Muikeyilu a Yehowa bakaluila Ezekiya

Bufumu bua bena Asiri bubapuile kumuna bufumu bua bisamba ekumi bua bena Isalele. Senakeribe nfumu a bena Asiri baadi akimbi kumuna bufumu bua bisamba bibidi bia Yunda. Babangile kukuata bibundi bia Yunda kimune ku kimune. Kadi Yelusalema nyi kibundi kibaadi mukumiine bikata. Anka Senakeribe tabaukanga’shi Yehowa kuete kukaluila Yelusalema.

Ezekiya nfumu a Yunda nkufuta Senakeribe nfualanga ibungi buadia kuleka penda Yelusalema. Sunga biekala’shi Senakeribe batshile nfualanga, baadi’nka atumu basalayi baaye bua kukuata Yelusalema. Bena kibundi ababangile kupusha moo, muanda bena Asiri abaadi abefubuila pepi nabo. Ezekiya nkuibalungula’shi: ‘Tanutshinanga. Bena Asiri be bukome, anka Yehowa eetuikasha na bukome buibakile.’

Senakeribe nkutuma Rabishake bu mukiendi waye ku Yelusalema, bua kusabuula muilo. Rabishake nkuimana paasha pa kibundi aye nkubanga kuela musaase’shi: ‘Yehowa ta mulombene kuinukuasha. Tanulekanga Ezekiya buadia kuinudimba. Takui efile e kuinupaasha kuatudi nya.’

Ezekiya bayipuishe Yehowa kia kukita. Yehowa nkumualula’shi: ‘Tanutshinanga abiamba Rabishake. Muanda Senakeribe t’aata Yelusalema nya.’ Akupu Ezekiya bapetele mikanda ayifiki kui Senakeribe. Ibaadi ayakula’shi: ‘Katuka ku bufumu. Yehowa t’akupaasha nya.’ Ezekiya belele luteko’shi: ‘Yehowa, etupaashe namu bua’shi bantu boso baukie’shi nka pend’obe nyi Efile Mukulu a binyibinyi.’ Yehowa nkumulungula’shi: ‘Nfumu a bena Asiri t’atuele mu Yelusalema nya. Nakaluila lupata luande.’

Senakeribe bamuene’shi akiebe kuata Yelusalema. Kadi mu bufuku bumune, Yehowa batumine muikeyilu mbalo ibaadi basalayi paasha pa lupata. Yawa muikeyilu nkuipaa basalayi 185 000! Nfumu Senakeribe nkushimisha basalayi baaye. Tabaadi na kia kukita nya, aye nkualukiila ku nshibo na buufu. Yehowa nkukaluila Ezekiya na Yelusalema nka bu bibaadi muibilee. Su bodia kuikala mu Yelusalema aa mafuku, bodia kukulupila mui Yehowa su?