Kipaso Kibuwa Kya Kulangwila Efile Mukulu

1. Nnanyi mulombeene kwitwiukisha kipaso kibuwa kya kulangwila Efile Mukulu?

BIPWILO bibungi abishinkamisha’shi bikwete kulongyesha bya binyibinyi pabitale Efile Mukulu. Anka ta bi byabya nya, mwanda bikwete kulongyesha myanda ilekeenelekeene pabitale Efile Mukulu na kipaso kya kumulangwila. Twi balombeene kwiuka kipaso kibuwa kya kulangwila Efile Mukulu naminyi? Anka Yehowa Efile Mukulu nabeene nyi akwitwiukisha kipaso kibuwa kya kumulangwila.

2. We mulombeene kwiuka kipaso kibuwa kya kulangwila Efile Mukulu naminyi?

² Yehowa mmwitupe Bible bwashi tulongye kipaso kibuwa kyatudi balombeene kumulangwila. Byabya, ikala olongo Bible. Yehowa akakukwasha bwa kupusha malongyesha aye mwanda kwate kwikalakasha boobe.​—Yeeshaya 48:17.

3. Efile Mukulu akyebe’shi tukite kinyi?

³ Bangi bantu abakula’shi Efile Mukulu mmukumiine bipwilo byooso, anka Yesu ta baadi mulongyeshe bino nya. Aye bakwile’shi: “Nta mbaba booso abangamba’shi; Fumu, Fumu abakatwele mu Bufumu bw’eulu; anka yawa akitshi kikyebe ki’eshimba dya Shami e mwiulu.” Kumbi, bi na muulo bwa kulonga kikyebe ky’eshimba dy’Efile Mukulu na kwikitumikila. Uno nyi mmwanda ukata mwanda Yesu baadi mupwandikishe bantu bash’abakokyela Efile Mukulu na bantomboshi, “Bakitshi ba bubi.”​—Mateo 7:21-23, Kilombeeno kipya 2014.

4. What did Jesus say about doing God’s will?

⁴ Yesu baadi mwitudimushe’shi, atukapete bitompwanga nsaa y’atukyebe kukita kikyebe ky’eshimba dy’Efile Mukulu. Bambile’shi: “Twelayi ku kibelo kipeela; mwanda kikata nyi nkibelo, n’eshinda diangabale aditwaala [bantu] mu kushimina, na bebungi mbaaba abatwelela ku kianka; mwanda kipeela nyi nkibelo, na dibuungye nyi eshinda aditwaala [bantu] ku muwa, na [bantu] bapeela mbaaba abedipete.” (Mateo 7:13, 14, Kilombeeno kipya 2014) Eshinda dibuungye sunga dibuwa bwa kulangwila Efile Mukulu aditwalaa ku muwa wa ikalaika. Eshinda kikata, sunga eshinda dibubi bwa kulangwila Efile Mukulu, aditwala ku lufu. Anka, Yehowa t’akumiina’shi muntu su ngumune afwe nya. Aye mmupe bantu booso mushindo wa kulonga pa bimutale.​—2 Mpyeele 3:9.

KIPASO KIBUWA KYA KULANGWILA EFILE MUKULU

5. Yesu baadi mwambe naminyi pabitale kukita kikyebe ky’eshimba dy’Efile Mukulu?

⁵ Yesu bakwile’shi twi balombeene kutundula baaba abalangwila Efile Mukulu mu kipaso kibuwa. Atwibatundula nsaa y’atutaluula byabalambukisha na byabakitshi. Yesu bambile’shi: “Ku bikitshino byaabo nkwanukeebatundwila.” akupu akumbasha’shi: “Mutshi ooso wibuwa autuushaa bikuba bibuwa.” (Mateo 7:16, 17) Bino t’abipatuula’shi baaba abalangwila Efile Mukulu mbapwidikye nya. Anka, bafubi b’Efile Mukulu misusa yooso abetatshishaa bwa kukita bibuwa. Binobino tubandengye kutala myanda ayitukwasha bwa kutundula baaba abalangwila Efile Mukulu mu kipaso kibuwa.

6, 7. Twi kutundula baaba abalangwila Efile Mukulu mu kipaso kibuwa naminyi?

