SHAPITRE 35
Mushindo kinyi wandya kwikala kuuku a Efile Mukulu?
Kunyima kwa kufumankana na mwanda ukata Jeremy bamwene muulo wa kwikala kuuku a Efile Mukulu. Apatuula shi: “Panandi na bipwa 12, nshetu bakatukile aleka kifuko kyetu, dingi efuku naadi nele nteko bufuku, nateka Yehowa bwashi alushe nshetu ku nshibo.”
Pabaadi mukalakashibwe, Jeremy babangile kubadika Bible. Pabafikile mu mukanda wa Misambo 10:14, bibabadikile bibaadi bimukume ngofu. Uno verse amba pabitale Yehowa shi: “Ee mu mpombo eelambula koodi, nnoobe mukwashi a mwan’a-nshiye.” Jeremy amba shi: “Napushile nka bu’shi Yehowa baadi esamba na’mi na kundungula shi aye mmukwashi ande; aye nyi Nshami. Nshami kinyi ungi mukile buwa andi mulombeene kwikala naaye kukila uno?
SUNGA wekala na mwanda bu wa Jeremy sunga byekala shi twe nao, Bible alesha shi Yehowa akumiina shi wekale kuuku aaye. Na dingi, Bible amba shi: “Efubwileeyi kwi Efile Mukulu byaabya aye naamu eefubwila peepi neenu.” (Shake 4:8) Ela binangu pabitale akipatuula ano mayi: Sunga byekala shi twe mulombeene kumumona—na ta nkuuku oobe bu bi benobe ba pano nya—Yehowa Efile akwitanyina bwa kwikala kuuku aaye!
Kadi kwikala kuuku a Efile Mukulu akutekye shi okite kintu kampanda. Twate kileshesho: Su okyebe kwikala na mutshi wa bilongo, ouku shi taukyebe kwikudila nya. Bwashi ukule kalolo, abitungu wewelele mema nsaa na nsaa na kwiutuula mbalo ibuwa. Bi mumune na bukuuku na Efile Mukuu. Nkinyi kikumbeene nkukwasha bwashi buno bukuuku boobe n’Efile Mukulu butame?
Muulo wa kwilongyela kwa Bible
Bwa kwikala bakuuku abitungu kwisambanga na kwitemeshenanga. Bi mumune na bukuuku n’Efile Mukulu. Kubadika na kulonga Bible nyi mmushindo wa kutemesha akitulungula Efile Mukulu.—Misambo 1:2, 3.
Eyendo, pangi kwilongyela takukambaa nkusankisha nya. Bansongwa bebungi abakumiina kutala TV, kwasha maasha, sunga penda kukisha nsaa na bakuuku. Kadi su okumiina kudia bukuuku n’Efile Mukulu, takwi kashinda ka mbwipi nya. Abitungu omutemeshe nsaa yolongo Eyi dyaaye.
Kadi, twekalashanga. Kulonga kwa Bible tabitungu kwikala bu bushito nya. Abitungu kukusankishe—sunga wekala omono bu’shi tobeshaa kulonga ngofu. Kintu kya kumpala akitungu kukita nyi nkutshiba nsaa ya kulonga Bible. Nsongwakashi atwitanyina bu Lais amba shi: “Ne na programe. Nabadikaa shapitre umune a Bible efuku dyooso ku nakashika, ami kyabuuku.” Maria, sha bipwa 15, e na kingi kyubishi. Amba shi: “Nabadikaa kipindji kya efuku dyooso kumpala kwa kulala.”
Bwa kubanga programe oobe a kubadika Bible, tala kashibo ke mwisaki dya 292. Akupu, mushi, funda nsaa yoodi mulombeene kwata minite 30 sunga kukila paapa bwa kulonga Eyi dy’Efile Mukulu.
․․․․․
Kukita programe nyi mpenda mbangilo. Su bobanga kulonga, okyebe kumona shi kubaka kwa Bible ta nkukambe kubofula nya. Okyebe kumona bibamwene Jezreel sha bipwa 11, bambile shi: “Bingi bipindji bya Bible bi bukopo, ta mbibofule kupusha nya.” Su opusha byabya, tokookanga nya. Nsaa yooso, ikala olongo Bible na binangu bya’shi okimbi nsaa ya kuteemesha kuuku oobe, Yehowa Efile Mukulu. Kunyima, kulonga kwa Bible akukwikeela kubofule pwetatshisha bwa kulonga.
