“Tambuka mu bya bînyibînyi”

1. Kuakula pabitale mushindo watudi baukie “bya bînyibînyi” akuitukuasha naminyi?

“BOFIKILE mu kutuela mu bia binyibinyi naminyi?” Kushi mpaka, we mupue kualuula ku luno lukonko misuusa i bungi. Luno nyi ndumune lua ku nkonko y’abakambaa nkuipusha kui bena Kidishitu nobe, nsaa y’abakumiina kukuiwuka kalolo. Atukumiinaa kupusha bakuetu balume na bakashi mushindo wabadi bafikie mu kuiwuka Yehowa na kumufula, na atusangeelaa kuibalungula akipushisha bia binyibinyi kuatudi. (Lom. 1:11) Ino yoso miisambo ayitukuasha dingi, bua kunangushena pabitale bukata bua kifulo kiatudi bafule Temue ooso a Yehowa. Tui bafikie dingi mu kuata kitshibilo, kia “kutambuka mu bya bînyibînyi,” na kia kutungunuka na kuikala na nshalelo etutuadila miabi ya Yehowa na kukuminyibua naye.​—3 Yo. 4, EEM.

2. Nkinyi ki’atukesambila mu uno muisambo?

² Mu uno muisambo, atukataluula tungi tubingilo tua buakinyi tui bafule bia binyibinyi. Na dingi atukataluula mushindo watudi balombene kutungunuka na kulesha kifulo kietu, bua kino kia buntu ki buwa. Kushi mpaka, p’atukataluula uno muanda, aukatamisha lutumbu luetu kui Yehowa bua biadi muitukakie mu bia binyibinyi. (Yo. 6:44) Abikanyingisha dingi lukalo luetu lua kulungula bangi bia binyibinyi.

BUAKINYI TUI BAFULE “BYA BÎNYIBÎNYI”?

3. Nkabingilo kinyi ke na muulo ukata ka buakinyi tui bafule bia binyibinyi?

³ Tui bafule bia binyibinyi bua tubingilo tui bungi. Kabingilo ke na muulo ukata, tui bafule Yehowa Efile Mukulu, aye Nsulo a bia binyibinyi. Ku bukuashi bu’Eyi diaye Bible, tui bafikie mu kumuiwuka kushi penda bu Nsha bukome booso na Mupangi a eyilu na nsenga, anka tui bamuiwukie bu Nshetu sha kifulo e muiyilu, etupasukilaa na kifulo kioso. (1 Mp. 5:7) Atuuku’shi Efile Mukulu eetu ‘nsha lusa na kifulo, shyakwatâ nsungu bukidi, muûle ndâ na kifulo ki na lulamato na bînyibînyi.’ (Efi. 34:6, EEM) Yehowa mmufule kululama. (Yesh. 61:8) Abimutapaa kuishimba p’etumono atukiengie, na ekuanka bua kukatusha makienga ooso, pa nsaa yadi mutshibe. (Yel. 29:11) N’atue namu tukuete kutengiela na kinsukunsuku kioso, kino kipungo ki buwa! Tui bafule Yehowa ngofu!

4-5. Buakinyi Mpoolo mutumibua apuandikisha lukulupilo na nyindo?

⁴ Nkangi kabingilo kinyi ka buakinyi tui bafule bia binyibinyi? Bia binyibinyi bikuete kuitutuadila miabi i bungi. Tubande kutala kileshesho kimune. Mu bia binyibinyi bi mu Bible, mui mpaa na lukulupilo lua mafuku aafiki. Bua kulesha muulo wi nao lukulupilo, Mpoolo mutumibua bafundile’shi: “Lukulupilo lwitubiikilwe lwatudi nalo bu nyindo a anyima, mushinkame shasanasaana.” (Eb. 6:19, Kilombeeno Kipya 2014) Anka bi nyindo mmulombene kuimika buato pamune, lukumiino luetu luimeene mu Bible ndulombene kuituimika pepoo, nsaa y’atufumankana na bitompuanga mu nshalelo eetu.

⁵ Mu uno muanda, Mpoolo baadi akuila bena Kidishitu bedibue muimu be na lukulupilo lua kuenda muiyilu. Ano mayi aakuila dingi bena Kidishitu abatengiela kupeta muwa wa ikalayika mu Mpaladiso pa nsenga. (Yo. 3:16) Mu binyibinyi, kulonga pabitale lukulupilo lua muwa wa ikalayika, nkuitupe nshalelo e buwa.

