Muisambo wa pa Muengie

Kunyima ku’aye kusangula batumiibua 12, Yesu bayikile ku muengie, enda mbalo ibaadi kibumbu kia bantu kibungie. Abaadi bafikie ku Ngalileya, ku Yudeya, ku Tire, ku Sidone ku Siri na ku ingi mpese ya Yordane. Abafikile na bantu abaadi abakiengie na mikumbo, na bangi abaadi na bikudi bibi. Yesu baadi muibapaashe boso. Akupu, bashalele mu buipi bua muengie, aye nkubanga kuakula. Baadi mupatuule kiatudi balombene kukita su atukimbi kuikala ba kuuku b’Efile Mukulu. Abitungu tuikale bashinkamishe’shi tui na lukalo na Yehowa na kulonga biatudia kumufula. Kadi ta tui balombene kufula Efile Mukulu su ta tui bafule bangi bantu nya. Abitungu tuikale na kalolo kui bantu boso, mpa nka na b’eshikuanyi n’etu.

Yesu bakuile’shi: ‘Tue mulombene penda kufula ba kuuku bobe nya. Abitungu dingi kufula b’eshikuanyi nobe na kufuila bantu lusa alukatukila muishimba. Su muntu bakufitshisha munda, enda kuadi musango umune okamutekie lusa. Kitshina bantu biabia bi’okumina’shi bakukitshine.’

Yesu bapeele dingi bantu elango dibuwa pabitale bintu bia ku mbidi. Bakuile’shi: ‘Bi na muulo ukata kuikala kuuku a Yehowa pe kuikala na makuta ebungi. Ngifi e kuiba makuta obe, kadi ta kui muntu mulombene kuiba bukuuku bobe na Yehowa nya. Tanuikalakashanga bua kia kudia, kia kutoma sunga kia kufuala. Talayi toonyi. Efile Mukulu ashinkamishaa kalolo’shi tui na bia kudia bilombane. Kuikalakasha takui bia kutentekiela muntu efuku sunga ndimune nya. Shingulayi’shi Yehowa euku kioso kiatudi nakio lukalo.’

Kibumbu kia bantu ta kibaadi kibande kupusha dingi ungi muntu aakula bu Yesu nya. Bakata babo ba bipuilo tababaadi abebalongiesha bino bioso bintu. Buakinyi Yesu baadi mulongieshi mukata? Muanda, bioso bibaadi alongiesha bibaadi abifiki kui Yehowa.