Mwanda wa 73
Nfumu ebuwa a nfudiilo mu Isaleele
YOSYASE baadi penda na bipwa mwanda pabafikile nfumu a bisamba bibidi bya Isaleele a kuushi. Batshile bufumu kii mukinga ngofu. Nyi bwakinyi ku mbangilo bantu bakulu abaadi abamukwasha bwa kukunkusha mwilo.
Kunyima kwa bipwa musambobidi Yosyase babangile kukiimba Yehowa. Balondele kilesheesho kya banfumu bebuwa bu Daavide, Yehoshafate na Ezekyase. Akupu, pabaadi ki nsongwalume, Yosyase bakitshine mwanda wa kukanya.
Munda mwa bipwa bibungi beena Isaleele abaadi abakitshi myanda ibubi. Abaadi abalangwile b’efile ba madimi. Abaadi abakunamina ma nkishi. Ndjo Yosyase nkwenda na bantu baaye abo nkubanga kukasha bintu byooso bya b’efile ba madimi mwiumbo. Uno ubaadi mufubo ukata mwanda bantu bebungi abaadi abalangwila b’efile ba madimi. We mukumbeene kumona Yosyase na bantu baaye bakwete kushinda ma nkishi.
Kunyima, Yosyase batudile bantu basatu bwa kukunkusha mudimo wa kulumbuula ntempelo. Makuta aafiki kwi mwilo abaadi akongolwe na babeapanga bano bantu basatu bwa kufuta baba abaadi abakitshi mudimo. Pababadi abatumika mu ntempelo, Hilkiyau tshiite-mwakwidi mukata e panundu bamwene kintu kimune ki na muulo ukata. Ubaadi mukanda wa kumpala wa kala wa miiya ubafundile Moyiise bu bibamulungwile Yehowa. Ubaadi ushimine munda mwa bipwa bibungi.
Abatwadiile Yosyase mukanda, aye nkuteka bwashi bamubadikile wanka. Pabaadi kwete kuteemesha, Yosyase bamwene shi mwilo taubaadi ulame miiya ya Yehowa nya. Benyongwele ngofu pabitale wawa mwanda, aye nkusaana bilamba byaaye, bu byomono mu kino kifwatulo. Bambile shi: ‘Yehowa mwitukwatshile nsungu ikata, mwanda bamashetu tambakokyele kufubila byooso bifundwe mu uno mukanda.’
Yosyase balungwile tshiite-mwakwidi mukata e panundu Hilkiyau bwashi akepushe Yehowa kyakyebe kwibakitshina. Hilkiyau bayile kwi Hulda, mutemuki mukashi, bwa kumwipusha. Yawa bamulungwile bibambile Yehowa shi: ‘Yeelusaleme na bemushale nakebanyoko mwanda mbalangwile b’efile ba madimi na kuusha eumbo na myanda ibubi. Kadi, pa mwanda obe’be Yosyase, bu bibokitshi wawa mwanda, tanyoko ino mbalo nya mpa na ku lufu loobe.’