Mwanda wa 17

Mpasa ibaadi ilekeene

BANO bana balume babidi mbelekeene, ta mbyobyo su? Ouku mashina aabo su? Uno mpibwe nyi Esau na uno kwete kulama mikooko nyi Yaakobo.

Esau na Yaakobo abaadi mpasa ibatandile Isaake na Rebeka. Isaake nshaabo, baadi mufule Esau ngofu, mwanda baadi mpibwe ebuwa na baadi atwadila kifuko mwita wa kudya. Kadi Rebeka baadi mufule Yaakobo ngofu, mwanda baadi nsongwalume mutaale, shi na mwanda na muntu.

Abrahame, nshaabo kulu baadi kii na muwa na twibalombeene kumona mushindo ubaadi Yaakobo na muloo wakumupusha esamba pabitale Yehowa. Abrahame bafwile na bipwa 175, pabaadi ba mpasa na bipwa 15.

Pabaadi Esau na bipwa 40 bayibakiile bakashi babidi ba beena Kanaana. Bino bibaadi binyongoshe Isaake na Rebeka ngofu, mwanda bano bakashi tababaadi abalangwila Yehowa nya.

Akupu, dingi efuku kubakitshikile kintu kibaadi kitakuule Esau mu kukwatshila mukwabo Yaakobo nsungu ikile. Nsaa ibalombeene yashi Isaake abikiishe mwana mbedi mwabi. Bu bibaadi Esau mukulu a Yaakobo, Esau baadi akulupila kupeta wawa mwabi. Kadi mafuku ashaale baadi mupane matalwa aaye a bu mwana mbedi kwi Yaakobo. Dingi, nsaa ibatandile bana balume babidi Efile Mukulu baadi mwambe shi Yaakobo akapete mwabi. Bino nyi bibakitshikile. Isaake baabikiishe Yaakobo mwana aye mulume mwabi.

Kunyima, nsaa ibapushishe Isaake byabya, bakwatshiile Yaakobo nsungu. Baadi mufite munda aye nkwamba shi akyebe kwipaa Yaakobo. Nsaa ibapushishe Rebeka wawa mwanda, benyongwele bikata. Aye nkulungula mulume aye Isaake shi: ‘Kushaala atala akunfundulush’eshimba su Yaakobo ekwibakila umune a ku bano bansongwakashi ba mu Kanaana.’

Paapa Isaake bayitamine Yaakobo amulungula shi: ‘Twebakilanga nsongwakashi a mu Kanaana. Enda mu kipya kya Harane ku nshibo ya Betwele nshe-nyinoobe. Ata kwakwa bu mukashi umune aku bansongwakashi ba Labane mukwabo na nyinoobe.’

Yaakobo bapushishe bibakwile nshaaye, na aye nkubanga lwendo lwa ku Harane kubaadi kushale kifuko kyabo.

Kibangilo 25:5-11, 20-34; 26:34, 35; 27:1-46; 28:1-5; Beena-Ebreeyi 12:16, 17.