Efuku dya kiimu adilesha kinyi?

MUSHINDO kinyi omonaa Efuku dya kiimu? Bantu bebungi abapwandikisha shi bantu booso, midiyala na midiyala abakakidi ku lupuna-nsulu lw’Efile Mukulu. Kwakwa, abakasambisha muntu na muntu ooso. Bangi abakapete mwabi, wa kwenda mwiyilu, na bangi naamu abakende mbalo ya kukyengeshibwa. Byabya, Bible apatuula dino efuku mu ungi mushindo. Eyi dy’Efile Mukulu adilesha shi dyady’efuku, t’efuku dya kutshina nya, kadi nyi efuku dya lukulupilo na dya kulumbuula kwa myanda.

Mu Bifumbulwe 20:11, 12, Yowano mutumibwa alesha bino pabitale Efuku dya kiimu shi: ‘Naamwene lupuna-nsulu lukata lutooka na baadi mushikame panka: kumpala kwa lukyebo lwaye nsenga n’eyilu bibaasuukile kushii kuleka byashiino. Kuunyima naamwene bafwe, bakata na bapeela, bwimane kumpala kwa lupuna-nsulu babaabuulwile mikanda. Ungi mukanda ubaabuulwilwe: mmukanda wa muwa. Babaasambiishe bafwe muyiile bikitshino byaabo.’ Nsushi abaleesha pano nnanyi?

Yehowa Efile Mukulu ndjo Nsushi mukata. Byabya, apa ungi muntu mudimo wa kutshiba biimu. Muyiile Bikitshino 17:31, Kilombeno kipya 2009, Mpoolo mutumibwa bakwile shi Efile Mukulu “mmulumbuule efuku diakatshibila nsenga yoso yishaale bantu kiimu mu kululama, kwi muntu yawa aadi musangule.” Uno Nfumu abadi basangule nyi Yesu Kidishitu basaangukile. (Yowano 5:22) Kadi, nsaa kinyi ayibanga Efuku dya kiimu? Dyady’efuku dibula bwi naminyi?

Mukanda wa Bifumbulwe aulesha shi Efuku dya kiimu adibanga kunyima kwa Armagedone, nsaa yabakabutula Satana na ndumbulwilo aaye ebubi.a (Bifumbulwe 16:14, 16; 19:19–20:3) Kunyima kwa Armagedone, Satana na bademo baaye abakebeele mu lukanu mu bwina munda mwa binunu bya bipwa. Mu aa mafuku, bantu 144000 abakekala bansushi na abakamunana mu “bufumu pamune na Kidishitu munda mwa bipwa kinunu.” (Bifumbulwe 14:1-3; 20:1-4; Beena-Looma 8:17) Efuku dya kiimu ta mwanda kampanda aukyebe kukitshika bukidibukidi munda mwa nsaa 24 nya. Adikyebe kupwa bipwa kinunu.

Mu kyakya kipungo kya bipwa kinunu, Yesu Kidishitu akyebe “kuyimusha abatala na bafwe.” (2 Timotee 4:1) “Abatala” abakyebe kwikala “kibumbu kikata” akikapanda ku Armagedone. (Bifumbulwe 7:9-17) Yowano mutumibwa bamwene dingi “bafwe . . . bwimane kumpala kwa lupuna-nsulu” lwa kiimu. Nka bu bibalayile Yesu, ‘abapusha eyi dyaaye [Kidishitu] kwi booso balale mu nyembo, na . . . abakatuuku’ ku bukwashi lwa lusangukilo. (Yowano 5:28, 29; Bikitshino 24:15) Kadi abakebasambisha pa mwanda kinyi?

Muyiile abyamba kimonwa kya Yowano mutumibwa, “mukanda ubaadi ubulwibwe,” na “abasambiishe bafwe muyiile bikitshino byabo muyiile kibaadi kifunde mu mikanda.” Mu ino mikanda mwi myanda ibakitshine bantu kala su? Nya, kiimu takitala myanda ibakitshine bantu kumpala kwa kufwa nya. Mushindo kinyi watwibiuku? Bible amba shi: “Yaawa mufwe mmupandukye ku milwisho.” (Beena-Looma 6:7) Byabya twi balombeene kwamba shi, baaba abasanguka tabekala dingi na mwanda nya. Yaaya mikanda ayilesha miiya ayikyebe Efile Mukulu kwelela bantu. Bwa kupeta muwa wa looso, booso kubanga pa abakapanda mu Armagedone na bano abakasanguka abekala na kya kukokyela ku miiya y’Efile Mukulu, kukokyela dingi mpa na miiya ya Yehowa yakyebe nkatuusha mu bipwa kinunu. Byabya, bantu abasambishwa muyiile myanda yabakitshi nsaa y’Efuku dya kiimu.

Mwifuku dya kiimu bantu miliyare ibungi abakyebe kupeta mushindo wa kumpala wa kulonga myanda itale mpango y’Efile Mukulu na kukita myanda muyiile yaaya mpango. Bino abilesha shi akwikala mudimo ukata wa kulongyesha bantu. Kushii mpaka, “bantu booso abayiyi bya kufubila bululame.” (Yeeshaya 26:9) Anka, ta mbantu booso abakakumiina kukita akikyeb’Efile Mukulu nya. Yeeshaya 26:10 amba shi: “Anka su baafwila sha-bubi lusa, taashinguula bululame nya. Na mwiumbo dya balulame atungunuka’nka na kukita bubi, dingi taamono bi bukata bwa Yehowa.” Baaba bebubi abakebabutula bwa looso Mwifuku dya kiimu.​—Yeeshaya 65:20.

Ku nfudiilo a Efuku dya kiimu, baaba abakapanda, “abakalukiila ku muwa” bu bantu bapwidikye. (Bifumbulwe 20:5) Byabya Efuku dya kiimu adikafisha bantu ku nshalelo ebuwa abu bantu bapwidikye bu byabibaadi ku kibangilo. (1 Beena-Kodinto 15:24-28) Kunyima akukyebe kwikala kitompwanga kya nfudiilo. Satana akafungulwa mu lukano na abakamutadiila bwa kutompa kupambusha bantu bwa mususa wa nfudiilo. (Bifumbulwe 20:3, 7-10) Baaba abakapele kulonda Satana uno mwiya wa mu Bible awamba shi: “Balulame abapete eumbo [nsenga], abeemushaala looso,” aukyebe kwibalombeena. (Misambo 37:29) Binyibinyi, Efuku dya kiimu adikyebe kutwadila bantu basha bulamate miloo ibungi.

[Mwanda wi mushi mwesaki]