Mukanda wa Kasaka ka Bakunkushi bakulu

Bakuetu ba kifulo:

Bu biatudi balanguidi ba Yehowa, tui bafule Bible Eyi diaye. Atushinkamisha’shi kuete kuitulungula mianda ya binyibinyi, kutuusha bukunkushi buibuwa mu nshalelo na kuitupa bishinkamiisho abitukumu ku mashimba abilesha kifulo kia Yehowa bua bantu. (Misambo 119:105; Luka 1:3; 1 Yowano 4:19) Tui na lukalo lukata lua kukuasha bangi buabadia kulonga bia binyibinyi bi na muulo bi mu Eyi di’Efile Mukulu. Nyi buakinyi tui na muloo ukata wa kutuusha uno mukanda wa Malongiesha atulongiela ku miisambo ya mu Bible. Banda kuitutadiila tukulungule bipeela pabitale uno mukanda.

Tui balumbuule kipindi kikata kia uno mukanda bua kukuasha bana. Anka, tui kuiufubisha dingi bua kukuasha bantu bakulu abakumiina kulonga bibungi pabitale Bible. Na bu biikale Bible bu mukanda wa muntu oso, oso a kuatudi akapete bukuashi pa kutaluulanga malongiesha e muanka e kuitukuasha bua kuikala na muloo wa binyibinyi.

Pa kufubisha mianda ya mu Bible, uno mukanda awitulondela mianda ya kifuko kia bantu kubanga ku kupanga kua bintu. Tui betatshishe bikata bua kuleesha mianda ya mu Bible mu kipaso kibofule na akipushika kalolo na ilondene muyile bibayidi ikitshikie.

Biabia uno mukanda t’aulondo nka penda mianda ya mu Bible bisumanga nya. Nfundilo na bifuatulo bi muanka mbilumbulue mu kipaso kia kuikasha mianda bu ayikitshika na kumuesha binangu bia bantu babesambila.

Uno mukanda awitukuasha bua kuuka kipaso kiikale Bible esamba pabitale bantu babaadi bakokiele Yehowa na bashibaadi bamukokiele. Awitukuasha dingi bua kupeta malongiesha ku bileshesho biabo. (Bena Loma 15:4; 1 Bena Kodinda 10:6) Uno mukanda nguabulue mu bipindi 14. Ku mbangilo kua kipindi kioso kui mayi a mu kikoso e na malongiesha atudia kulonga.

Su we nambutuile, we kubadika dilongiesha na muan’oobe na kuisambila bifuatulo bi muanka. Akupu, nui kubadika ma verse a mu Bible muabadi baate diadia dilongiesha. Kuasha muan’oobe bua kulesha kuipushena kui mu bi’abadika mu Bible na dilongiesha di mu mukanda. Kukita biabia kui kukuasha dingi muntu mukulu bua kuikala na mueneno mulombane a mianda ya mu Bible.

Atukulupila’shi uno mukanda aukuasha boso ba sha mashimba alulame bakulu na bakinga bua kulonga Eyi di’Efile Mukulu na kufubisha malongiesha aadio mu nshalelo aabo. Su abakitshi biabia, n’abo namu mbalombeene kumulanguila bu bantu ba mu kifuko kiaye kiadi mufule.