Mushindo upya wibuwa wa kulambukisha mu mambalo e bantu bebungi
1. Mwanda kinyi wabadi bakankamikye tukongye twi na ma mbalo a akidilaa bantu bebungi bwa kukita?
1 Tukongye twi na ma mbalo a atambukilaa bantu bebungi mbetukankamikye bwa kulumbuula bulungudi bwa mu mambalo e bantu bebungi, na kufuba na mesa sunga tuntu twi bu tu ma kabatshi twi na tupombo. Su anufubaa na tuntu twi bu ma kabatshi, mulungudi a mukandu wibuwa umune ekaale mwimane sunga mushaale mu bwipi mwako. Na dingi, balungudi ba mukandu wibuwa babidi bemane ku mesa a mikanda. Baaba babadi basangule bwa kulesha mikanda abitungu betatshishe bwa kwikala basangale, bantu ba bantu, na abetanyina bantu. Su muntu abanga kutala ku mikanda yabadi batuule, umune a ku balungudi ba mukandu wibuwa mulombene kubanga mwisambo naye, pangi mmulombeene kwamba shi: “Tobweyipwishe namu akyamba Bible pa bitale uno mutwe wa mwanda?” Yaya nsaa ungi mulungudi umune sunga babidi mbalombeene kukimba mushindo wa kubanga bulungudi bwa mu mpukapuka.
2. Tuusha kileshesho akilesha muulo wa kulambukisha na mesa a mikanda mu bulungudi bwa mu ma mbalo e bantu bebungi.
2 Uno mushindo wa kukita bulungudi ngukwashe bwa kupeta bantu bebungi ba kulonga nabo Bible. Ungi mulongi mukashi a ku kilongyelo kikata baadi mutompe kukimba Batemwe ba Yehowa, anka tabaadi na mushindo wa kuuka pe Nshibo ya Bufumu nya. Lubingo alulondo bamwene mesa abadi batuule mikanda ku iniversite. Babaadi babangye kulonga naye Bible, na binobino yawa mulongi taadi mulungudi a mukandu wibuwa mubatshishibwe n’aye namu kwete kulungula mu mambalo mwi bantu bebungi.
3. Bangi balungudi abapushaa naminyi pabitale uno mushindo wa bulungudi?
3 Ungi mukwetu mukashi baadi mukite naye uno mushindo wa bulungudi amba shi: “Bangi bantu abaadi abemana pa mesa a mikanda bwa kusangula ma jurnale apya. Bangi kumpala ta babaadi bapushe efuku sunga ndimune kwabesamba bwa Batemwe ba Yehowa. Namono shi na uno mushindo wa bulungudi, twi balombeene kulungula bantu bebungi.” Ungi mukwetu mukashi bakwile bino: “Uno nyi mushindo upya wibuwa wa kulambukisha mwanda bantu abafiki koodi na, sunga ta mbakambe kwikala na lukalo, abeukumiina.”
4. Bwakinyi bi na muulo bwa kutuula mesa a mikanda mu nsaa imunena pa mbalo imune lubingo looso?
4 Mbikile buwa kutulanga mesa a mikanda pa yaya mbalo immune, mafuku amune, na ma nsaa amune lubingo looso. Bu bipeta, bantu abekala na kyubishi kya kutala mesa a mikanda na kunyima kwa mafuku abakaubiila kwela nkonko sunga kuteka mikanda. Kakongye keenu nkalumbuule bulungudi bwa mu ma mbalo e bantu bebungi su? Su mbyabya, pangi we mulombeene kukwatshisheena uno mushindo wa muloo na autuusha bipeta wa “kuukisha Bufumu bw’Efile Mukulu.”—Luk. 9:60.