Bintu bya kulungula nabyo mukandu wibuwa Kutuusha mikanda ya kwabila mu nsenga ishima

1, 2. (a) Mu siekele a kumpala,nkinyi kibaadi kikwashe bwa kupalakasha mukandu wi buwa mu Ampire a beena Looma? (b) Mu ano mafuku etu nkinyi akilesha shi twi na bukwashi bwa Yehowa? (Tala kashibo akamba shi: “Mukandu wibuwa mu ndimi ikile pa 670.”)

BIBAADI bukopo bwashi bantu benyi abafikile mu Yeelusaleme bakumiine myanda ibaabadi abapusha. Beena Ngalileeya abaadi abakula ndimi ya bantu benyi kalolo na, mukandu ubaabadi abaakula abaadi abeupusha kwi bantu abaadi abebateemesha. Bibaadi bikitshikye mu Pentekote a mu kipwa kya 33 kunyima kwa Yesu Kidishitu (B.B.), na kubakitshikile kipaso, balondji nkupeta kya buntu kya kwakula mu ingi ndimi​—bibaadi abilesha shi abaadi na bukwashi bw’Efile Mukulu. (Badika Bikitshino 2:1-8, 12, 15-17.) Mukandu wibuwa ubaabadi abalongyesha dyadya efuku ubakumine bantu ba mu ma mbalo ooso ku mashimba na kunyima, ubapalakeene mu Ampire a beena Looma.​—Kol. 1:23.

² Lelo uno, bafubi b’Efile Mukulu t’abakitaa bipaso bya kwakula mu ndimi nya. Sunga mbyabya, bakwete kupalakasha mukandu mu ndimi ibungi kukila mu siekele a kumpala, abaaluula mukandu wa Bufumu mu ndimi ikile pa 670. (Bik. 2:9-11) Bafubi b’Efile Mukulu mbatuushe mikanda ikile bungi mu ndimi ibungi bwashi mukandu wa Bufumu utwele mu ma mbalo ooso pa nsenga.a Bino dingi abilesha patooka shi Yehowa kwete kutumika na Nfumu Yesu Kidishitu bwa kukunkusha mudimo wa kulungula mukandu wibuwa. (Mat. 28:19, 20) Nsaa y’atutaluula ndambo ya bintu byatudi batumikye nabyo bwa kulombasha uno mudimo munda mwa bipwa 100 bishaale, tutaleyi mushindo utungunukye Nfumu na kwitulongyesha bwashi twikale atwitatshisha bwa bantu na byaadi mwitunyingishe bwatudya kwikala balongyeshi b’Eyi dy’Efile Mukulu.​—2 Tim. 2:2.

Nfumu apa bafubi baaye bintu bya kukuna nabyo mbyo ya bya binyibinyi

3. Bwakinyi atutumikaa na bintu bilekenelekene mu mudimo wetu wa bulungudi?

³ Yesu baadi mupwandikishe “eyi dya Bufumu” na mbyo, apwandikisha namu eshimba dya muntu bu nsenga. (Mat. 13:18, 19) Bi mumune na bilombeene kidime kutumika na bintu bilekeene bwa kubofusha nsenga na kwiyilumbuula bwa kukuna mbyo, bafubi ba Yehowa mbatumikye na bintu bilekeene bibakwashe bwa kulumbuula mashimba a midiyo ya bantu bwashi batambule mukandu wa Bufumu. Ingi ndambo ya byabya bintu bibaadi na muulo penda bwa kapindji kapeela. Bingi bintu bu mikanda na ma jurnale, bikwete kutungunuka na kukita mufubo wibuwa. Kukaasha mishindo ya kulungula bisaka bya bantu yatwikalanga bamone mu shapitre bashaala, bintu byooso byatwikalanga besambile mu shapitre mushaale mbikwashe balungudi ba Bufumu bwabadya kwimonena na bantu bwa kwisamba nabo meso kwa meso.​—Bik. 5:42; 17:2, 3.

4, 5. Mushindo kinyi ubaabadi abatumika na kyamo kya fono, kadi kibaadi kikutwe kinyi?