6-7. Kulonga bia binyibinyi pabitale mafuku aafiki nkukuashe Yvonne mushindo kinyi?

⁶ Tubande kutala muanda ubabamuene, kui ungi mukuetu mukashi abetanyina bu Yvonne. Ta mmukule mu bia binyibinyi nya, na pa baadi ki muana mukinga baadi na moo wa lufu. Atentekiesha bishima bibaadi mubadikie, biash’analube mu binangu biaye: “Efuku dioso ta mu dialubingo nya.” Amba’shi: “Bino bishima bibaadi binkutshishue tulo, na nabanga kunangushena bufuku bushima pabitale mafuku aafiki. ‘Mu binyibinyi, bibaadi na bukitshishi bukata mu nshalelo ande,’ naadi neyipusha ‘Buakinyi ne pano pa nsenga?’ Ntshinaadi nakumiina kufua’mi!”

⁷ Kunyima pa baadi ki nsongua, Yvonne baadi muimoneene na ba Temue ba Yehowa. Etulondela’shi: “Nabangile kukumiina’shi ne mulombene kuikala na lukulupilo, lua kupeta muwa wa ikalayika mu Mpaladiso pa nsenga.” Kulonga bia binyibinyi kubaadi kukuashe mukuetu mukashi mushindo kinyi? Alombasha dingi’shi: “Ntshikiankutua’nyi dingi tulo na kuikalakasha pabitale mafuku aafiki sunga lufu.” Anka bu biodi mulombene kuibinangushena, bia binyibinyi bi na muulo ukata kui Yvonne, na mmupete muloo ukata wa kulungula bangi pabitale lukulupilo luaye lua mafuku aafiki.​—1 Tim. 4:16.

8-9. (a) Mu lumune lua ku nkindi ya Yesu, mmushindo kinyi ubaadi yawa muntu muate na muulo bupeta bubapetele? (b) Bia binyibinyi bi na muulo kinyi koodi?

⁸ Mu bia binyibinyi bia mu Bible, mui mpaa na mukandu wa Bufumu bu’Efile Mukulu. Yesu baadi mupuandikishe bia binyibinyi pabitale Bufumu na bupeta. Anka bu biabadi bebileshe mu Mateo 13:44, Yesu bambile’shi: “Bufumu bwa mwiyilu mbwifwaneene na bupeta bufiibwe mwibala, bubabapetele kwi muntu ebufia; na pa mwanda wa muloo ubaadi nao, enda na akaudisha bioso bibaadi nabio, aula diadia efuba, Kilombeeno Kipya 2014.” Lamiina’shi yawa muntu ta baadi akimbi bupeta nya. Anka nsaa ibebumuene, baadi muipaane ngofu bua kuibupeta. Pa muanda wa biabia, baadi mupaane bingi bintu bioso bibaadi nabio. Buakinyi? Baadi auuku muulo wi nao buabua bupeta. Bubaadi na muulo kukila biabia bintu bioso bibaadi mupaane.

⁹ Obe namu opushaa bino pabitale bia binyibinyi su? Kushi mpaka ngi bi’opushaa! Atuuku’shi ta kui kintu su nkimune kiatudi balombene kutusha mu ino nsenga, kiatudia kupuandikisha na muloo w’atupete patufubila Yehowa binobino, na lukulupilo lua muwa wa ikalayika mu mafuku aafiki ku bukunkushi bua Bufumu bu’Efile Mukulu. Kineemo kiatudi nakio kia kuikala mu kipuano kia pa bupenka na Yehowa, nkikile kuipaana kooso kuatudi balombene kukita. Muloo wetu ukata ngua “kumusangasha mbipaso bioso.”​—Kol. 1:10, Kilombeeno Kipya 2014.

10-11. Nkinyi kibaadi kitakule Michael bua kushintuluka bikata mu nshalelo aaye?