Luteko lwi na muulo
Luteko nyi mushindo wa kwisamba n’Efile Mukulu. Banda kwela binangu: luteko nkya buntu kikata! We kwisamba na Yehowa nsaa yooso yokumiina, bufuku sunga kanya. Nsaa yooso ateemeshaa. Kukaasha byabya, akumiina kuteemesha byooso byokyebe kumulungula. Nyi bwakinyi Bible akunyingisha shi: “Nguba ooso, mu nteko, mu kwiyaaya na mu ntumbu, uukishaayi Efile Mukulu nkalo yeenu.”—Bena-Fidipe 4:6.
Bu abilesha uno verse, kwi myanda ibungi yodi mulombeene kulungula Yehowa. Bino mbilombeene kwikala nkalakashi na binyongwa byoobe. We mukumbeene kwisambila myanda yokumiina kutumbwila Efile Mukulu. Na dingi, takwi ingi misango yotumbulaa bakuuku boobe bwa myanda kampanda ibuwa yabadi bakukitshine? We kukita byabya bwa Yehowa, aye mukukitshine myanda yabashi balombeene nkukitshine kwi ungi kuuku.—Misambo 106:1.
Funda pano myanda yoodi na kya kutumbwila Yehowa.
․․․․․
Kushi mpaka, nsaa na nsaa kwi myanda ya moo na binyongwa abitukalakasha mu binangu. Mukanda wa Misambo 55:23 awamba shi: “Tentwila bushito bobe kwi Yehowa, aye akunyingisha; sunga byaa-naminyi taakuleka mululame esheete.”
Mu milongo ayilondo, funda myanda yooso ayikukalakasha yokumiina kwelela nteko.
․․․․․
Myanda yoodi mufumankane nayo
Kwi ungi mwanda utale bukuuku n’Efile Mukulu oshi mulombeene kuluba. Mufundji a misambo Daavide bafundjile shi: “Tompai Yehowa nwimwene byadi buwa.” (Misambo 34:8, EEM) Pabaadi Daavide mufunde Musambo 34, bakatukile mu kufumankana na mwanda wa moo. Baadi kwete kusuuka Mfumu Saule—baadi mukalakashwe ngofu. Anka kunyima kwa byabya baadi mwende mu kufwama kwi beshikwanyi naaye Beena Filistina. Pabaabadi abakyebe kumwipa, Daavide baadi mwidimbe bu kitesha, aye nkupanda.—1 Samwele 21:10-15.
Daavide tabaadi mwambe shi baadi mupanda pa mwanda wa binangu byaaye nya. Anka, baadi mutumbishe Yehowa. Ku mbangilo kwa uno Musambo, bafundjile shi: “Nedidiile Yehowa ee nkuñalûla, bankatwishe mô oso u nádi n’ao.” (Misambo 34:5, EEM) Uno nyi mwanda ubaadi mufumankane nao aye nabeene, anka, Daavide baadi na kya kunyingisha bangi bwashi ‘batombe na kwimwena bi Yehowa buwa.’a
Kwi mwanda oodi mufumankane nao mu nshalelo oobe aulesha bibaadi Yehowa mukukwashe su? Su we na mwanda wi byabya, eufunde. Kimba: Tabitungu shi wikale mwanda ukilekile bukata nya. Tompa kwela binangu ku myanda yooso ipela ayilesha bikwelele Yehowa myabi, ingi ngilombeene kulenguulwa.
․․․․․
Pangi baledi boobe mbakulongyesha myanda ya mu Bible. Su mbyabya, uno mmwabi ukata. Anka, abitungu shi wekale na kyoobe kipwano na Efile Mukulu. Su tobangile kwibikita, we kutumika na myanda i mu uno shapitre bwa kubanga. Yehowa akwelela mwabi bwa byoso byokitshi. Bible amba shi: “Tekaayi, abeenupa; kimbayi anupete; kookolaayi, abeenushitwila.”—Mateo 7:7.
BADIKA INGI MYANDA ITALE UNO MWISAMBO MU VOLIME 1, SHAPITRE 38 NA 39
Omona shi ta mbibofule kulungula bangi pabitale Efile Mukulu? Longa bya kwakwila lukumiino loobe.
[Mianda wi mushi muesaki]
a Mu ingi Bible mbalule mayi ‘tompa omone’ shi “efumbwile obe nabeene,” “mona obe nabeeneme,” na shi “pofumankana na mwanda omono.”—Contemporary English Version, Today’s English Version, and The Bible in Basic English.
KIFUNDUE KI NA MUULO
“Baaba abashinguula byabadi nalukalo lw’Efile Mukulu be na wa kusepêla.”—Mateo 5:3, EEM.
KYA KUKITA
Badika penda masaki ananka a mu Bible kwifuku, opudisha kumubadika munda mwa kipwa kimune.
OUKANGA SHI . . . ?