⁴ Miisambo yabadi bakobole. Kubanga mu 1930 na mu 1940, balungudi abaadi abatumika na miisambo ya mu Bible yabadi bakobole beyela mu tu ma fono twa ku maasa. Mwisambo ooso ukobolwe ubaadi aukitshika muushi mwa minite itaano. Ingi nsaa mwisambo ubaadi na ka mutwe ka mwanda akamba shi: “Busatu bwiselele,” “Mpurgatoriyo,” na “Bufumu.” Mushindo kinyi ubaabadi abatumika na ano mayi akobolwe? Mukwetu Clayton Woodworth, baadi mubatshibwe mu 1930 mu États-Unis akula shi: “Naadi natwala ka kibuta kapeela ka fono, ke na ressort mwikefunyishe, na mboko ya kwikatwadila inaadi naludika kalolo pa mbalo ibuwa bwakadya kuyimba kalolo. Naadi nefubwila pa kibelo, na kufungula kabuta na kwibwesha mboko nkufiitshina pa ka ngonga ka ku kibelo. Su sha nshibo bashitula ku kibelo, na mulungula shi, ‘ne na mukandu wa muulo ukata wankumiina shi oteemeshe namu.’” Abaadi abaluula naminyi? Mukwetu Woodworth amba shi: “Misusa ibungi abaadi abakumiina. Ingi nsaa bantu abaadi abashitshi ku kibelo mususa umune. Mu ingi misango abaadi abamono shi nkwete kuudisha byamo bya fono.”

⁵ Mu 1940 abaadi bakobole miisambo ilekeenelekeene ikile pa 90 na kutuusha ma diske akile pa mudiyo ushima. John E. Barr baadi mbala-mashinda mu Grande-Bretagne mu aa mafuku na baadi mufube kunyima mu Kasaka ka Bakunkushi-Bakulu bambile shi: “Mu kipwa kya 1936 na mu 1945 naadi na kyamo kya fono mbalo yooso. Anka, mu aa mafuku naadya kwikala mushimine su ntshinaadi na fono. Kupusha eyi dya mukwetu Rutherford ku kibelo kya nshibo kubaadi akunyingisha ngofu, opusha nka bu’be kwete kwenda naaye mu bulungudi. Eyendo, mudimo wa fono ubaadi ukutwe kintu kimune kya mu mudimo wa bulungudi, bukome bwa kukuma mashimba a bantu.”

6, 7. (a) Karte ka bu kamonyi kabaadi na bukwashi kinyi, na nkinyi kibaakadi kakutwe? (b) Yehowa ‘mwele mayi mukanwa mwetu naminyi’?

⁶ Karte ka bu kamonyi. Ku mbangilo kwa 1933 abaadi banyingishe balungudi bwabadya kutumika na karte ka bu kamonyi mu mudimo wabo wa bulungudi bwa ku nshibo na nshibo. Karte ka bu kamonyi kabaadi na bula bwa santimetre 7,6 sunga 12,7. Kabaadi na mukandu wa mu Bible mu kikoso na kulesha bi miisambo ya mu Bible yabadi balombeene kutambula kwi bantu ku mashibo aabo. Mulungudi baadi mulombeene penda kutambika sha nshibo karte na kumuteka bwashi ekabadikye. Lilian Kammerud, baadi misionere mu Porto Rico na mu Argentine bambile shi: “Naadi musangeele mudimo wa karte ka bu kamonyi.” Bwakinyi? Amba shi: “Ta ngooso a kwatudi baadi na mushindo wa kulungula mukandu kalolo, byabya kabaadi kankwashe bwa kwikala na kiubishi kya kwiseselanga kwi bantu.”

⁷ Mukwetu David Reusch baadi mutambule mu 1918 alesha shi, “Karte ka bu kamonyi kabaadi kakwashe bakwetu, mwanda bapeela ndjo abaadi abamono shi mbalombeene kwakula kintu ki buwa.” Sunga mbyabya kano kantu kabaadi na bukome bupeela. Mukwetu Reusch bambile shi: “Tubaadi atufumankana na bantu abaadi abapwandikisha shi tatwi balombeene kwakula. Nyi nkwamba shi, bebungi ba kwatudi tababaadi abakula nya. Kadi Yehowa baadi etulumbuula bwatudya kwisamba na bantu bebungi bu bafubi baaye. Mu mafuku apeela baadi mwele mayi mukanwa mwetu bwa kulongyesha na Bifundwe patudi ku kibelo kya muntu. Bino bibaadi bikitshikye ku bukwashi bwa Kalasa ka mudimo wa teokrasi kababangile mu 1940.”​—Badika Yeelemiya 1:6-9.