⁶ Abalangwila muyiile abyamba Bible. Bible akula’shi: “Kifundwe kyoso nkiyokyelwe kwi Efile Mukulu na nkipwandikiile bwa kulambukisha, bwa kukuminisha, bwa kulumbuula, bwa kuludika mu kululama, bwashi muntw’Efile Mukulu akumbane na akumbanyiniine bwa mufubo ooso wibuwa”. (2 Timote 3:16, 17, Kilombeeno kipya 2014) Mpoolo mutumibwa baadi mufundjile beena Kidishitu bino: “Pabaanudi batambule Eyi dy’Efile Mukulu dibaatudi beenulambukishe, nubaadi beedipokyeele, ta mbu eyi dya bantu, kadi anka bu byadidi biinyibiinyi Eyi dy’Efile Mukulu.” (1 Beena-Tesalonika 2:13) Balangwidi ba binyibinyi abalangwila muyiile abyamba Eyi dy’Efile Mukulu, Bible. T’abalangwilaa muyiile binangu bya bantu, bipikwa sunga kingi kintu kyooso nya.

⁷ Myanda yooso ibaabadi balongyeshe kwi Yesu ibaadi ayitukila nka Mwiyi dy’Efile Mukulu. (Badika Yowano 17:17.) Baadi atemuna Bifundwe misusa yooso. (Mateo 4:4, 7, 10) Balangwidi ba binyibinyi b’Efile Mukulu abalondaa kileshesho kya Yesu na abataa myanda yooso y’abalongyesha nka mu Bible.

8. Bwakinyi balangwidi ba binyibinyi abalangwilaa muyiile abyamba Bible? Kileshesho kya Yesu akitulongyesha kinyi?

⁸ Abalangwilaa nka penda Yehowa. Mukanda wa Misambo 83:18 awamba’shi: “Bawukye’shi eshina dyoobe mbuu Yehowa, obe buupenka, Sha-kwiyilu kula pa nsenga ishima!” Yesu baadi akyebe’shi bantu baukye Efile Mukulu a binyibinyi kalolo na baadi mulongyeshe bantu eshina dy’Efile Mukulu. (Badika Yowano 17:6.) Yesu bakwile bino: “Yehowa Efile Mukulu oobe, ngi akulangwila, dingi nnaye buupenka oody’a kufubila.” (Mateo 4:10) Byabya, bafubi b’Efile Mukulu abalondaa kileshesho kya Yesu. Abalangwilaa nka penda Yehowa, kutemuna eshina dyaye, kwidilongyesha bangi na kwibalungula myanda yaketukitshina.

9, 10. Yesu baadi mwitulongyeshe kinyi pabitale kulangwila Yehowa?

⁹ Abalesha bantu kifulo kya binyibinyi. Yesu baadi mulongyeshe balondji baye bwa kwifulena munkatshi mwabo. (Badika Yowano 13:35.) Sunga twekala batuukile mbalo kinyi, be na kipikwa ki naminyi, sunga ba mpeta sunga balanda. Kifulo kya bwina muntu abitungu kitubungye bu bana na bana. (Beena-Kolose 3:14) Byabya, t’atukumanga kutwelakana mu ngoshi bwa kwipa bantu nya. Bible akula’shi: “Bino nyi abilesha patôka kwilekêna kwa bana b’Efile Mukulu na bana ba kafilefile: Yawa êse shakitâ bilulame sunga kufula mwina kukumîna n’ê [mukwabo, NWT] kifulo ta mwana a Efile Mukulu ooo.” Na akumbasha’shi: “Ta twibapwandjikîle twekala bu Kaina, ooo. Ê bádi muntu a yawa mubi, byabya bayipayile mwin’ê.”​—1 Yowano 3:10-12; 4:20, 21, EEM.

¹⁰ P’atufubu na nsaa yetu, bukome na bintu byetu bwa kwikwashena na kwinyingishena, (Beena-Ebelu 10:24, 25) ‘Atukitshina bantu booso myanda ibuwa.’​—Beena-Ngalatea 6:10.

