Mwanda wa 50
Bakashi babidi bashi na moo
NSAA ibaadi beena Isaleele mu malwa, abadidile kwi Yehowa. Yehowa bebalulwile aye nkwibapa bakunkushi basha mashimba akome bwa kwibakwasha. Mu Bible abetamina bano bantu bu bansushi. Yooshwa baadi nsushi a kumpala na bangi bansushi abaadi kunyima kwaye kubaadi Otenyele, Ehude na Shamgare. Kadi ku bantu abaadi bakwashe beena Isaleele kubaadi bakashi babidi abetaminwa bu Debora na Yaele.
Debora nyi mutemuki-mukashi. Yehowa baadi amulungula myanda ayikyebe kufika mu mafuku e kumpala na aye namu baadi alungula mwilo myanda ibaadi ayakula Yehowa. Debora baadi dingi nsushi. Baadi ashaala muushi mw’ebo ku mwengye, bantu abaadi abafiki mu kumulubwila myanda yaabo bwashi ebasambishe.
Mu aa mafuku Yabine baadi nfumu a mu Kanaana. Baadi na matempu a ngoshi 900. Basalayi baaye babaadi bakile bukome nyi bwakinyi abaadi bakwate beena Isaleele bebungi bwashi bekale bafubi ba Yabine. Mukata a basalayi ba Nfumu Yabine eshina dyaaye nyi Sisera.
Dingi efuku, Debora batumine bantu bwashi bakakimbe Nsushi Barake, aye nkumulungula shi: ‘Yehowa bakula shi: “Ata bantu 10 000 na okamine nabo ku Ngulu a Tabore. Naakakila Sisera koodi. Anka namutuulu na bisaka byaaye bya ngoshi mu maasa oobe.”’
Barake balungwile Debora shi: ‘Nende su wende nami.’ Debora bayile naaye kadi balungwile Barake shi: ‘Anka twekala na nkumo, mwanda nyi mu maasa a muntu mukashi mwabakatuulu Sisera kwi Yehowa mu maasa oobe.’ Nyi bibakitshikile.
Barake bayiile mukufumanaka na basalayi ba Sisera ku Ngulu a Tabore. Mususa umune Yehowa banokyeshe mpeshi mukata na basalayi baaye bebungi abafwile mu mema. Kadi Sisera batukile mu etempu dyaaye aye nkusuuka.
Mu kapindji kapeela Sisera bafikile mu nshibo ya Yaele. Aye nkumutwesha mwanka na amupa mabeele a kutoma. Bino bibamupele tulo na tabaadi muyishe na kulala nya. Akupu Yaele batshile kabayi ka ku nshibo yaaye aye nkutubula mutwe wa uno muntu ebubi. Kunyima pabafikile Barake, bamulesheshe kitanda kya Sisera! Byabya abilesha shi Debora ekalanga mwakule bya binyibinyi.
Kunyima abayipayile na Nfumu Yabine na beena Isaleele ababangile kupeta kufukama munda mwa mafuku.
Bansushi 2:14-22; 4:1-24; 5:1-31.