8. Mushindo kinyi oodi mulombeene kutadiila Kidishitu bwashi akulongyeshe?

⁸ Mikanda. Kubanga mu 1914, bafubi ba Yehowa mbatuushe mikanda ilekeenelekeene ikile pa 100 ayisambila myanda i mu Bible. Ingi ya ku yaaya mikanda ibaadi ikitshiibwe bwa kulongyesha balungudi bwashi bekale abatuusha bipeta bibuwa mu mudimo waabo. Anna Larsen, a mu Danemark mulungudi munda mwa 70 alesha shi: “Yehowa mwitukwashe bwatudya kutuusha bipeta bi buwa ku bukwashi bwa Kalasa ka mudimo wa Teokrasi na ingi mikanda yatudi bapete. Natentekyesha shi mukanda wa kumpala wa ku yaaya mikanda ubaadi mmukanda wa Aide théocratique pour les proclamateurs du Royaume ubatuukile mu 1945. Abaadi beulonde kwi mukanda wa “Équipé pour toute bonne œuvre” ubatuukile mu 1946. Binobino twi na mukanda wa Tirez profit de l’École du ministère théocratique, ubatuukile mu 2001.” Eyendo shi, Kalasa ka mudimo wa Teokrasi na mikanda yaako mbikwashe ngofu bu bi Yehowa mwitupe “bukome bwa kulombasha mufubo.” (2 Kod. 3:5, 6, EEM) We mwifundjishe mu Kalasa ka mudimo wa Teokrasi su? Ku lubingo looso wendaa na mukanda wa Tirez profit de l’École du ministère théocratique mu bisangilo na kulondesha mukunkushi a kalasa pa kwete kwakula myanda i mwanka su? Su bokitshi byabya, opa Kidishitu mushindo wadya nkulongyesha bwashi wekale mulongyeshi e buwa.​—2 Kod. 9:6; 2 Tim. 2:15.

9, 10. Mikanda ngikwashe naminyi pabitale kukuna na kwela mema ku mbyo ya bya binyibinyi?

⁹ Yehowa mwitukwashe dingi nsaa yaadi mukite bwashi ndumbulwilo aaye atuushe mikanda ya kukwasha balungudi bwashi bapatuule malongyesha akata a mu Bible. Mukanda wa La vérité qui conduit à la vie éternelle ubaadi utuushe bipeta bikile bungi. Abaadi beutuushe bwa mususa wa kumpala mu 1968 na ao nkutuusha bipeta bikile buwa mususa umune. Mu Mudimo wetu wa Bufumu wa mu mweshi w’Ekumi na umune wa mu 1968 abaadi baleshe shi: “Bantu abaadi batekye mukanda wa La vérité ngofu mu mushindo ubaadi shi mu mweshi wa Kitema ku Sosiete a ku Brooklyn kubaadi kisaka kya bantu abeshintushena bufuku bwa kutumika.” Mu wawa mwisambo abaadi abalesha dingi shi: “Mususa umune mu mweshi wa Mwanda bungi bwa mikanda ya La vérité bubaadi bukamine kukila mudiyo umune na kipindji!” Mu 1982, mikanda ikile pa midiyo 100 ibaadi itushiibwe mu ndimi 116. Munda mwa bipwa 14 kubanga mu 1968 na mu 1982, mukanda wa La vérité ngukwashe bwa kutenteka bantu bakile mudiyo umune ku mulongo wa balungudi.b

¹⁰ Mu 2005, kingi kintu kibaadi kikwashe bwa kulonga Bible mmukanda wa A nkinyi akilongyesha namu Bible? Mikanda pepi midiyo 200 ngitushibwe mu ndimi 256! Mbipeta kinyi bituukye? Penda mu bipwa musambo, kubanga mu 2005 na mu 2012, bantu pepi na mudiyo umune na kipindji mbafikye bu balungudi ba mukandu wibuwa. Mu aa mafuku, bungi bwa bantu abalongo Bible mbukamine kubanga pa midiyo 6 mpa na kukila pa midiyo 8,7. Kushii mpaka, Yehowa kwete kwela mwabi ku byooso byatukitshi bwa kukuna na kwela mema ku mbyo ya bya binyibinyi bya Bufumu.​—Badika 1 Beena-Kodinda 3:6, 7.

11, 12. Muyiile maverse abadi bafunde, ma jurnale etu abaadi aatuku bwa bantu kinyi?

