Tulongamishe mudimo wetu wa bulungudi—Kulongyesha balongi ba Bible bwabadya kwikala na biubishi bi buwa bya kwilongyela

Bwakinyi bi na muulo: Bwashi balongi ba Bible batame mu kikudi, abitungu badishye binangu na mashimba aabo kushi penda na malongyesha akitako a mwiyi dy’Efile Mukulu nya. (Eb. 5:12–6:1) Kwilongyela akutungu kwitatshisha ngofu. Nkutale dingi kutaluula kwilekeena kwi pankatshi pa myanda ipya ibolongo na ya kala na kunangusheena muulo wayidi nayo. (Mye. 2:1-6) Kulonga bwa kukimbuula myanda pa bupenka akukyebe kukwasha balongi bwabadya kwaluula ku nkonko ya mu Bible i mu mikanda yeetu ya beena Kidishitu. Kwitatshisha kwabo bwa kutumikila myanda yabadi bapwe kulonga abibakwasha bwa kukambila nkalakasho y’abafumankana nayo mu nshalelo aabo a bwina Kidishitu.—Luk. 6:47, 48.

Mushindo wa kwibikita:

Shimika kasele pa muulo wi nao kukimba bukwashi bwa Yehowa mu luteko kumpala kwa kulonga kipindji kyooso kyakya.—Yo. 14:26; 1 Kod. 2:10.
Kubanga ku mbangilo, nyingisha mulongi oobe bwadya kwilumbuulanga kumpala kwa kulonga naaye Bible. Muleeshe mu oobe mukanda, omuleeshe mushindo wadya kwela tushonyi nka penda pa myaku sunga pa bishima bii na muulo.
Mulungule bwadya kutuushanga myaluulo mu bishima byaye’ye nabeene. T’abitungu nka penda kwenda naye mu nkonko na myaluulo ayimutakula bwa kubadika penda myaluulo yabadi bafunde mu mukanda nya.
Nyingiisha mulongi oobe bwadya kubadika Eyi dy’Efile Mukulu efuku dyooso. Muleeshe programe a kwibadikila kwa Bible e mu jw.org, na byadi mulombeene kwibikita. Abitungu kwata kitshibilo kya kwikala na kyubishi kya kubadikanga Bible efuku dyooso, kadi kwitatshisha akutuusha efuto.—Mis. 1:2, 3.
Muleeshe byadi mulombeene kupeta myaluulo ku nkonko ya mu Bible pa kufuba na Watchtower Library sunga Watchtower MIKANDA I MU INTERNET. Mukwashe bwadya kulamiina maleeta ashikile a mashina a mikanda y’atufubu nayo mu bisangilo bya kakongye.

Ebitompeyi munda mwa uno mweshi:

Ku nfudiilo kwa kamutwe ka mwanda sunga kwa shapitre, ipusha mulongi oobe a Bible bwadya kwakula mu kikoso bibakatuka mu kulonga. Su twe na mulongi, ebikite obe nabeene pa kutaluula mu kikoso binangu bi mu ma verse a mu Bible sunga mu bikoso bya Kitenta kya Mulami bwa kulongamisha mpushisho oobe a kwibadikila.