Mwanda wa 87
Yesu e mu ntempelo
BANDA kutala kano ka nsongwalume kakwete kwisamba na bano bantu bakulu. Bano bantu mbalongyeshi ba mu ntempelo a Efile Mukulu mu Yeelusaleme. Na kano ka nsongwalume nyi Yesu. Bapu kukula ndambo. Binobino taadi na bipwa 12.
Balongyeshi bakwete kukema ngofu mwanda Yesu awuku myanda ibungi pabitale Efile Mukulu na pabitale myanda yabadi bafunde mu Bible. Kadi, bwakinyi Madiya na Yoosefe tabe pano? Mbende kunyi? Tubande kutala.
Ku kipwa kyooso Yoosefe batwalanga kifuko kyaaye ku Yeelusaleme ku feete mukata abetanyina bu a Lukilo. Lubaadi lwendo lula lwa kukatuka ku Nazareete na kwenda ku Yeelusame. Takwi muntu su ngumune baadi na mootoka, na takubaadi sunga train nya. Byabya bintu tabibaadi kwanka mu aa mafuku nya. Bantu bebungi babaadi abatambuka lwa ngwaa, na bibaadi abitungu kutambuka munda mwa mafuku asatu bwa nkafika ku Yeelusaleme.
Binobino, Yoosefe taadi na kifuko kikata. Kubaadi beena ba Yesu balume na bakashi babaadi abatungu kutala. Kino kipwa, Yoosefe na Madiya abaapu kukatuka na baana abende lwendo lula bwa kwaluka kwabo ku Nazareete. Bakwete kupwandikisha shi Yesu ena bangi bantu bakwete kwaluka pamune. Kadi nsaa ibabayimana ku kyolwa, tambamone Yesu nya. Babamukimbi munkatshi mwa bakwabo ba mu kifuko na beena’bo, kadi tambamumone nya! Ndjo babaluka ku Yeelusaleme mu nkamukimba.
Ku nfudiilo babasangana Yesu pano na balongyeshi. Kwete kwibateemesha na kwi beela nkonko. Bantu booso bakwete kukanya pabamono mushindo wi Yesu na binangu. Kadi Madiya bakula bino: ‘Mwan’ande, bwetukitshi byabya bwa kinyi? Ami na nshoobe atukukimbanga n’eshimba kwiyilu ngofu.’
Yesu balulwile shi: ‘Anunkimbanga bwakinyi? Tanwikalanga baukye shi neena kya kwikala kwa Nshaami su?’
Yesu baadi mufule kwikala pa mbalo yaadi mukumbeene kulonga myanda y’Efile Mukulu. Tatwi balombeene naamu kwikala na lwalwa lukalo su? Pabalukiila kwabo ku Nazareete, Yesu baadi mukumbeene kwenda mu bisangilo ku lubingo looso. Bu bibaadi ateemesha kalolo, nyi bwakinyi baadi mulongye myanda ya mu Bible ibungi. Twikaleyi bu Yesu, tulondeyi kileshesho kyaye.
Luuka 2:41-52; Mateo 13:53-56.