¹⁰ Be bungi ba kuatudi, mbesumine miloo i bungi bua kukuminyibua na Yehowa. Bangi mbalekie midimo ikata i na muulo mu ino nsenga. Bangi namu mbapele kuikala ba mpeta. Bangi dingi, mbashintuule nshalelo aabo ooso nsaa ibabalongo pabitale Yehowa. Ngi bibakitshiine Michael. Ta baadi mukudile mu bia binyibinyi nya. Pa baadi ki nsongua, balongiele karate. Amba’shi: “Naadi na kuitatula muanda wa bukome bua mbidi bui bungi. Ingi nsaa naadi nepusha’shi ta kui muntu a kunkambila.” Anka nsaa ibabangile kulonga Bible, Michael baadi mulongie bi mueneno a Yehowa pabitale buntomboshi. (Mis. 11:5) Michael akula pabitale bano ba Temue mulume na mukashi babaadi balongie naye Bible’shi: “Ta babaadi abakula n’ami pabitale kuleka karate; babaadi abatungunuka nka penda na kundongiesha bia binyibinyi bia mu Bible.”

¹¹ Nsaa ibaadi Michael ende na kulonga pabitale Yehowa, kifulo kiaye kibaadi akinyisha kutama bua Yehowa. Kibaadi kikambe kumukuma kuishimba ngofu, ndusa lua Yehowa pabitale bafubi baye. Kunyima kua mafuku, Michael bamuene’shi abitungu kuata kitshibilo kia kushintuula nshalelo aaye. Amba’shi: “Naadi nauuku’shi ntshimulombene kuleka karate,” anka naadi nauuku dingi’shi: “Mbilombene kusankisha Yehowa, na’shi naadi mushinkamishe’shi kumufubila nkukile miloo yoso yandi mulombene kuisumina.” Michael baadi auuku’shi bia binyibinyi bibapete bi na muulo ukata, na lutumbu lubaadi lumutakule buadia kushintula nshalelo aaye.​—Shak. 1:25.

12-13. Etaata dia binyibinyi dia mu Bible ndikuashe Mayli naminyi?

¹² Bua kushimika kasele ku muulo wa bia binyibinyi, Bible apuandikisha muulo wi nao bia binyibinyi n’elampi adimunyika mu mufito. (Mis. 119:105; Ef. 5:8) Mayli a mu Azerbaijan, e na lutumbu lukata bu’etaata diadi mupete Muiyi di’Efile Mukulu. Baadi mukudile mu nshibo mui baledi baye be na bipuilo bilekeene. Nshaye baadi atuele mu kipuilo kia ba Musulman, nyinaye namu mu kipuilo kia bena Yuda. Amba’shi: “Ntshinaadi na mpaka’shi Efile Mukulu e kuanka, anka naadi na nkonko i bungi. Naadi neyipusha’shi: ‘Buakinyi Efile Mukulu mmupangie bantu, na buakinyi bangi bakuete kukienga mu muwa wabo ooso ushima, na abakiengie mu kaalo bua losoo?’ Kubanga nka pa baadi bantu abakula’shi mianda yoso ayikitshika nkikiebe ki’eshimba di’Efile Mukulu, naadi neyipusha’shi: ‘Efile Mukulu asangeelaa kumona bantu bi’abakiengie su?’”

¹³ Mayli batungunukile na kukimbuula bua kupeta ngaluulo ku nkonko yaye. Kunyima kua mafuku, baadi mukumiine kulonga Bible na kukumiina kutuela mu bia binyibinyi. Amba’shi: “Bishinkamiisho binaadi mupete mu Bible, bibaadi binkuashe buandia kuikala muntu e na muloo.” Na’shi: “Mianda yabadi bapatuule kalolo Muiyi di’Efile Mukulu, ngingikashe na butaale.” Anka bu Mayli, atue booso atutumbisha Yehowa, muanda “betwitanyine [kukatuka] ku mufito [nkwenda] kwitaata diaye di buwa.”​—1 Mp. 2:9, Kilombeeno Kipya 2014.

14. Tui balombene kutamisha kifulo kietu bua bia binyibinyi naminyi? (Tala kashibo akamba’shi: “Bingi bintu biatudi balombene kupuandikisha na bia binyibinyi bia mu Bible.”)

¹⁴ Bino nyi mbileshesho penda bipeela, abilesha muulo wi nao bia binyibinyi. Kushi mpaka, we mulombene kunangushena bingi bileshesho bi bungi. Buakinyi ta tui balombene kuiyatshila mpango ya kuilongiela pa bupenka, bua kupeta tungi tubingilo tua buakinyi tui balombene kufula bia binyibinyi? Patunyiisha kufula bia binyibinyi, atunyiisha kupeta mishindo ya kulesha kifulo bu’abio.

