Mwanda wa 93

Yesu adiisha bisaka bya bantu

MWANDA wa kukanya ubakitshika. Abakatuka mu kwipa Yowano Mubatshishi. Herodyade, mukashi a nfumu, tekalanga mumukumiine nya. Baadi mukumbeene kutuma nfumu bwadya kutshiba mutwe wa Yowano.

Pabapushile Yesu shi abayipa Yowano, benyongwele ngofu. Bayile pa mbalo ya bupenka. Kadi bantu abamulondo. Pabamwene bisaka bya bantu, baadi mwinyongole. Byabya babangile kwibalongyesha pabitale bufumu bw’Efile Mukulu, na bapashishe basha mikumbo bebungi.

Kyakya kyolwa balongi baaye abafikile kwaadi bamba shi: ‘Twi mu kabaaka, na nguba mmupwe kukila; byaabya alusha bantu, bende mu mpata mu kwiudila bya kudya.’

Yesu balulwile shi: ‘Tabii buuwa benda nya; ebapeeyi anwe banabeene bya kudya.’ Pabeyalulwile kwi Fidipe, Yesu bamwipwishe shi: ‘Nkunyi kwatudy’a kuula mikate bwa’shi bano bantu booso bapete kya kudya?’

Fidipe balulwile shi: ‘Sunga twekala na nfwalanga nkama ibidi tangilombane bwa kuula mikate bwashi ooso muntu apete kapese kapela.’ Andree bambile shi: ‘Akwa kwi nsongwalume e na mikate ya orje itaano, na mishipa ipeela ibidi. Kadi byabya bii kinyi bwa bantu be bungi byaabya?’

Yesu bambile shi: ‘Ebashadikyeeyi.’ Akupu batumbwile Efile Mukulu bwa bidiibwa, na babangile kupinga bipindjibipindji. Paapa balongi baaye ababiile bantu booso mikate na mishipa. Kubaadi balume 5 000, na binunu bya bakashi na baana. Abadiile booso abo nkwikuta. Na pababakongwele bibashadile, balongi babaushishe biseele 12!

Binobino Yesu na balongi baaye abatwele mu bwato bwa kwenda dingi eshiya dya Mwela wa Ngadile. Munkatshy’a bufuku kubeleele kipapi kikata, na mbundambunda ya mema ibaadi ayikupila ku bwato. Balongi baaye abaadi na moo ukata. Paapa, mwamwa munkatshy’a bufuku, abamwene muntu kwete kutambuka kunundu kwa mema. Abelele misase na moo ooso, mwanda tababaadi abauku muntu kwete kufika nya.

Yesu nkwibalungula shi: ‘Nyingaayi mashimba, nnaami, tanwikalanga na moo.’ Tababadi abakumiina nya. Byabya Mpyeele bambile shi: ‘Mwanana, su nnoobe eyendo, ntumine eyi dya kufika koodi pa meema.’ Yesu balulwile shi: ‘Fika!’ Ndjo Mpyeele nkutambuka kunundu kwa mema! Akupu bapushishe moo aye nkubanga kukulukila mu mema, kadi Yesu bafikile mu kumupasha.

Kunyima, Yesu baadi dingi mudishe binunu bya bantu. Wawa musango baadi mwibadishe na mikate musambobidi na ndambo ya mishipa. Na dingi bantu babadile abo nkwikuta. Omono shi mushindo ubaadi Yesu akwasha bantu wibuuwa su? Pakekala bu nfumu mu Bufumu bw’Efile Mukulu tatukakutwa kintu su nkimune!

Mateo 14:1-32; 15:29-38; Yowano 6:1-21.