Myaluulo ku nkonko yenu

◼ Mukwetu mukashi mmulombeene kufwala kitambala nsaa yalongo na muntu Bible bwimane su e na mukwetu mulume su?

Su mukwetu mukashi alongo na muntu alongaa naye Bible misango yooso, na mukwetu mulume e panka, mukwetu mukashi mmulombeene kufwala kitambala. (1 Kod. 11:3-10) Kitenta kya Mulami kya 15/07/2002 esaki 27 mu Fwalanse, akileesha bino: “Uno nyi programe a kulongyesha mulumbulwe, atungu bwashi uno alongaa na muntu akunkushe. Mu yaaya nsaa, kulonga kwi nka bu kulongyesha mu kakongye sunga byekala shi kwete kulongyesha ingi mbalo. Su mukwetu mukashi alongo na muntu nsaa yabadi na mukwetu mulume, abitungu apuute ku mutwe kalolo.” Byabikala kulonga na muntu Bible bashaale mu nshibo, kulonga naye bwimane, sunga mu ingi mishindo, miiya inka i mumune.

Ingi misusa, su mukwetu mukashi taabandjile kwata programe ebuwa na muntu alongaa naye Bible bwimane, yawa mukwetu mukashi tamulombeene kupuuta ku mutwe nsaa yaadi na mulungudi a mukandu wibuwa mulume nya, sunga shi su kwi mpàngo ya kwalukiila mu nkamutala bwa kumuleesha bya kulongaa Bible na bantu sunga kutaluula myanda i mu umune wa ku mikanda ayitungu kulonga na muntu Bible. Byabya muntu abakwete kulonga naye Bible bwimane ababata naye programe ebuwa na amweka bu ende kumpala, ku bukwashi bwa misusa bungi yakwete kwalukiila mu nkamumona, balungudi ba mukandu wibuwa mbalombeene kutaluula myanda kampanda na kunangushena bwa kutundula nsaa ayitungu kubanga kupuuta ku mutwe.