Kalunga nyembo nkinyi?

MU BIBLE kubanga mu ndimi ibabamufundjile kumpala, abatumika na kishima kya mu kina Ebreeyi sheʼohlʹ na kya mu kina Greke haiʹdes misusa ikile pa 70. Bino bishima byooso abyakula pabitale lufu. Mu angi ma Bible mbebyaluule bu “mashaama,” bu “inferno,” sunga bu “bwina.” Byabya, mu ndimi ibungi takwi bishima abipatuula kalolo bino bishima bya mu kina Ebreeyi na kina Greke nya. Kadi bino bishima abipatuula kinyi? Tubande kutala mushindo wabadi batumikye nabyo mu angi ma Bible.

Mukanda wa Mulungudi 9:10 aulesha shi: “Takwi sunga mufubo sunga mulubu, sunga nkapatupatu sunga tudingi mu kalunga nyembo mwende.” Kino kishima Kalunga nyembo akilesha mbalo kampanda yabashikaa bafwe su? Nya. Bible nsaa yakula pabitale mbalo kampanda sunga mashama, atumikaa na kingi kishima kya mu kina Ebreeyi na kya mu kina Greke kushii kutumika na kishima sheʼohlʹ na haiʹdes. (Kibangilo 23:7-9; Mateo 28:1) Na dingi Bible tatumikaa na kishima sheʼohlʹ bwa kwakula pabitale mashama abashikaa bantu bebungi pamune sunga beena kifuko kimune nya.​—Kibangilo 49:30, 31.

Kadi binobino, “Kalunga nyembo” mbalo ya mushindo kinyi? Eyi dy’Efile Mukulu adilesha shi bishima “Kalunga nyembo,” sunga haiʹdes, abilesha mbalo ikata ikile mashama a bashikaa bantu bebungi. Bwa kuuka myanda ibungi, mukanda wa Yeeshaya 5:14 aulesha shi: ‘Kalunga nyembo akabuula mukanwa mufungukye bikata.’ Sunga Kalunga nyembo nkapwe kumina bantu bebungi bafwe, kaki nka na lukalo lwa bangi bebungi. (Myeele 30:15, 16) Bilekene na mashama kampanda mwabadi balombeene kwela penda ndambo ya bantu, ‘Kalunga nyembo takayikutaa nya.’ (Myeele 27:20) Kalunga nyembo takawuula. Takena nfudiilo. Sheʼohlʹ sunga haiʹdes (Kalunga nyembo) ta mbalo ino ayimweka na meso nya. Kadi nyi mbalo, ayilesha mashama a bantu bebungi, mbalo ya mu kileshesho ilale bantu bebungi mu lufu.

Bulambukishi bwa mu Bible pabitale kusanguka abwitukwasha bwa kupeta kiukilo kibungi pabitale akipatuula bishima sheʼohlʹ na haiʹdes (Kalunga nyembo). Bible pakwete kwakula pabitale Kalunga nyembo, alesha lufu lwa bantu abakyebe kusanguka.a (Yoobo 14:13; Bikitshino 2:31; Bifumbulwe 20:13) Eyi dy’Efile Mukulu adyamba dingi shi be mu Kalunga nyembo ta nka penda baaba abaadi bafubile Yehowa nya kadi mpa na baaba bashibaadi bamufubile. (Kibangilo 37:35; Misambo 55:15) Byabya Bible alongyesha shi: “Akwikala kusanguka kwa balulame na kwa bashii-balulame.”​—Bikitshino 24:15.

[Mwanda wi mushi mwesaki]