Mwanda wa 107
Abaasa Etshyene mabwe
UNO mulume mukuname nyi Etshyene. Nyi mulondji a Yesu a kishima. Kadi tala akimufwila! Bano bantu bakwete kumwasa mabwe. Bwakinyi mbashikwe Etshyene byabya bwa kukita kino kibeshi? Tubande kutala.
Efile Mukulu ekalanga mukwashe Etshyene bwashi akite bipaso. Bano bantu tabasangala na kino kintu nya, na ababanga kwela naaye mpaka mwanda kwete kulambukisha bantu bya binyibinyi. Kadi Efile Mukulu bapeele Etshyene binangu bibungi, na Etshyene baadi alesha shi bano bantu mbalambukishi ba myanda ya madimi. Bino bibebapeele dingi nsungu ikile. Babamukwatshile, abo nkwitamina bantu bwashi bamudimbiile myanda.
Tshiite-mwakwidi mukata e panundu bayipwishe Etshyene shi: ‘Bii byabya su?’ Etshyene pabebalulwile, bakitshine mwisambo wibuwa pabitale myanda i mu Bible. Ku nfudiilo kwa mwisambo, bebalungwile mushindo ubaadi bantu bebubi bashikwe batemuki ba Yehowa ba kala. Akupu aye nkwamba shi: ‘Anwe naamu nwi nka bu baba bantu. Nwi bayipe Yesu mufubi a Efile Mukulu, na tanwi balonde miiya y’Efile Mukulu nya.’
Bino bibafitshiishe bakata ba bipwilo munda ngofu! Abo nkubanga kudya meno. Paapa Etshyene nkwibwesha mpala mwiyilu, na aye nkwamba shi: ‘Ngiiwu’mi kwete kubandjila Yesu mwimane mwiyilu ku mboko ilume y’Efile Mukulu.’ Paapa, baba bantu babashikile matwi abo na babakwatshile Etshyene. Abo nkumutuusha paasha pa lupata.
Pano, babafuulu bikotshi byabo na babebipa nsongwalume abayitanyinaa bu Saule bwashi ebilame. Okwete kumona Saule? Kunyima kwa byabya, bababangile kwasa Etshyene mabwe. Etshyene bakunamine, bu byomono mu kifwatulo, aye kwela luteko kwi Efile Mukulu shi: ‘Yehowa twebalaminanga buno bubi.’ Baadi auku shi bangi ba kwabadi abaadi batakuulwe na bakata ba bipwilo. Akupu Etshyene bafwile.
Su muntu bakukitshi mwanda wibubi, okimbaa kumwalwisha, su otekaa bwashi Efile Mukulu amunyokye? Etshyene na Yesu tababaadi bakite byabya nya. Babaadi abakitshina kalolo mpa na bano babaadi bebakitshine bubi. Twitatshisheyi bwa kulonda kilesheesho kyabo.