Miisambo ilombeene kwitukwasha mu mudimo wetu wa bulungudi

1. Miisambo i na mutwe wa mwanda awamba shi “Conversation avec un Témoin de Jéhovah” i na bipatshila kinyi bibidi?

¹ Misusa yooso, mu Kitenta kya Mulami kya bantu booso mukwete kutuuka miisambo i na mutwe wa mwanda awamba shi “Conversation avec un Témoin de Jéhovah.” Ino miisambo i na bipatshila bibidi—bwa kutuusha malongyesha a mu Bible mu mushindo wibuwa ngofu na kwitulesha mushindo watudi balombeene kunangushena pa ingi myanda na kanemo. (1 Mp. 3:15) Mushindo kinyi watudi balombeene kufuba kalolo na ino miisambo?

2. Mushindo kinyi watudi balombeene kufuba na ino miisambo mu mudimo wetu wa bulungudi?

² Fuba nayo mu mudimo wa bulungudi: We mulombeene kulama ingi jurnale ya Kitenta kya Mulami ii na ino miisambo. Nsaa i sha nshibo, muntu atwisambaa naye, sunga muntu atulongaa naye Bible akyebe kupela kwituteemesha sunga ele lukonko pa myanda yabadi bapwe kwisambila mu yaaya miisambo, mupe aaye jurnale umune e na wawa mwisambo na nubangye kwisambila pa wawa mwanda. Su twe na yawa jurnale abadi batuushe na kumwabila bantu, pangi we mulombeene kumwata ku Internet mu jw.org.

3. Mushindo kinyi watudi balombeene kwisamba pabitale umune wa ku ino miisambo na sha nshibo?

³ Mushindo kinyi watudi balombeene kwisamba na muntu pabitale ino miisambo? Bangi abatekaa muntu bwa kubadika mayi a ungi muntu n’eyi di bukopo, abo namu ababadika mayi a Temwe. Uno mwisambo wabadi ba emprime wi buwa bukile mwanda aukwasha muntu bwa kutaluula myanda yatukumiinaa mu mushindo ushii ulombeene kumukalakasha.—Miy. 32:2.

4. Mushindo kinyi watudi balombeene kufuba na ino miisambo bwatudya kwilongyesha atwe banabeene?

⁴ Elambukishe obe nabeene mpa na bangi: Nsaa yobadika yaaya miisambo, funda maverse, bileshesho, na mushindo wabipatuula. Tolubanga ngakwilo abadi bemufunde. Akupu otompe kukita kileshesho ki byabya mu mudimo obe wa bulungudi. (Mye. 1:5; 9:9) Ungi mukwetu mukashi aleesha bino: “Kubadika kwa ino miisambo kwi nka bu kulonga kwi mwinami mbala-mashinda mupwidikye—aye mubadiile kuuka myanda ibuwa kwakula!”

5. Mushindo kinyi watudi balombeene kukwasha balongi beetu ba Bible bwa kwilumbuula bwa mudimo wa bulungudi?

⁵ We mulombeene kufuba na kyakya kileshesho kya mayi a kulonda bwa kukwasha balongi boobe ba Bible bwa kwilumbuula mu mudimo wa bulungudi. Badikayi yaaya myanda booso pamune, teka mulongi bwashi aate mbalo ya mulungudi a mukandu wibuwa. Mu uno mushindo, balongi ba Bible mbalombeene kuleesha bi myanda yabakuminaa na kanemo kooso. (Kol. 4:6) Binyibinyi, ino miisambo nyi ngumune wa ku mishindo ibungi ikwete Yehowa kwitukwasha bwa ‘kukumbasha kalolo’ mufubo wetu wa bulungudi.—2 Tim. 4:5.