Bipwa lukama bya kupalakasha mukandu wa Bufumu!

1. Abaadi batekye mwilo wa Yehowa bwa kukita kinyi takudi bipwa peepi na lukama?

¹ “Talayi Nfumu kwete kumunana! Nwi balungudi baaye. Byabya lungulaayi, lungulaayi, lungulaayi Nfumu na bufumu bwaye.” Na ano mayi a kibobo abakwile Mukwetu Rutherford takudi pepi na bipwa lukama, mwilo wa Yehowa ubaadi ukankamikibwe bwa kupalakasha mukandu wa Bufumu mu ma mbalo ekula mu nsenga ishima. Na byabya ndjo byatudi bakite! Anka bu bena Kidishitu ba kumpala, twi balungule mukandu wibuwa wa Bufumu mu “bipangwa byooso bi kuushi kw’eyilu”. (Kol. 1:23) P’atutala bipwa lukama bibashaale, myanda kinyi yatudi bakite bwa kupalakasha Bufumu bw’Efile Mukulu? Mushindo kinyi watudi balombeene kutungunuka na kwibupalakasha mu ano mafuku atwisesela pepi na bipwa 100 bya kutandjika kwa Bufumu?

2. Mushindo kinyi wi mikanda yeetu ngikwashe bwa kuukisha Bufumu bw’Efile Mukulu?

² Mu mafuku ashale: Munda mwa bipwa lukama, mikanda yetu ngikwashe bwa kuukisha Bufumu bw’Efile Mukulu. Kubanga mu 1939 tubabangile kwitamina jurnale eetu mukata bu Kitenta kya Mulami akilungula Bufumu bwa Yehowa. Uno jurnale esambila nsaa yooso myanda ya Bufumu na ky’abukyebe kulombasha. Jurnale a Réveillez-vous! aleesha myanda ya Bufumu bw’Efile Mukulu bu lukulupilo lumune lwa binyibinyi bwa bantu. Binobino, aa ma jurnale abidi mbealuule na kwiabila mu ma mbalo e kula e na muulo wi kashaa nsenga ishima!​—Bif. 14:6.

3. Ngamo mayele kinyi atudi bafube nawo bwa kupalakasha Bufumu?

³ Mwilo wa Yehowa ngufube na mayele elekeenelekeene bwa kupalakasha Bufumu. Kala, tubaadi atufubu na myotoka i na bikolo, bisaashi, na ma fono a ku masa. Aa mayele abaadi etukwashe bwa kupalakasha mukandu wibuwa wa Bufumu kwi bantu booso pabakudi kukii balungudi ba mukandu wibuwa bapeela. (Mis. 19:4) Mu bipwa bishaale, atwikalanga beele myanda ibungi mu jw.org, yaaya myanda ikwete kupalakasha Bufumu kwi bantu midiyo​—mpa na baaba be mu maumbo abadi bakandjikye mudimo wetu.

4. Mishindo kinyi i pa bwayo yatudi bafube nayo bwa kupalakasha Bufumu?

⁴ Mwilo wa Yehowa gwipaane namu mu mushindo wi pa bwao bwa kupalakasha myanda ya Bufumu. Bu kileshesho, kubanga munkatshi mwa kipwa kya 1990, twi bakite bukopo bwa kukaamisha bungi bwa nsaa mu mudimo wa bulungudi bwa mu ma parke, mu ma mbalo aemenaa myotoka, na mu bisalwe. Mafuku ashaale’a, atwikalanga balumbuule kulungula kwa mukandu wibuwa kwi pabwako mu ma mbalo e bantu bebungi mu misee ikata i mu nsenga ishima. Na dingi, tukongye twi bungi atwikalanga tufube ngofu mu ma mbalo e bantu bebungi e mu ma teritwara aabo; mbafube na tuntu twi na tupombo bwa kutambusha mikanda na tu mesa mu ma mbalo e bantu bebungi. Byabya, bulungudi bwa kunshibo na nshibo ndjo mushindo wetu ukata wa mudimo wetu wa kupalakasha Bufumu.​—Bik. 20:20.

5. Kipwa kya mudimo akifiki akitupa mushindo wa kukita kinyi?

⁵ Mu mafuku aafiki: Bu bitatubanga kipwa kipya kya mudimo mu mweshi wa Kitema, bantu bebungi abakyebe kwata mudimo wa bu ba mbala-mashinda ba myeshi yooso. We mulombeene kwikala umune a kwabadi su? Su ta mbyabya, we mulombeene kwikala mbala-mashinda mukwashi a myeshi ibungi? Bywekala na mushindo wa kufuba bu mbala-mashinda sunga byweukutwa, shinkamisha shi Yehowa akyebe nkwelela mwabi bwa mushindo ooso wetatshisha bwa kukwatshisheena mudimo wa kulungula Bufumu.​—Ma. 3:10.

6. Bwakinyi mweshi w’Ekumi 2014 awikala mweshi wi pabwao?

⁶ Mweshi w’Ekumi 2014 awulombasha kipwa kya 100 kya kutandjika kwa Bufumu. Mbilombane bwashi, Kitenta kya mulami kya bantu booso kya wawa mweshi kyakwile pa bitale Bufumu bw’Efile Mukulu. Bwakinyi tatwi balombeene kwitatshisha bwa kwabila uno jurnale kwi bantu bebungi? Bu byatutala ku mafuku aafiki, tutungunukyeyi na ‘kuukisha mukandu wibuwa wa Bufumu bw’Efile Mukulu’ kwi baaba booso abakumiina kwiupusha.​—Bik. 8:12.