11. Mushindo kinyi watwileshena kifulo kya bana na bana?

¹¹ Abakookyela Yesu mwanda nyi Eshinda dya kw’Efile Mukulu. Bible amba’shi: “Takwi kipandjilo mu mungi muntu; mwanda’nyi takwi dingi eshina muushi mw’eulu, dipeebwe munkatshi mwa bantu dilombeene twakapandjila kwadidi.” (Bikitshino 4:12, Kilombeeno kipya 2014) Mu shapitre a 5 a uno mukanda, twikeele balongye’shi Yehowa batumine Yesu bwa kutuusha muwa waye bu nkuulo bwa bantu basha kukookyela. (Mateo 20:28) Yehowa mmusangule Yesu bu Nfumu bwa kukunkusha nsenga ishima. Nyi bwakinyi, Bible etulungula’shi abitungu tukookyele Yesu su atukyebe kupeta muwa wa ikalaika.​—Badika Yowano 3:36.

12. Bwakinyi atukumina’shi Yesu nyi eshinda dya kw’Efile Mukulu?

¹² T’abatwelakanaa mu myanda ya politike. Yesu tabaadi atwelakana mu myanda ya politike nya. Nsaa ibaabadi bamufishe ku tumilaadi twa Pilato mukunkushi a bena Looma, bamulungwile’shi: “Bufumu bwande ta mbwa pano pa nsenga ooo.” (Badika Yowano 18:36, EEM.) Nka bu Yesu, twi balamate ku Bufumu Bw’Efile Mukulu bwa mwiyilu. Ngi bwakinyi, tatwi bya kutwelakana mu myanda ya politike nya sunga twekala bashalele mbalo kinyi. Anka, Bible etulanga bwa kukookyela “banfumu bee na matalwa,” bakwete kukunkusha. (Beena-Looma 13:1) Mbalo yooso yatudi, tukookyele miiya y’eumbo. Kadi, su mwiya w’eumbo ubekutwena na mwiya w’Efile Mukulu, atwambula batumibwa abakwile’shi: “Bii buwa kukookyela Efile mukulu pee kukookyela bantu.”​—Bikitshino 5:29; Maako 12:17.

13. Bwakinyi tatwi bya kutwelakana mu myanda ya politike?

¹³ Abeuku’shi nka Bufumu bw’Efile Mukulu ndjo abupudisha myanda ya pa nsenga. Yesu bakwile’shi, “mukandu wi buwa wa Bufumu” aukalungulwa pa nsenga yooso. (Badika Mateo 24:14, Kilombeeno kipya 2014.) Takwi mbulamatadi pa nsenga mulombeene kukita byabya abiketukitshina Bufumu bw’Efile Mukulu nya. (Misambo 146:3) Yesu baadi mwitulongyeshe bwa kuteka, aamba’shi: “Bufumu bwobe bufikye. Kyookyebe kikitshikye pa nsenga, mumune na mwiyilu.” (Mateo 6:10) Bible etulungula’shi Bufumu bw’Efile Mukulu abukabutula mbulamatadi yooso ya bantu na “abukashaala looso.”​—Ndanyele 2:44.

14. Nkinyi kyatulungula bantu pabitale Bufumu bw’Efile Mukulu?

¹⁴ Kunyima kwa kutaluula ino myanda, banda kwiyipusha’shi: ‘Mbananyi abalongyeshaa nka abyamba Bible? Mbananyi abalungula bangi eshina dy’Efile Mukulu? Mbananyi abalesha bangi kifulo kya binyibinyi na abakumiina’shi Efile Mukulu batumine Yesu bwa kwitupasha? Mbananyi bash’abatwelakanaa mu myanda ya politike? Mbananyi abalongyesha’shi nka Bufumu bw’Efile Mukulu nyi bulombeene kupudisha myanda ya pa nsenga?’ Nka penda Batemwe ba Yehowa.​—Yeeshaya 43:10-12.

KYODI MULOMBEENE KUKITA

15. Su atukyebe’shi Efile Mukulu akumiine lulangwilo lwetu, nkinyi akitungu tukite?

¹⁵ Kwamba penda shi, ‘nemukumiine mwi Efile Mukulu’ ta nkukumbane nya. N’anka ba demo abakuminaa’shi Efile Mukulu e kwanka, anka t’abamukookyelaa nya. (Shake 2:19) Su atukyebe’shi Efile Mukulu akumiine lulangwilo lwetu, t’abitungu tukumiine penda shi e kwanka nya, anka, abitungu tukite kyakya ky’etutekye.