¹¹ Ma jurnale. Bwa mususa wa kumpala Kitenta kya Mulami kibaadi kwanka bwa penda “lombe lupeela,” baaba bapete “lwitanyino lwa mwiyilu.” (Luk. 12:32; Eb. 3:1) Mu 1/10/1919, ndumbulwilo a Yehowa batushile ungi jurnale, baadi kwanka bwa kukwasha bangi bantu booso. Yawa jurnale baadi mupalakane kwi Balongi ba Bible booso mpa na kwi bangi bantu munda mwa bipwa bibungi, kupalakana kwaye kubaadi kukile kwa Kitenta kya Mulami. Bwa mususa wa kumpala abaadi abetamina yawa jurnale bu L’Âge d’Or. Mu 1937, eshina dyaaye dibashintulukile adyo nkufika bu Consolation. Akupu mu 1946, ababangile kumwitamina bu Réveillez-vous!

¹² Munda mwa bipwa makumi, mushindo wa kukita Kitenta kya Mulami na Réveillez-vous! ngushintulukye, kadi mudimo waaye ngushaale nka umune​—kulungula Bufumu bw’Efile Mukulu na kupa bantu lukumiino mu Bible. Lelo uno Kitenta kya Mulami kikwete kutushibwa kya kulonga na kya bantu booso. “Ba mu nshibo” ndjo babafundjila jurnale a kulonga​—bano mbekale “lombe lupeela” na “ingi mikooko.”c (Mat. 24:45; Yo. 10:16) Jurnale a bantu booso mbamukite bwa baaba bashibaadi na kiukilo kya bya binyibinyi kadi abanemeka Bible mpa na Efile Mukulu. (Bik. 13:16) Réveillez-vous! mutale baaba be na ndambo ya kiukilo kya Bible n’Efile Mukulu a binyibinyi, Yehowa.​—Bik. 17:22, 23.

13. Nkintu kinyi akikukanyisha pabitale ma jurnale etu? (Taluula myanda i mu kashibo akamba shi: “Bungi bwa mikanda batuushe mu nsenga ishima.”)

¹³ Ku mbangilo kwa kipwa kya 2014, ku mweshi ooso ma. Réveillez-vous! akile pa midiyo 44 na ingi jurnale midiyo 46 ya Kitenta kya Mulami ibaadi itushibwe. Réveillez-vous! abekalanga bamwalule mu ndimi pepi na 100, na Kitenta kya Mulami, mu ndimi ikile pa 200, abimwikasha bu jurnale umune kwete kwaluulwa kukila angi ma jurnale ooso pa nsenga! P’atumono kukitshibwa kwa bino byooso, tatwi balombeene kukanya. Ano ma jurnale e na mukandu ubaadi Yesu mwambe shi, aukalungulwa mu nsenga ishima.​—Mat. 24:14.

14. Nkinyi kyatudi bakite na kisumi kyooso, na mbwakinyi?

¹⁴ Bible. Mu 1896, mukwetu Rusell na bakwabo abashintulwile eshina dya sosiete dibaabadi abatumika nadyo bwa kutuusha mikanda abo nkutwesha mwaku Bible mwanka; bababaangile kumwitamina bu Watch Tower Bible and Tract Society. Kwakwa kushintuula kw’eshina kubaadi na muulo mwanda Bible ndjo ekalaa bu kintu kya kumpala bwa kupalakasha mukandu wibuwa pabitale Bufumu. (Luk. 24:27) Na dyadya eshina ndifundjibwe ku mikanda ya mbulamatadi, na bafubi b’Efile Mukulu mbepaane na kisumi kyoso mu kubadika na kwabila ma Bible. Bu kileshesho mu 1926, tubaadi batuushe mu byamo byetu Bible abetamina bu The Emphatic Diaglott, Bible abadi baluule Bifundwe bya kina Greeke abaabadi batuushe kwi Benjamin Wilson. Ku mbangilo kwa 1942, tubaadi baabile ndambo ya ma Bible ashima 700 000 abetamina bu King James Version. Penda kunyima kwa bipwa bibidi, tubabangile kutuusha Bible abetamina bu American Standard Version, baadi n’eshina Yehowa mu ma mbalo 6 823. Mu 1950, tubaadi baabile ma Bible akile pa 250 000.

15, 16. (a) Nkinyi akikusangasha pabitale Traduction du monde nouveau? (Taluula myanda i mu kashibo akamba shi: “Kuyisha kwa mudimo wa kwalula Bible kumpala.”) (b) Mushindo kinyi oodi mulombeene kutadiila Yehowa bwashi akume eshimba dyoobe?

