Ngikashi ibuwa

NGIKASHI IBUWA NKINYI?

Muntu e na ngikashi ibuwa aukaa kuilekeena kui pankatshi pa kibuwa na kibubi. Bua kushinguula kibuwa na kibubi t’abalondaa bi mu mashimba aabo nya. Abalondaa miiya i kuanka bua kuibakunkusha, sunga nsaa yabash’abebamono kui bantu.

BUAKINYI NGIKASHI IBUWA I NA MUULO?

Bana abapushaa mianda ibungi pabitale kibuwa na kibubi kui bantu babemonenaa nabo ku kalasa, mu mizike yabateemesha sunga mu ma filme abatala na bingi bintu biabalesha ku TV. Ino mianda ngilombene kuibakutshishua mushindo wa kutundula kibuwa na kibubi.

Bana bebungi be mu bipua ekumi abekalaa na luno lukalakashi. Pabitale kino kipungo, mukanda wa (Beyond the Big Talk) awamba’shi: “Ba nsongua abitungu baukie’shi bantu bebungi abebatakula buabadia kuikala na ngikashi kampanda, buabadia kuenda nkumo na’shi bebakumiine. Abitungu baukie bia kusangula ngikashi yabadia kuikala nayo sunga mianda yabadia kukita, sunga biekala’shi tabisankisha ba kuuku baabo. ” Abitungu’shi baledi balongieshe bana baabo ngikashi ibuwa kumpala kua’shi bafikie ba nsongua.

MUSHINDO WA KULONGIESHA NGIKASHI IBUWA

Ebalongieshe kibuwa na kibubi.

ELANGO DIA MU BIBLE: “Bantu bakulu . . . be na binangu biwubile bwa kushingula kii buwa na kii bubi.”​—Bena-Ebelu 5:14.

• Akula bishima abibakuasha buabadia kuuka kibuwa na kibubi. Ata kileshesho kia mianda ayikitshikaa kuifuku n’efuku na webaleshe patooka’shi: “Bino mbilulame; bino ta mbilulame nya.” “Bino bibuwa; bino tabibuwa nya.” “Kano nkalolo; kano ta nkalolo nya.” Mu kuenda kua mafuku muana oobe akashinguula kuilekeena kui pankatshi pa kibuwa na kibubi.

• Patuula buakinyi muanda kampanda wibuwa na ungi namu ta wibuwa. Bu kileshesho we kuipusha’shi: Buakinyi bibuwa kuikala na kululama? Madimi ngalombene kuluisha bu kuuku naminyi? Buakinyi kuiba kuibubi? Kukuasha bana boobe bua’shi bekale abanangushena kalolo, akuibapa mushindo wa kupeta ngobesha ya kushinguula kibuwa na kibubi.

• Lesha miabi ayituukila mu kuikala na ngikashi ibuwa. We mulombene kumulungula’shi: “Su we na kululama, bantu abakukulupila” sunga’shi “su we na kalolo, bantu abafulu kuikala pepi noobe.”

Etatshishe bua’shi bena kifuko boso bekale na ngikashi ibuwa.

ELANGO DIA MU BIBLE: “Etaluuleyi anwe baanabeene.”​—2 Bena-Kodinda 13:5.

• Abitungu’shi bena kifuko boso bekale na ngikashi ibuwa bua’shi omone bia kuamba’shi:

  • “Mu kifuko kietu t’atudimbaa nya.”

  • “Tatuluiyaa sunga kuikakeena na bantu.”

  • “Tatuakulaa bangi bishima bibubi sunga kuibakaa nya.”

Muana oobe amono’shi kuikala na ngikashi ibuwa takui bukopo nya kadi akulamaa nkumo ibuwa ya kifuko.

• Ikala olungula muana ngikashi ibuwa ya kifuko. Mulongieshe kukidila ku mianda y’omono kuifuku n’efuku. We kumulesha kuilekeena kui pankatshi pa ngikashi ibuwa ya kifuko na ngikashi yabalesha ku TV sunga yamonaa ku kalasa. Omuipushe’shi: “Bodia kukita kinyi?” “Kifuko kietu kibadia kukita kinyi bua kupudisha uno muanda.

Nyingisha kitshibilo kiabo kia kukita bibuwa.

ELANGO DIA MU BIBLE: ‘Ikalayi nka na nkondo k’eshimba kebuwa’​—1 Mpiele 3:16.

• Ebatumbule nsaa y’abakitshi bibuwa. Su muana bakitshi kintu kibuwa, mutumbule na omuleshe buakinyi kibuwa. Bu kileshesho, we kumulungula’shi: “Bokitshi muanda wa kululama. Bonsankisha ngofu.” Su muana bakulungula’shi nkitanga kintu kibubi, mutumbule muanda ta mmudimbe, kunyima omupe elango.

• Langa muana su baluisha. Kuasha muana oobe bua’shi ekale akumiina bilubilo biaye. Abitungu bana beukie bilubilo biabo, na kuilekeena kuabio na ngikashi ibuwa ya kifuko. Bangi ba nambutuile abapelaa kulungula bana baabo’shi “abaluisha.” Anka, kulungula muana’shi bakitshi bibubi akumukuasha buadia kulongiesha kondo kaaye k’eshimba buakadia kuuka kibuwa na kibubi.