KIPINDJI 5
Mushindo wanudi balombeene kwikala mu butaale na bifuko byenu
“Ikalai bafwale lusa lukata na bumuntu, na kwipêlesha na kipopêlo mpâ na lwishinko.”—Beena Kolose 3:12, EEM
Dibaka adituushaa kifuko kipya. Sunga mbyabidi shi abitungu kufula na kuneemeka baledi boobe nsaa yooso; binobino boobe’be, mwina dibaka noobe ndjo muntu e na muulo ukile pano pa nsenga. Bino mbilombeene kwikala bukopo bwa bangi bakwenu ba mu kifuko bwashi bebikumiine. Anka mayi a kulonda a mu Bible ngalombeene nkukwasha bwa kwikala na nkatshinkatshi, bwa kwikala mu kipwano na beena kifuko noobe bu byokwete kukita bukopo bwa kwibaka kipwano kya kifuko kyoobe kipya.
1 LAMAAYI MMWENENO EBUWA A BIFUKO BYENU
AKYAMBA BIBLE: “Dinga nshoobe na nyinoobe.” (Beena-Efeeze 6:2) Sunga wekala na bipwa bibungi bwinaminyi, abitungu nka odingye na kuneemeka baledi boobe. Shinguula shi bu bi mwina dibaka noobe mmwana namu, abitungu atabaleele baledi baaye. “Kifulo takii na mukao,” byabya topushanga bi bubi mwanda wa kipwano kya mwina dibaka noobe na baledi baaye.—1 Beena-Kodinto 13:4; Beena-Galate 5:26.
KYODI MULOMBEENE KUKITA:
Twekalanga wakula bishima bya kukutwa kaneemo, bu shi “misusa yooso kifuko kyoobe takingataa na muulo” sunga shi “kasha nyinoobe t’asangelaa kyooso kya nkitshi”
Tompa kumona myanda abiyimono mwina dibaka noobe
2 ATA KITSHIBIILO SU KWI MUSHINDO
AKYAMBA BIBLE: “Mulume alekye nshaaye na nyinaaye, bwa kulamata mukashi aaye, abo booso abakeekala mbidi imune.” (Kibangilo 2:24) Nsaa y’otwele mu dibaka, baledi boobe mbalombeene kupusha shi bakii na matalwa koodi, na shi mbalombeene kutwelakana mu myanda ya mu dibaka dyoobe bikilekile.
Nnobe na mwina dibaka noobe balombeene kusangula mbalo yanukyebe bwashi bafudiile na kwibalungula byanka na kalolo kooso. Abitungu nwibalungule myanda patooka na kushii buufu kadi kushii bishima bya kwibatapa ku mashimba. (Myeele 15:1) Kwiyisha, kipopeelo, na lwishinko mbilombeene kwinukwasha bwa kwikala mu kipwano kibuwa na bifuko byenu na kutungunuka na “kwifwileena lusa ku muntu na muntu.”—Beena-Efeeze 4:2.
KYODI MULOMBEENE KUKITA:
Su opusha bubi mu mushindo utwelakane bifuko byeenu mu myanda yenu, ebisambeeyi pamune na mwina dibaka noobe nsaa ayitaala myanda
Epusheneeyi mu mushindo wanukyebe kupudisha yaaya myanda