¹⁵ Mu 1950 tubaadi batuushe Les Écritures grecques chrétiennes​—Traduction du monde nouveau. Bible mushima a Les saintes Écritures​—Traduction du monde nouveau baadi mutuukye mu 1961. Uno Bible atumbisha Yehowa pa kwalusha eshina dyaaye mu mbalo yooso ibaadidi kumpala mu Bifundwe bya ki na Ebreeyi. Eshina dy’Efile Mukulu adisanganyibwa misusa 237 mu Bifundwe bya ki na Greeke bya beena Kidishitu. Bwa kushinkamisha su kwete kwakula myanda nka byayidi na su mubofule bwa kubadika, mbataluule nfundjilo a Traduction du monde nouveau misusa ibungi mpa na mu 2013. Mu 2013 ma Bible a Traduction du monde nouveau kukila midiyo 201 ngatushibwe ashima sunga bipindji mu ndimi 121.

¹⁶ Bangi bantu abaadi bapushe naminyi p’abo kubadika Traduction du monde nouveau mu ndjimi yaabo? Ungi muntu a mu Nepali bambile shi: “Bwa bebungi, ma Bible a kala abaabadi baluule mu ludimi lwa Nepali atwikeele nawo aekalanga bukopo kupusha, mwanda abaadi na ngakwilo e bukopo. Kadi binobino twi balombeene kupusha Bible kalolo, mwanda mbamufunde mu ngakwilo etu a mafuku ooso.” Ungi mukashi a mu République centrafricaine pababangile kubadika Bible a mu ludimi lwa Sango, babangile kudila aye nkwamba shi, “Luno nyi ludimi lwa mwishimba dyande.” Anka bu yawa mukashi, atwe booso twi na kya kutadiila Yehowa bwashi akume mashimba etu nsaa y’atubadika Eyi dyaaye efuku dyooso.​—Mis. 1:2; Mat. 22:36, 37.

Ikala na lutumbu bwa bintu bya kufuba nabyo na malongyesha atukwete kupeta

17. Mushindo kinyi oodi mulombeene kulesha shi okwete kusangeela bintu na malongyesha okwete kupeta, na mbipeta kinyi bilombeene kutuka su okita byabya?

¹⁷ Osangelaa bintu na malongyesha abakwete kutungunuka na kwitupa kwi Nfumu Yesu Kidishitu su? Wateyaa nsaa ya kubadika mikanda yabadi batuushe kwi ndumbulwilo a Efile Mukulu, na otumikaa nayo bwa kukwasha bangi su? Su mbyabya we mulombeene kwakula mumune na bibambile mukwetu mukashi Opal Betler baadi mubatshishibwe mu 1/4/1914. Bambile shi: “Munda mwa bipwa bi bungi, ami na mulume ande [Edward] twi batumikye na kyamo kya fono mpa na ma karte a bu kamonyi. Twi batuushe bu kamonyi ku nshibo na nshibo na mikanda, ma broshire, na ma jurnale. Twi bende na kukita kampanye na kwabila mikanda ya mukandu wi buwa. Kunyima tubaadi bapete malongyesha pabitale mushindo wa kwalukiila kwi bantu [byatwitamina lelo bu kwalukiila mu kutala bantu abekalanga basangeele mukandu wibuwa] na kulonga Bible na bantu abakumiina ku mashibo aabo. Ubaadi mmudimo ukata na wa muloo mu muwa wetu.” Yesu balayile shi, bantu baaye abekala bepaane mu kukuna, kuumbula na kusangala pamune. Bantu midiyo nka bu Opal mbalombeene kushinkamisha shi wawa mulayilo ngwa binyibinyi.—Badika Yowano 4:35, 36.

18. Nkinemo kinyi kyatudi nakyo?

¹⁸ Bantu bebungi bashi babande kwata kitshibilo kya kufubila Nfumu, mbalombeene kumona bafubi b’Efile Mukulu bu ‘bantu bashi balongye mukanda, na be bu bantu booso.’ (Bik. 4:13) Kadi banda kunangushena! Nfumu baadi mufishe bantu baaye be nka bi bantu booso bwa kulungula mukandu mu mushindo ukile bukata, bwa kutuusha mikanda ayaluulwa na kwabilwa ngofu mu nsenga ishima! Kingi kintu ki na muulo nkino, mwitulongyeshe na kwitupa bukome bwa kutumika na bino bintu bwa kupalakasha mukandu wibuwa kwi bantu ba miilo yooso. Twi na kinemo kikata kya kufuba na Kidishitu mu kukuna kwa mbyo ya bya binyibinyi na kuumbula balondji!