KIPINDJI 4
Mushindo wa kufuba kalolo na makuta
“Mu milango ya bantu bebungi, we mulombeene koobesha myanda.”—Myeele 20:18, NWT
Atwe booso twi na lukalo lwa makuta bwa kulombasha nkalo ya bifuko byetu. (Myeele 30:8) Kunyima kwa byooso, ‘mmono ayilamaa muntu.’ (Mulungudi 7:12, EEM) Bu byanudi mu kifuko, bi bukopo bwanudya kwisamba pabitale makuta, kadi tanukumanga kutadiila makuta atuusha bilumbu mu kifuko kyeenu. (Beena-Efeeze 4:32) Beena dibaka mbalombeene kwikulupisheena ku muntu na muntu na kufuba pamune nsaa y’abaata kitshibilo kya mushindo autungu shi bafube na makuta.
1 ELUMBUULEYI KALOLO
AKYAMBA BIBLE: “Naanyi munkatshi mwenu, pakyebe kwibaka nshibo, shaabadiila kushaala bwa kubadika nfwalanga ayitungibwa, bwa kutala su mmulombeene kwobesha?” (Luuka 14:28) Bi na muulo bwa kwisamba pamune mushindo autungu shi nufube na makuta eenu. (Amose 3:3) Ataayi kitshibilo kya kintu kyanudi nakyo lukalo lwa kuula na makuta aatungu kutuusha bwa kwikipeta. (Myeele 31:16) Pa mwanda washi we na makuta a kuula kintu kampanda t’abileesha nka shi abitungu oule kyakya kintu nya. Tompayi kusuuka kwata kwa mabaasa. Fubayi nka na penda makuta anudi nawo.—Myeele 21:5; 22:7.
KYODI MULOMBEENE KUKITA:
Su ku mpwilo a mweshi bopete angi makuta a munundu, ataayi kitshibilo kya mushindo wanukyebe kukita na aa makuta pamune
Su nubashimisha makuta wawa mweshi, kimbaayi mushindo wa kupeelesha makuta anukwete kupaana. Bu kileshesho, nwi balombeene kuteeka kya kudya anwe banabeene pamutwe pa kwenda mu kuula
2 ESAMBEYI MYANDA YOOSO NA NUKIMBE BYA KWIYIPWA
AKYAMBA BIBLE: ‘Ekalakashe bwa kukita myanda yooso na kululama, t’anka penda ku meeso a Yehowa, anka na a bantu.’ (2 Beena-Kidinto 8:21, NWT) Esambe na mwina dibaka noobe na kululama kooso pabitale bungi bwa makuta anutwesha na anutuusha.
Misango yooso, banda kwisamba na mwina dibaka noobe kumpala kwa kwata kitshibilo kikata kitale makuta eenu. (Myeele 13:10) Kwisamba pabitale makuta nkulombeene kwinukwasha bwanudya kulama butaale mu dibaka dyeenu. Tokumanga kumona makuta oobe a makasa bu makuta oobe bupenka, kadi bu makuta a kifuko.—1 Timotee 5:8.
KYODI MULOMBEENE KUKITA:
Tshibayi bungi bwa makuta alombeene kutuusha ooso a kwanudi kushii kwipusha mwina dibaka naye
Tanutengyelanga shi nka kutuukye myanda ndjo nwisambe pabitale makuta