Tulongamishe mudimo wetu wa bulungudi—Kukwasha mulungudi nobe

Bwakinyi bi na muulo: Yesu baadi auku muulo wi nao kulambukisha bubidi. Byabya, nsaa ibaadi mupalakashe balongi baaye 70 bwashi babadiile na kulungula mukandu wibuwa, baadi mwibatume babidi babidi. (Luk. 10:1) Ungi mulungudi mmulombeene kukwasha mwinaye aadi naye mu bulungudi nsaa y’afumankana na myanda ibukopo sunga bwa kwaluula lukonko lubamwipusha sha-nshibo lwashii na lwaluulo. (Mul. 4:9, 10) Mulombeene kumupa kinangu pabitale mayele auku na ingi nsaa mmulombeene kuleesha yawa afubu naye angi mayele bwadya kwikala mulungudi ebuwa. (Mye. 27:17) Mmulombeene dingi kumunyingisha ku bukwashi bwa miisambo yaaye ayinyingisha y’abesamba nsaa yabende mu kumona ungi muntu.—Fid. 4:8.

Mushindo wa kwibikita:

Teemesha nsaa i mulungudi noobe kwete kulambukisha. (Ja. 1:19) Nsaa y’ababadika verse, londesha nabo pamune mu oobe Bible. Bino abikyebe nkukwasha bwa kwikala na mushindo wa kumukwasha pa kudi lukalo.
Ikala na ngyelelo a binangu ebuwa bwa kuuka su we mulombeene kutwela mu mwisambo na nsaa yoodi mulombeene kwibikita. (Mye. 25:11) Su okwete kushindjikila ungi mulungudi a mukandu wibuwa mu kulonga na balongi baaye ba Bible, abasangala ngofu nsaa ywesamba namu. Byabya, nsaa yanudi mu bulungudi bwa ku nshibo na nshibo, mulungudi noobe mmulombeene kukumiina shi omutadiile akule su nsaa yaaye. Anka, su mwikadikye mulungudi a mukandu wibuwa mupya, sunga shi tashinkamisha byadi mulombeene kwaluula lukonko, sunga ku mwanda ubababuusha bwa kutshiba mwisambo, asangala bikile nsaa y’omukwasha. Kadi, sunga nwekala mu bulungudi bwa ku nshibo na nshibo, kwalukiila mu kutala bantu banwikalanga besambe nabo, sunga mu kulonga na bantu, tokumanga kumutshiba mwisambo, sunga kutwesha ungi mwisambo.
Kwasha mukwenu na kyukilo kyodi nakyo. Su ingi nsaa, we mulombeene kupa mulungudi n’obe mayele alombeene kumukwasha mu mudimo wa bulungudi, tomusuminanga. (Mye. 3:27) Ingi nsaa we mulombeene kubanga na kwakula shi: “Opwandjikisha naminyi pabitale wawa mwanda?” sunga shi: “Ne mulombeene nkulesha ano mayele?” sunga dingi shi: “Ami natompaa kukita bino.” Lamiina bino shi nsaa i bantu booso abakumiina kupeta bukwashi bwa mwanda kampanda, mbalombeene kubofula su okwete nka kutala bilema byabo nsaa yooso.

Ebitompeyi munda mwa wawa mweshi:

Kunyima kwa kufuba mu mudimo wa bulungudi na ungi mulungudi nobe, mulungule mwanda w’esambanga sunga wakitanga ubakukwasha.