16. Bwakinyi abitungu tutuukye mu kipwilo kya madimi?

¹⁶ Bwashi Efile Mukulu akumiine lulangwilo lwetu, abitungu tutuukye mu kipwilo kya madimi. Mutemuki Yeeshaya bafundile’shi: “Katukaayi munkatshi mwa baaba bantu . . . tanukumanga kintu kii butete su nkimune.” (Yeeshaya 52:11; 2 Beena-Kodinda 6:17) Ngi bwakinyi, abitungu tukatushe kintu kyooso ki mu kipwano na lulangwilo lwa madimi.

17, 18. “Babilone mukata” nkinyi, na bwakinyi abitungu kwimutuuka bukidibukidi?

¹⁷ Kipwilo kya madimi akilesha kinyi? Nyi kipwilo kyooso akitulongyesha bwa kulangwila Efile Mukulu mu kipaso kiituukeene n’Eyi dyaye. Bible ayitanyina bipwilo byooso bya madimi bu “Babilone mukata.” (Kibafumbwilwe 17:5) Bwakinyi? Kunyima kwa Mpeshi a kabutu a mu mafuku a Nowa, ndambukisho ibungi ya madimi ibatuukile mu kibundji kya Babilone. Yaaya ndambukisho ya madimi nkupalakana pa nsenga yooso. Kileshesho; beena Babilone abaadi abalangwila b’efile basatu. Lelo uno, bipwilo bibungi abilambukisha’shi Efile Mukulu e Mbasatu. Anka Bible alongyesha’shi, kwi Efile Mukulu a binyibinyi penda umune, Yehowa, na’shi Yesu nyi Mwan’aye. (Yowano 17:3) Na dingi, beena Babilone abaadi abakumiina’shi muntu e na kipindji kya mbidi akishaalaa kwanka su baafu na kilombeene nkakyenga losoo mu inferno. Bino ta mbya binyibinyi nya.​—Tala kikumbashilo 14, 17, na 18.

¹⁸ Efile Mukulu mmulee’shi abutula bipwilo byooso bya madimi binobino. (Kibafumbwilwe 18:8) Bopusha bwakinyi abitungu kutuuka mu kipwilo kya madimi bukidibukidi? Yehowa Efile Mukulu akumiina’shi otuukye kushii kunyengakana.​—Kibafumbwilwe 18:4.

19. Nsaa yuata kitshibilo kya kufubila Yehowa, mmushindo kinyi wakakukwasha?

¹⁹ Nsaa yuata kitshibilo kya kutuuka mu kipwilo kya madimi bwa kufubila Yehowa, bangi ba kuuku na beena kifuko noobe ta mbalombeene kupusha bwakinyi bwata kyakya kitshibilo nya, na mbalombeene kubanga kukukyengyesha. Anka, Yehowa t’akakusumbusheena nya. Wekala munkatshi mwa kifuko kikata ki mu nsenga ishima mwi bantu midiyo abakakulesha kifulo kya binyibinyi, na okapete lukulupilo lwa kushaala mu ndumbulwilo mupya a Efile Mukulu bwa losoo. (Maako 10:28-30) Pangi, bangi ba kuuku boobe na beena kifuko abapele kitshibilo kyoobe kya kufubila Yehowa mbalombeene kukumiina kulonga Bible su nkunyima a mafuku.

20. Bwakinyi bi na muulo bwa kulangwila Efile Mukulu mu kipaso kibuwa?

²⁰ Efile Mukulu akabutula bantu booso babi binobino, na Bufumu bwaye bumunane pa nsenga yooso. (2 Mpyeele 3:9, 13) Kyakya akikekala kipungo kibuwa bukile! Bantu booso abakalangwila Yehowa mu kipaso kyakumiina. Byabya bi na muulo bwashi onyingiile kubanga binobino na olangwile Efile Mukulu mu kipaso kibuwa.