Efile Mukulu bapanga mulume na mukashi ba kumpala

Yehowa bakitshine efuba dibaadi n’eshina bu lupango lua Edene. Mu lupango mubaadi muule bilongo, bikunuanga, na nyema. Akupu Efile Mukulu nkupanga Adama muntu a kumpala ku lufufi, aye nkumupuila muwa mu minongi ya mpembe. Ouku kibaadi kikitshikie su? Muntu nkufika kipangua ki na muwa! Yehowa nkupa Adama bulami bua lualua lupango, amupa nyi matalua a kuudika nyema yooso mashina.

Yehowa nkupa Adama muiya wi na muulo ukata. Amulungula shi: ‘We kudia bikuba bia mutshi oso wi muifuba m’okumiina, anka tokumanga kudia bikuba biao, efuku diokebidi okafu.’

Akupu, Yehowa nkuamba’shi: ‘Abikiebe mpe Adama bukuashi bumulombene.’ Yehowa nkuladisha Adama mu tulo tui bukopo, na aye nkuata lumune lua ku mbafu yaye, kumupangila mukashi. Eshina diaye baadi bu Eva. Adama na Eva nyi abafikile kifuko kia kumpala. Adama bapushiishe naminyi bua mukashi aaye mupia? Adama baadi na muloo ukata aye nkuamba’shi: ‘Tala kibakitshi Yehowa kukiila ku lubafu luande! Akupu’shi! Uno muntu munyifuane.’

Yehowa balunguile Adama na Eva buabadia kutanda bana na kuusha nsenga. Baadi akumiina’shi bekale na muloo wa kufuba pamune bua kuikasha nsenga bu mpaladiiso, sunga bu lupango luibuwa, nka bu bibaadi lupango lua Edene. Kadi ta bibaadi bilombane biabia nya. Buakinyi? Atukalongo ingi mianda mu shapitre alondo.