuikala na bikitshino bi buwa mu nshalelo etu nya. Amutekie kushintula mushindo watudi munda muetu, na mushindo wetu wa kunangushena bikale bipushene na mayi a Efile Mukulu a kulonda su kui mushindo.—w23.01, esak. 8-9.

Tui kulesha’shi tui na nkatshinkatshi nsaa yatutala mianda ikuete kukitshika pa nsenga naminyi?

Abitungu’shi tuipaane ku mushindo w’atumono mianda ikata ayikitshika mu nsenga, ayilombasha matemuki a mu Bible. Pa mutue pa kupalakasha mianda ya madimi ilombene kuluisha buumune bua kakongie, atukitshi kalolo su miisambo yetu yekala imeene nka mu mikanda ayitusha ndumbuluilo a Yehowa. (1 Ko. 1:10)—w23.02, esak. 16.

Lubatshisho lua Yesu na lua balongi baaye ngilekeene naminyi?

Yesu ta baadi na lukalo lua kuitshipa kui Yehowa nya, muanda baadi mutandikilue mu muilo ubaadi upue kuitshipa kui Efile Mukulu. Yesu ta baadi na lukalo lua kuilanga kuishimba bua miluisho sunga kuikala na kondo k’eshimba katooka nya, ku muanda baadi mupuidikie, na mmuntu shi na miluisho.w23.03, esak. 5.

Tui kukuasha bangi buabadia kutusha ngaluulo mu bisangilo naminyi?

Tui balombene kutungunuka na kutuusha ngaluulo yipi, p’atulekie nsaa bua’shi bangi batuushe namu ngaluulo. Tui balombene dingi kuleka kuisamba pabitale mianda ikata i bungi. Muanda mui ingi mianda ayitungu’shi olekiele bangi baluule.—w23.04, Esak. 23.

“Eshinda diselele” diabadi bateemune mu mukanda wa Yeeshaya 35:​8, adilesha kinyi?

Dino eshinda dia mu kinfuanyi dibaadi adilesha kilayi kia bena Yuda kibaadi akikatuka ku Babilone akiende ku nsenga yabo ya butandua. “Eshinda diselele” mu ano etu mafuku ndilumbuulue naminyi? Munda mua siekele ibungi ayituala ku kipua kia 1919, babaadi bapue kukita mudimo wa kulumbuula eshinda dia mu kikudi kalolo—Kutusha Bible na kumualula, mpa na bingi bintu. Muilo w’Efile Mukulu ngubangie kutambukila mu dino “eshinda diselele” Mpaladiiso a mu kikudi, adituala ku miabi ya Bufumu.—w23.05, esak. 15-19.

Mukanda wa Nkindji shapitre 9 awitupa malango kinyi pabitale bana bakashi babidi ba mu kinfuanyi?

Mukanda wa Nkindji awakula bua “Mukashi mulôtakane,” atumina bantu luitanyino lulombene kuibakunkusha ku “lufu” na “Binangu bia binyibinyi” biabetanyina bu muana mukashi, atumina bantu luitanyino aluibakunkusha ku “lushinguluilo” na ku muwa. (Nki. 9:​1, 6, 13, 18)—w23.06, esak. 22-24.

Kuiyisha ku’Efile Mukulu na nkatshinkatshi bibaadi bimuenekie pa baadi esamba na Lota naminyi?

Yehowa balunguile Lota muntu mululame, buadia kusuukila ku muengie. Anka Lota baadi mutekie bua’shi aye na kifuko kiaye, bebatadiile basuukile dia ku Zoare, Efile Mukulu baadi mutadiile’shi Lota ende ku Zoare.—w23.07, esak. 21.

Mukashi e kukita kinyi su amona mulume aaye abandila pornografi?

Leka kuitopeka obe nabene. Abitungu ekitshishe bua kutuula binangu biaye nka ku kipuano kiaye na Yehowa na kunangushena ku mianda ya bana bakashi ba mu Bible babaadi bapete mianda ayibakalakasha kadi babaadi banyingishibue. E kukuasha mulume aaye buadia kuleka ino mianda i masaku.—w23.08, esak. 14-17.

Su betolomona bua mianda yatudi bakumiine, kapatupatu ke kuitukuasha bua kuikala na kupopeela naminyi?

Tui kumona lualua lukonko sunga lualua lukalakashi bu aluitulongiesha bia kuuka abinangushena bangi bantu sunga kupasukila bi’abapusha. Tui na bintu bilombane bua kuakula na kupopeela, mu mushindo wi buwa.—w23.09, esak. 17.

Mariya baadi mupete bukome bubaadi nabo lukalo naminyi, na abitulongiesha kinyi?

Mariya pa baukile’shi ekala nyinaye na Mesiya, baadi munyingishibue na bangi. Muikeyilu Gabriele na Elizabete babaadi banyingishe Mariya. N’atue namu tui kupeta kunyingishibua akufiki kui bena Nkidishitu netu.—w23.10, esak. 15.

Yehowa e kualuula ku nteko yetu mushindo kinyi?

Yehowa etulaa’shi ateemesha nteko yetu, na dingi Yehowa e na mpango yadi nayo mu binangu muaye nsaa y’ateemesha nteko yetu. (Yel. 29:12) Yehowa e kualuula nka lualua luteko lumune mu mishindo ilekeene, Anka ekala etukuasha nka misuusa yoso.—w23.11, esak. 21-22.

Mukanda wa Bena Loma 5:2 nguteemune “lukulupilo,” biabia buakinyi mbewakuile dingi mu verse 4?

Nsaa ayipusha muntu mukandu wibuwa, mmulombene kupeta lukulupilo lua kusangeela muwa mu Mpaladiiso pa nsenga. Anka pa baadi apete mpombo, baadi eyinyingiila, na kupusha’shi Efile Mukulu mu mukumiine, lukulupilo luaye alunyiisha kunyinga na aluikala lua binyibinyi kuadi.—w23.12, esak. 12-13.