Bwakinyi Efile Mukulu e na ndumbulwilo?

1. Bwakinyi Efile Mukulu baadi mulumbuule mwilo wa Isaleele a kala?

Efile Mukulu baadi mulumbuule bekulu ba Abrahame bwashi bekale mwilo na aye nkwibapa miiya. Baadi mwitanyine wawa mwilo bu “Isaleele” aye nkwiwikasha bu kitundwilo kya lulangwilo lwa binyibinyi na ky’eyi dyaaye. (Misambo 147:19, 20) Byabya, Isaleele baadi mukumbeene kukwasha bantu ba miilo yooso.​—Badika Kibangilo 22:18.

Efile Mukulu basangwile beena Isaleele bwashi bekale bu tumonyi twaye. Myanda yaabo ya kala ayitulesha muloo ubaadi nawo mwilo paubaadi aukokyela ku miiya y’Efile Mukulu. (Miiya Ikituulwe 4:6) Byabya, ku bukwashi bwa beena Isaleele, bangi naamu abaadi na mushindo wa kuuka Efile Mukulu a binyibinyi.​—Badika Yeeshaya 43:10, 12.

2. Bwakinyi beena Kidishitu ba binyibinyi mbebungye mu ndumbulwilo umune?

Kunyima, Isaleele bashimishe kipwano kyaye n’Efile Mukulu, ndjo Yehowa nkutuula kakongye ka beena Kidishitu pa mbalo ya wawa mwilo. (Mateo 21:43; 23:37, 38) Binobino, pa mbalo ya beena Isaleele, beena Kidishitu ba binyibinyi bakwete kufuba bu tumonyi twa Yehowa.​—Badika Bikitshino 15:14, 17.

Yesu baadi mulumbuule balondji baaye bwashi balungule mukandu wibuwa na kwikasha bantu ba miilo yooso bu balondji. (Mateo 10:7, 11; 24:14; 28:19, 20) Uno mudimo taudi pepi na ku nfudiilo, mu ano mafuku a nfudiilo a uno ndumbulwilo a myanda. Bwa mususa wa kumpala kasha bantu bekala kwanka, Yehowa mubungye midiyo ya bantu ba miilo yooso mu lulangwilo lwa binyibinyi. (Bifumbulwe 7:9, 10) Beena Kidishitu ba binyibinyi mbebungye mu ndumbulwilo umune bwa kwinyingishena na kwikwashena. Mu nsenga ishima, be na programe umune a kulonga Bible mu bisangilo byabo.​—Badika Beena-Ebreeyi 10:24, 25.

3. Ndumbulwilo a Batemwe ba Yehowa ba ano mafuku mubangye naminyi?

Ndumbulwilo a Batemwe ba Yehowa ba ano mafuku babangile mu bipwa 1870. Kisaka kipela kya balongi ba Bible kibabangile kufumbula malongyesha a binyibinyi a mu Bible abaadi ashimine. Abamwene shi Yesu baadi mukite kakongye ka beena Kidishitu bwa kulungula mukandu wibuwa, byabya ababangile kukita kampanye ka kulungula mukandu wibuwa wa Bufumu mu nsenga ishima. Mu 1931 abatshile eshina dya bu Batemwe ba Yehowa.​—Badika Bikitshino 1:8; 2:1, 4; 5:42.

4. Ndumbulwilo a Batemwe ba Yehowa e naminyi?

Mu mafuku a batumibwa, tukongye twa beena Kidishitu mu maumbo ebungi tubaadi ku bukunkushi bwa kasaka ka bakunkushi-bakulu kabaadi akakumina shi Yesu nyi Nfumu a kakongye. (Bikitshino 16:4, 5) Bi mumune na ano mafuku, Batemwe ba Yehowa mu nsenga ishima bakwete kukunkushibwa na Kasaka ka Bakunkushi-bakulu, bakulu abauku mudimo kalolo. Bakwete kukunkusha ma biro a ma filiale a Batemwe ba Yehowa akwete kwalula mikanda ya kulonga nayo Bible mu ingi ndimi ikile pa 600, kutuusha mikanda, na kwiyituma mu tukongye. Byabya, Kasaka ka Bakunkushi-bakulu akatusha Bifundwe bya kunyingisha nabyo na kukunkusha tukongye tukile 100 000 twi mu nsenga ishima. Mu tukongye tooso, balume booso abalombasha myanda itekibwe bakwete kukwasha bu bakulu, sunga bu bakunkushi. Bano balume bakwete kulama mikooko y’Efile Mukulu na kifulo kyooso.​—Badika 1 Mpyeele 5:2, 3.

Atwe Batemwe ba Yehowa twi belumbuule bwa kulungula mukandu wibuwa na kwikasha bantu bu balondji. Bu bibaadi batumibwa, atwendaa mu kutala bantu ku nshibo na nshibo. (Bikitshino 20:20) Atulongaa dingi Bible na bantu be na mashimba ebuwa bafule bya binyibinyi. Kadi atwe Batemwe ba Yehowa ta twi penda bu kisaka kya bantu be mu ndumbulwilo umune nya. Twi kifuko ki na Nshetu a kifulo. Twi beena muntu, balume na bakashi abetatshisha bwa bakwabo. (2 Beena-Tesalonika 1:3) Bu bi mwilo wa Yehowa ngwilumbuule bwa kusangasha Efile Mukulu na kukwasha bangi, ngukite kifuko ki na muloo ukata pa nsenga.​—Badika Misambo 33:12; Bikitshino 20:35.