Nsongwalume, nukwete kwitatshisha bwa kupeta mashito mu kakongye su?
1. Nsaa kinyi ilombeene nsongwalume kubanga kutumikila mayi e mu 1 Timotee 3:1?
1 ‘Su muntu akimbi kwikala bu mukulu sunga mufubi a midimo, nyi mmufubo wibuwa wadi nawo lukalo.’ (1 Tim. 3:1) Ano mayi afundibwe ku bukome bwa kikudi aanyingisha bakwetu balume bwabadya kwitatshisha bwa kupeta mashito mu kakongye. Abitungu kwikala muntu mukulu bwa kwibikita su? Nya, bibuwa kubanga kukimba mashito mu kakongye pokii mukinga. Mu wawa mushindo we mulombeene kulongyeshibwa na kulesha shi bopu kulombana bwa kwikala mufubi a mudimo pokulu. (1 Tim. 3:10) Su we nsongwalume mubatshishibwe, mushindo kinyi oshidi mulombeene kukimba mashito mu kakongye?
2. Mushindo kinyi watudi balombeene kulesha shi atukumiina kwisumina ingi miloo bwa kukwasha bangi?
2 Kukumina kwisumina ingi miloo: Tentekyesha shi nyi mmufubo wibuwa okwete kukimba, ta mmwasu kampanda nya. Byabya, ikala na lukalo lwa kukwasha bakwetu balume na bakashi. Ungi mushindo wa kukita byabya nyi nkunangushena ku kileshesho kibuwa kya Yesu. (Mat. 20:28; Yo. 4:6, 7; 13:4, 5) Teka Yehowa bwashi akukwashe bwashi wekale wetatshisha bwa buwa bwa bangi. (1 Kod. 10:24) We mulombeene kukwasha baaba batabadi banunu na basha mikumbo su? Okwete kwipana bwa kudima lubishi, kukombanga, sunga bwa kulama mankenda a Nshibo ya Bufumu su? We mulombeene kwikala welumbuula bwa kukitanga miisambo mu Kalasa ka mudimo wa teokrasi su muntu abadi beupe tepanka su? Okyebe kumona shi kwipana bwa kukwasha bangi akukyebe nkupa muloo.—Bik. 20:35.
3. Kunyinga mu kikudi kwi na muulo kinyi, na mushindo kinyi watudi balombeene kunyinga mu kikudi?
3 Kunyinga mu kikudi: Kwikala mufubi munyingye mu kikudi kwi na muulo kukila kwikala na kipeedi sunga ngobesha kampanda. Muntu munyingye mu kikudi amonaa myanda mushindo awiyimonaa Yehowa na Yesu. (1 Kod. 2:15, 16) Aleshaa ‘kikuba kya kikudi.’ (Ga. 5:22, 23) Mmulambukishi a kishima mutuule myanda ya Bufumu pa mbalo ya kumpala. (Mat. 6:33) We mulombeene kutamisha ngikashi ya mu kikudi na kwikala na kiubishi kya kwilongyela bupenka. Bino abilesha kubadika Bible efuku dyooso, kubadika nimero ooso a Kitenta kya Mulami na Réveillez-vous!, kwilumbula na kutwelanga mu bisangilo byooso bya kakongye. (Mis. 1:1, 2; Eb. 10:24, 25) Pabaadi anyingisha nsongwalume Timotee bwashi ende kumpala mu kikudi, Mpoolo bafundile shi: “Dimuka . . . na bulambukishi boobe.” (1 Tim. 4:15, 16) Byabya fuba ngofu mu miisambo yabakupa mu Kalasa ka mudimo wa teokrasi. Ikala welumbula na kwenda mu mudimo wa bulungudi nsaa na nsaa. Ata mpango ya mu kikudi na wetatshishe bwa kwiyilombasha; bu kileshesho, kwikala mbala-mashinda, kwenda mu kufuba ku Betele, sunga kwenda ku Kalasa ka Bible bwa balume bashi bayibakile. Kukula mu kikudi akukyebe nkukwasha bwa ‘kusuuka ndàkalaka ya ku bunsongwa.’—2 Tim. 2:22.
4. Kwikala muntu a kukulupila na sha bululame kwi na muulo kinyi?
4 Kwikala muntu a kukulupila na sha bululame: Bu bi baaba bakwetu bababasangwile bwa kwabilanga beena Kidishitu ba mu mafuku a batumibwa byakudya, babaadi bantu ba “mwikeelo wibuwa,” bantu ba kukulupila na basha bululame, batumibwa tababadi abekalakasha bwa kuuka mushindo ubaadi aukitshika mudimo. Bino bibaadi bikwashe batumibwa bwa kukita ingi mifubo i na muulo. (Bik. 6:1-4) Byabya su abakupa mufubo mu kakongye, eukite bibuwa na bukome boobe booso. Londa kileshesho kya Nowa bakitshine nka byabya bibamufundjile Efile Mukulu bwa kwibaka bwato. (Kib. 6:22) Yehowa mufule bululame na dingi muntu sha bululame alesha shi munyingye mu kikudi.—1 Kod. 4:2; Tala kashibo ka “Bibuwa kulongyesha bangi.”
5. Bwakinyi abitungu shi basongwalume bakimbe kupeta mashito mu kakongye?
5 Anka bu bibabadi batemukye, Yehowa kwete kukita bwashi mudimo wa kubunga bantu wende bukidibukidi. (Yesh. 60:22) Ku kipwa kyooso bantu kukila 250000 bakwete kubatshishibwa. Na bano bantu bapya bebungi bakwete kutwela mu bya binyibinyi, kwi lukalo lukata lwa bantu banyingye mu kikudi bwa kwata mashito mu kakongye. Ano mafuku, kukila kala kooso, kwi mudimo ukata mu mufubo wa Yehowa. (1 Kod. 15:58) Nsongwalume nukwete kwitatshisha bwa kupeta mashito mu kakongye su? Su mbyabya, nukwete kukimba mufubo wibuwa bwi kasha!
[Kifwatulo kituukye mwisaki 2]
Na bano bantu bapya bebungi bakwete kutwela mu bya binyibinyi, kwi lukalo lukata lwa bantu banyingye mu kikudi bwa kwata mashito mu kakongye
[Kashibo ke mwisaki 3]
Bibuwa kulongyesha bangi
Ba nsongwalume abapete bukwashi bukata pa bebapa midimo kwi bakulu na kwibalongyesha bya kwiyikita. Kunyima kwa bisangilo, mukunkushi a kifunda baadi kii mwimane ku estrade bwa kunyingisha ungi mulungudi. Aye nkumona ungi nsongwalume mushaale pepi, na nkumwipusha su e na lukalo lwa kwisamba naaye. Nsongwalume nkumwalula shi mbamupe mudimo wa kukumuna ku estrade kunyima kwa bisangilo. Baledi baaye abaadi pepi na kwenda, kadi aye tabaadi mukumiine kwenda kumpala kwa kulombasha mufubo waaye nya. Mukunkushi a kifunda bakatukile ku estrade na muloo ooso. Bakwile shi: “Mu kaka kakongye bakulu abadi abalongyesha bansongwalume na kwibapa mifubo mu kakongye. Bu kipeta, musango ooso wanadi nende mu kutala kaka kakongye bibaadi bukopo bwashi bakutwe kutuusha nsongwalume bu mufubi a midimo.”