Efile Mukulu e na mpango kinyi bwa nsenga?

1. Efile Mukulu bapangile nsenga bwakinyi?

Yehowa baadi mupe bantu nsenga. Nyi mbalo yetu ya kushaala. Nyi bwakinyi mulume na mukashi ba kwibedi, Adame na Eeva, tababaadi bebapangye bwa nkashaala mwiyilu nya​—Efile Mukulu baadi mupwe kupanga miikeyilu bwa kushaala mwiyilu. (Yoobo 38:4, 7) Pamutwe pa byabya, Efile Mukulu baadi mulumbulwile muntu a kwibedi mpaladiiso ebuwa ayitaminwa bu lupango lwa Edene. (Kibangilo 2:15-17) Yehowa bapele Adame na baana baaye lukulupilo lwa kwikala na muwa wa looso pa nsenga.​—Badika Misambo 37:29; 115:16.

Ku mbangilo, nkapenda lupango lwa Edene ndjo lubaadi mpaladiiso. Mulume na mukashi ba kwibedi abaadi na kya kwitandeena na kuusha nsenga. Kunyima kwa mafuku, abaadi balombeene kudiila nsenga ishima bufumu na kwiyikasha bu mpaladiiso. (Kibangilo 1:28) Nsenga tayikabutudibwa nya. Ayikekala nsaa yooso na bantu bemushaale.​—Badika Misambo 104:5.

Tala video Bwakinyi Efile Mukulu bapangile nsenga?

2. Bwakinyi lelo uno nsenga tayikii mpaladiiso?

Adame na Eeva abakutshile kukokyela Efile Mukulu, byabya Yehowa baadi mwibatushe mu lupango lwa Edene. Mpaladiiso baadi mushimine, na muntu su ngumune tamobeshe kumwalusha. Bible amba shi: ‘Nsenga i mu maasa a muntu mubi.’​—Yoobo 9:24.​—Badika Kibangilo 3:23, 24.

Yehowa baadi mulekye mpango ibaadi nayo bwa bantu su? Nya! Aye nyi Sha-bukome-booso. Tamukumbeene kukutwa kobesha nya. (Yeeshaya 45:18) Akyebe kwalusha bantu bu bibaadi akyebe shi bekale.​—Badika Misambo 37:11, 34.

3. Mushindo kinyi wabakalusha mpaladiiso?

Mpaladiiso akekala dingi pa nsenga apakabanga Yesu kufuba bu Nfumu abadi basangule kwi Efile Mukulu. Mu ngoshi ya Armagedone, Yesu akyebe kukunkusha miikeyilu bwa kubutula booso bakwete kutombokyela Efile Mukulu. Akupu Yesu akyebe kwela Satana mu lukano munda mwa bipwa 1 000. Bafubi b’Efile Mukulu abakapanda apakafiki kabutu mwanda Yesu akebakunkusha na kwibalama. Abakapete muwa wa looso mu Mpaladiiso pa nsenga.​—Badika Bifumbulwe 20:1-3; 21:3, 4.

4. Makyenga aakapu mafuku kinyi?

Efile Mukulu akyebe kupudisha bubi mafuku kinyi? Yesu baadi mutuushe “kitundwilo” akilesha shi nfudiilo taadi pepi. Myanda ikwete kutuula muwa wa bantu mu masaku ayilesha shi twi mu mafuku a “nfudiilo a byapano.”​—Badika Mateo 24:3, 7-14, 21, 22.

Munda mwa bipwa 1 000, Yesu kwakwa kwiyilu kwadi akyebe kumuna nsenga, na kupudisha makyenga ooso. (Yeeshaya 9:6, 7; 11:9) Yesu akyebe kufuba bu Nfumu, na dingi ekala Tshiite-mwakwidi Mukata e panundu na kukasha milwisho ya baaba bafule Efile Mukulu. Byabya, ku bukwashi bwa Yesu, Efile Mukulu akyebe kupudisha mikumbo, kununupa, na lufu.​—Badika Yeeshaya 25:8; 33:24.

5. Mbantu kinyi abakashala mu mpaladiiso?

Bantu abakokyela Efile Mukulu abakashala mu Mpaladiiso. (1 Yowano 2:17) Yesu batumine balongi baaye bwa kukimba bantu basha kwiyisha na kwibalongyesha mushindo wa kwikala bantu babadi bakumine kwi Efile Mukulu. Lelo uno, Yehowa kwete kulumbuula midiyo ya bantu bwashi bashaale mu Mpaladiiso pa nsenga. (Sofonii 2:3) Ku Mashibo a Bufumu a Batemwe ba Yehowa, bantu bakwete kulonga mushindo wa kwikala balume na bakashi bebuwa sunga baledi bebuwa. Baana na banambutwile abalangwila Efile Mukulu pamune na bakwete kulonga mushindo ukumbeene mukandu wibuwa kwibakwasha.​—Badika Mika 4:1-4.