Mbamone kifulo mu bikitshino

YOMARA na bakuabo balume Marcelo na Hiver, mbashaleele mu ka kibundi kapeela ke mu Guatemala. Yomara babangile kulonga Bible na Tumonyi tua Yehowa, akupu bakuabo nkumulonda kubanga n’abo kulonga. Anka kubaadi lukalakashi. Booso basatu mba mpofu, ta mbalombene kubadika mu ki braille. Biabia mulongieshi aabo a Bible, nyi baadi ebabadikila bikoso, ma verse a mu Bible, na kiabibalongiesha.

Na dingi, babaadi na lukalakashi lua kutuela mu bisangilo bia kakongie. Mu abo banabene ta be bia kutambuka munda mua minite 40 bua kuenda ku Nshibo ya Bufumu i peepi naabo. Anka bakuetu ba mu kakongie babaadi baate mpango ya kuibatuala mu bisangilo bioso. Pa babangile baaba ba mpofu kukita midimo ya bisangilo bia munkatshi a lubingo, bakuetu babaadi abebakuasha bua kulamiina bipindi biabo mu binangu.

Mu mueshi wa Katano 2019, bisangilo bia kakongie bibabangile kutuela mu kibundi kiabo. Mulume na mukashi ba mbala-mashinda ba mieshi yoso, babaadi bafilukie bakashala ku kiakia kibundi. Kepatshila kaabo kabaadi ka kulongiesha baaba ba mpofu basatu bia kufunda mu braille, sunga bibaadi uno mulume na mukashi t’abuuku kufunda na kubadika mu braille. Biabia babayile ku nshibo ya mikanda mu kulonga ki braille, na kulonga mayele a kumufubisha bua kumulongiesha.

Mu mieshi penda ipeela, bano ba mpofu basatu tababaadi na ngobesha ya kubadika ki braille kalolo, na mbibakuashe buabadia kunyisha kuenda kumpala mu kikudi.a Lelo uno Yomara, Marcelo, na Hiver bakuete kufuba bu ba mbala-mashinda ba mieshi yoso. Marcelo mmufubi a midimo mu kakongie. Mu lubingo looso, mbepaane mu midimo wa mu kikudi. Muloo wabo nguambukile bangi.

Bano ba mpofu basatu be na lutumbu lukata bua kifulo kiabadi bebaleshe, pa kuibakuatshishena mu kakongie. Yomara amba’shi, “Kubanga nka musuusa wa kumpala ubatudi bemonene na Tumonyi tua Yehowa, mbetuleshe kifulo kia binyibinyi kia bena Kidishitu.” Marcelo akumbasha namu’shi, “Tui na ba kuuku be buwa bukile mu kakongie keetu, na tui mu kifuko kia mu nsenga ishima ki mu buumune na kifuleene.” Yomara na bakuabo bakuete kutengiela efuku di’abakamono nsenga ibaluluka mpaladiiso.—Mis. 37:10, 11; Yesh. 35:5.