Bu byokwete kubadika uno mukanda na kutumikila malango e mwanka aafiki mu Bible, bino abilesha shi Yehowa kwete kutuula binangu byaye moodi.—Yowano 6:44.
KYANKYEBE KUKITA!
Bwashi kulonga kwa Bible kunkwashe ngofu, nankyebe ․․․․․
Bwashi ngikale neele nteko efuku dyooso, nankyebe ․․․․․
Kyankyebe kwipusha baledi bande pabitale uno mwisambo nyi nkino ․․․․․
OPWANDJIKISHA KINYI?
● Nkinyi kyodia kukita bwashi kulonga kwa Bible kwikale akukupa muloo?
● Bwakinyi Yehowa akumiina kutemesha nteko ya bantu bakutwe kupwidika?
● Mushindo kinyi oodi mulombeene kulongamisha nteko yoobe?
[Eyi dya kukaka nadyo binangu bya bantu]
“Panadi nki mukinga, mu nteko yande naadi nambuula myanda imune. Binobino n’etatshisha bwa kuteka pabitale myanda ibuwa na ibubi y’anfumankana nayo efuku n’efuku. Bu byabidi shi takwi mafuku abidi e mumune, bino abinkwasha bwashi ntshikalanga nambuula myanda imune imune.”—Eve
[Kashibo/Foto]
Taluula mu Bible oobe
1. Sangula mwisambo wa mu Bible okyebe kubadika. Ela luteko bwa kupeta binangu bya kupusha kyobadika.
2. Badika mwisambo kalolo. Tobadikanga lubilolubilo. Pobadika, ikala onangushena. Tumika na bipindji bya mbidi bibungi bwa kupusha kalolo: Tompa kumona abikitshika myanda, kupusha mayi bantu be mwanka, onunkye mapembwe e mu lupapi, opushe mwenyi wa bidibwa, na ingi yooso. Ikala bu’be batwele mu uno mwisambo.
3. Nangushena pabitale myanda ibokatuka mu kubadika. Eyele nkonko, bu ino ayilondo:
● Bwakinyi Yehowa mutweshe uno mwanda mu Eyi dyaaye?
● Mbantu kinyi be mwanka abatungu kwambula, na mba nanyi be bu kileshesho kya kwitudimusha?
● Uno mwisambo unambadika ubandongyesha myanda kinyi?
● Uno mwisambo ubandongyesha kinyi pabitale Yehowa na mushindo wakitaa myanda?
4. Ela luteko lwipi kwi Yehowa. Mulungule myanda ibolongo mu kubadika koobe kwa Bible na mushindo okumiina kutumikila ino myanda mu nshalelo oobe. Ikala nsaa yooso otumbula Yehowa bwa bwedi bwadi mukupe—Eyi dyaaye, Bible Eselele!
[Foto]
“Eyi dyoobe nyi etaata adimunyika ku ngwa yande, etaata adintoosheesh’eshinda dyande.”—Misambo 119:105.
[Kashibo/Foto]
Sangula myanda yodya kutuula pa mbalo ya kumpala
Myanda ngikile bungi bokutwa nsaa ya kwela nteko? Bokutwa nsaa ya kulonga Bible? Misango ibungi, mbitale mushindo osangula bwa kukita myanda, pabitale myanda ya kutuula kumpala.
Banda kutompa kukita bino: Banda kwata ka mbeketshi, wemwele mabwe akata ebungi. Akupu oushe ka mbeketshi na lufwinkinyi mpa na ku milomo. Binobino we na ka mbeketshi kaule mabwe akata na lufwinkinyi.
Binobino kasha byooso mu kambeketshi, kadi olame ano mabwe na luno lufwinkinyi. Tompa kushintuula ngyelelo abyo mu kambeketshi: Ela lufwinkinyi mu kambeketshi kumpala, akupu otompe kutwesha ano mabwe akata mu kambeketshi. Amwikala mbalo ya kutwesha mabwe ooso akata? Nya, mwanda uno musango bwele lufwinkinyi mu kambeketshi kumpala.
Bino abilesha kinyi? Bible amba shi: ‘Shinguula kikile byooso ku buwa.’ (Bena-Fidipe 1:10) Su botuulu myanda i na muulo upeela bu kukisha kwa kapapi kumpala, okutwa nsaa ya kukita myanda ya muulo ukata—myanda ya mu kikudi. Kadi su bolondo elango dya mu Bible, okyebe kumona shi opete nsaa ya kukita myanda ya muulo ya mudimo wa Bufumu mpa na nsaa ya kukisha kapapi kushi kukishakisha. Byooso mbitale kyokumiina kutuula kumpala mu kambeketshi koobe!
[Foto]
Anka bu mutshi, bukuuku abitungu kwibudisha bwashi bukule