Kwi efuku adikapu makyenga su?

AKYAMBA BIBLE

“Efile Mukulu . . . akebakumuna mpolo yoso i kumeeso kwabo, takukekala’nyi lufu, sunga maalo, sunga nkudila mpolo, sunga mitanyo.”​—Bifumbulwe 21:3, 4, Kilombeno kipya.

KYODI MULOMBEENE KUPETA SU WE MUTUULE LUKULUPILO KU UNO MULAYILO

Okyebe kushinguula shi Efile Mukulu ta nnaye mutuushe myanda ibubi i pa nsenga nya.​—Jaake 1:13.

Onyingishibwa kwishimba p’ouku shi Efile Mukulu etuulaa pa mbalo yeetu nsaa yatukyenge.​—Zakarii 2:8.

Wekala na lukulupilo lwa’shi makyenga ooso aakyebe kupwa.​—Misambo 37:9-11.

TWI BALOMBEENE KUKUMIINA AKYAMBA BIBLE SU?

Oolo, bwa ino myanda ibidi:

• Efile Mukulu mmushikwe makyenga na kukutwa kwa kululama. Banda kutala bibapushishe Yehowa Efile Mukulu mu mafuku a kala pababadi abakyengyesha bafubi baaye. Bible akula shi baadi mwinyongole mwanda “babebafwambushanga.”​—Bansushi 2:18, Bifundwe Biiselele.

  Efile Mukulu mmushikwe baaba abakyengyesha benabo. Bu kileshesho, Bible amba shi, mmushikwe “maasa aasukumuna mase a muntu shii musoole mwanda.”​—Myeele 6:16, 17.

• Efile Mukulu etatshishaa ngofu bwa muntu ooso a kwatudi. Ta nka penda muntu nabene atundulaa “kipupa kyaaye na mukumbo waye” nya, mpa na Yehowa naamu atundulaa!​—2 Myanda 6:29, 30.

  Ku bukwashi bwa Bufumu bwaye, Yehowa akyebe kupudisha makyenga ooso a muntu na muntu. (Mateo 6:9, 10) Bwa binobino, kwete kunyingisha booso abamukimbi na mashimba aabo ooso.​—Bikitshino 17:27; 2 Beena-Kodinto 1:3, 4.