Mwanda wa 46
Bimano bya Yeeriko
KINYI kikwete kuponesha bino bimano bya Yeeriko? Abimweka nka bu bikupilwe na ma bombe. Kadi mu aa mafuku takubaadi ma bombe sunga ma mputu nya. Uno nyi ngungi mwanda wa kukanya ubakitshine Yehowa! Tubande kutala mushindo ubabikitshikile.
Pusha bibaadi Yehowa mulungule Yooshwa: ‘Obe na balume ba ngoshi boobe nwifunye lupata. Nwilwifunye mususa umune kwifuku munda mwa mafuku asamombo. Nusemune musheete wa kilombeno. Ba tshiite-mwakwidi musambobidi baate nsengwa na batambukye kumpala kwa musheete belanga mpungi.
‘Mwifuku dya musambobidi anwifunyu lupata misusa musambobidi. Akupu nwele mpungi ibukopo na nsengwa, na bantu booso beele eunga dikata dya ngoshi. Bimano bya lupata abipono nka paapa!’
Yooshwa na mwilo nkulonda bibebalungwile Yehowa. Pabakwete kutambuka, abaadi baumine, muntu su ngumune ta mwakule. Nkapenda tuleo twa nsengwa na mikitshi ya bantu nyi ibaadi ayipushika. Abimweneka shi, mu Yeeriko, beshikwanyi ba mwilo ya Yehowa bakwete kutshiina. Okwete kumona mooshi umonga upudikye kwididishi su? Dyadya edidishi ndyanyi? Oolo namono, Rakabe mukite bibabamulungwile kwi ba mpuupa. Bakwabo booso ba mu kifuko be naaye mwanka bakwete kutala.
Ku nfudiilo, mwifuku dya musambobidi, kunyima kwa kwifunya lupata misusa musambobidi, mpungi ya nsengwa ibadidile, balume beena ngoshi abelele eunga dikata, na bimano bibaponene. Ndjo Yooshwa kwamba shi: ‘Ipayi muntu ooso e mu lupata na nwilushiikye kaalo. Nushiikye bintu byooso. Nulame penda kyamo ky’ebakanyi, oòlò, bintu bya munyinga usangwe na bya bilonda, nwibilambule kwi Yehowa na byende mu nshibo yaye.’
Yooshwa balungwile bantu babidi abaadi bakabekyel’eumbo shi: ‘Twelayi mu nshibo ya Rakabe, numutuushe aye na bakwabo ba mu kifuko.’ Rakabe na bakwabo abapandile nka bibamulayile ba mpuupa.