Mwanda wa 95
Mushindo ubaadi alongyesha
DINGI efuku Yesu balungwile mulume umune shi abitungu kufula muntu-naaye. Yawa muntu bamwipwishe shi: ‘A muntu-naami namu nnaanyi?’ Ky’eyendo, Yesu baadi auku kibaadi mu binangu bya yawa muntu. Yawa muntu baadi apwandikisha shi bantu-naaye nka baaba baadi nabo ekoba dimune sunga mu kipwilo kimune. Tubande kutala bibambile Yesu.
Ingi nsaa Yesu baadi atuusha bileshesho bwa kulongyesha. Ndjo bibakitshine wawa musango. Bamulondeele mwanda wa mwina Yuuda na mwina Samariya. Twi bapwe kumona shi beena Yuuda tababaadi bafule beena Samariya nya. Yesu baadi mumulondele uno mwanda:
Dingi efuku kubaadi mwina Yuuda umune baadi ende mwishinda dya ku Yeeriko. Kadi bangifi abaadi bamukwate. Babamunyengyele makuta aaye bamukupila pepi na kumwipa.
Kunyima, tshiite-mwakwidi mwina Yuuda bakidile mwishinda. Bamwene muntu ababadi bakupile. Opwandikisha shi bakitshine kinyi? Mwanda wa kukanya, bakidile ku bukunkula bw’eshinda aye nkwenda. Akupu ungi muntu mwin’Efile bakidile. Baadi mwina Leevi. Opwandikisha shi bayimene? Nya, ta mwimane bwa kukwasha yawa muntu ababadi bakupile nya. We mukumbeene kumona tshiite-mwakwidi na mwina Leevi ku bula mwishinda bakwete kwenda.
Kadi tala uno muntu e na uno abadi bakupile. Nyi mwina Samariya. Na dingi kwete kukwasha mwina Yuuda. Kwete kumwela bwanga ku malonda. Akupu, batwala mwina Yuuda ku mbalo yaadi mulombeene kwikisha na yabadya kumubuka.
Kunyima kwa kumulondela uno mwanda, Yesu bepwishe yawa muntu shi: ‘Ku bano bantu basatu, mu kwobe kumona, mwileeshe bu muntu-naye na yawa batapilwe kwi bantomboshi nnaanyi? Ntshiite-mwakwidi, mmwina-Leevi su nyi mmwina Samariya?’
Yawa muntu balulwile shi: ‘Nyi mmwina Samariya. Mwanda bakitshina yawa batapilwe kalolo.’
Yesu bamulungwile shi: ‘Nky’eyendo. Enda n’obe namu okite byabya.’
Osangeela mushindo ubaadi Yesu kwete kulongyesha su? Tomono shi twi balombeene kulonga myanda ibungi na ya muulo ukata su atuteemesha akyamba Yesu?