BIA KULESHA’SHI TUI BAFULE BIA BINYIBINYI

15. Mmushindo kinyi umune watudi balombene kulesha kifulo kietu bua bia binyibinyi?

¹⁵ Tui balombene kulesha’shi tui bafule bia binyibinyi, pa kuilongiela Bible na mikanda ayakuila pabitale Bible nsaa yoso. Kukatusha biabia, sunga tuekala bapue kukisha bipua bi bungi mu bia binyibinyi, tui na lukalo lua kulonga mianda i bungi. Muanda wa kumpala w’abakuila mu kino Kitenta kia Mulami awamba’shi: “Bia binyibinyi, bi nka bu kilongo kipeela kiabadi bashikiile kui ingi mitshi i bubi bua’shi takikulanga. Su okumiina kuikipeta abitungu kuikitshisha ngofu. . . . Na su buekipete, abitungu kuikilama kalolo. Tosangeelanga kuikala penda na kilongo kimune kia bia binyibinyi. . . . Ekitshishe misuusa yoso bua kupeta bia binyibinyi bi bungi bia mu Bible.” Kuilongiela mmudimo wi bukopo, anka kintu ki na muulo ukata nkuikitshisha.

16. Mmayele kinyi a kuilongiela oomonaa bu e buwa? (Nkindji 2:4-6)

¹⁶ Ta kui muntu su ngumuna a kuatudi, mufule kubadika na kulonga. Anka Yehowa etutekie buatudia “kutungunuka na kukimba,” na “kutungunuka na kukimbuula” bua kutamisha mpushisho eetu a bia binyibinyi. (Badika Nkindji 2:4-6.) Su tubekitshisha mu uno mushindo, abitukuasha misuusa yoso. Pabitale kuibadikila kuaye kua Bible kua pa bupenka, Corey amba’shi: “Natuulaa binangu ku verse umune ingi nsaa.” Apatuula’shi: “Nakumiinaa kubadika mayi ooso e kuushi ku’esaki, na kutaluula mu mikanda yoso yabadi balayile, na kukimbuula dingi. . . . Ano mayele aankuashaa bua kuuka mianda i bungi!” Su tuafubisha ano mayele sunga angi, atulesha lutumbu luetu bua bia binyibinyi p’atuata nsaa ya kuikitshisha bua kuibilonga.​—Mis. 1:1-3.

17. Kuikala na nshalelo muipushene na bia binyibinyi akupushisha kinyi? (Shake 1:25)

¹⁷ Biabia, atuuku’shi t’abikalaa bibofule bua kuilongiela bia binyibinyi. Bua’shi bitukuashe ngofu, abitungu nshalelo eetu epushene na bia binyibinyi, kuamba’shi kutumikila bi’atulongo mu nshalelo eetu. Nka penda bia binyibinyi, ngi bilombene kuitutuadila muloo w’eyendo. (Badika Shake 1:25.) Mmushindo kinyi watudi balombene kushinkamisha’shi nshalelo eetu mmuipushene na bia binyibinyi? Ungi mukuetu mulume atusha binangu biatudia kuitaluula atue banabene, bua kumona mbalo y’atukitshi mianda i buwa, na yatush’atukitshi mianda i buwa ayitungu kulumbuula. Mpoolo mutumibua bambile’shi: “Sunga tuekadika bapue kuenda kumpala, tutungunukieyi na kutambuka mu kipaso kilulame mu dino eshinda dimune.”​—Fid. 3:16, NWT.

18. Buakinyi abitungu tuikitshishe bua “kutambuka mu bya bînyibînyi”?

¹⁸ Banda kunangushena miabi y’atupetela mu kuikitshisha bua “kutambuka mu bya bînyibînyi”! T’abitungu tulumbuule penda ngikashi ya mu nshalelo eetu’tue banabene nya, anka abitungu dingi tusankishe Yehowa na bena Kidishitu netu. (Nki. 27:11; 3 Yo. 4, EEM) Mu binyibinyi, tui na tubingilo tui buwa tua kufula bia binyibinyi na kuikala na nshalelo muipushene nabio.