Mwanda wa 18
Yaakobo bende ku Harane
OUKU bano bantu abesamba na Yaakobo su? Kunyima kwa kutambuka munda mwa mafuku ebungi, Yaakobo bafumankana nabo pa bwina. Bakwete kulama mikooko yaabo. Yaakobo bebepwishe shi: ‘Nwi ba kunyi?’
Abalulwile shi: ‘Twi ba ku Harane.’
Yaakobo bebepwishe shi: ‘Anuuku Labane?’
Abalulwile shi: ‘Atumuuku. Tala mwana aaye mukashi Rashele afiki na mikooko.’ Okwete kumona Rashele kwete kufika kubula su?
Yaakobo nsaa ibamwene Rashele na mikooko ya masaba aaye Labane, bayile aye nkubuula ebwe ku bwina bwashi mikooko itome mema. Akupu Yaakobo bakamiine Rashele kiipa na aye nkwilubula kwadi. Rashele baadi na muloo, aye nkwenda ku nshibo mu kulungula nshaye Labane.
Labane baadi na muloo wa kushala na Yaakobo. Nsaa ibatekyele Yaakobo bwashi ayibakile Rashele, Labane baadi musangale. Byabya, batekyele Yaakobo bwashi afube mwifuba dyaye bipwa musambobidi bwa kwibakila Rashele. Yaakobo baadi mukite bino mwanda baadi mufule Rashele ngofu. Kadi pabalombeene nsaa ya kwibakila Rashele, ouku kibakitshikile su?
Labane bapeele Yaakobo Lea mwana aaye mukashi a kumpala pamutwe pa kumupa Rashele. Pabakuminyine Yaakobo bwa kutumika bingi bipwa musambobidi, Labane bamupele Rashele bu mukashi aaye. Mu aa mafuku, Efile Mukulu baadi mulekyele balume bwashi bebakile bakashi bebungi. Kadi bwa ano mafuku, nka bu abilesha Bible, abitungu shi mulume ekale nka penda na mukashi umune.