MUISAMBO WA KULONGA 30
Tungunuka na kutamisha kifulo kiobe
“Tukuleyi mu kifulo mu bintu bioso.”—Ef. 4:15.
LOONO 2 Eshina dyoobe mbu Yehowa
KI’ABAKUILA MUANKAa
1. Mbia binyibinyi kinyi biodi mulongie p’obobangile kulonga Bible?
OKI’OTENTEKIESHA nsaa i bobangile kulonga Bible su? Pangi boodi mukaanye ngofu p’abe kuuka’shi Efile Mukulu e n’eshina. Pangi boodi mupushe buwa ngofu p’obolongiele’shi Efile Mukulu t’akiengieshaa bantu muishiba dia kaalo. Na pangi boodi na muloo ukile wa kuuka’shi okemonena dingi na bakuenu boodi mufuishe, nukashaale pamune pano pa nsenga mu mpaladiisu.
2. Kukatusha kulonga bia binyibinyi bia mu Bible, ngingi mianda kinyi yoodi mupue kukita bua kunyiisha kuenda kumpala mu kikudi? (Bena Efeso 5:1, 2)
2 P’onyiisha kulonga Eyi di’Efile Mukulu, onyiisha kutamisha kifulo kiobe bua Yehowa. Kiakia kifulo akikutakula bodia kutumikila yaya mianda y’olongo. Wata bitshibilo bibuwa biimeene pa mayi a kulonda a mu Bible. Olesha ‘shi we na kinangu ki buwa na muikeelo wibuwa muanda okumiina kusankisha Efile Mukulu. Nka bu muana bi’ambulaa nshaye sha kifulo, wambula Nshetu e muiyilu.—Badika Bena Efeso 5:1, 2.
3. Abitungu tuiyele nkonko kinyi?
3 Tui kuiyipusha atue banabene’shi: ‘Kifulo kiande bua Yehowa nkinyingie ngofu binobino kukila pa naadi nkiambanga kuikala bu muina Nkidishitu? Kasha napua kubatshishibua, mushindo wande wa kunangushena na bikitshiino biande bi bu bia Yehowa, bikishekishe mu kulesha kua bakuetu balume na bakashi kifulo su?’ Su “kifulo kiboodi nakio ku mbangilo” omona’shi kibabofula to tshobolokanga. Ngi bibaadi bikitshikile mpaa na bena Nkidishitu ba mu siekele a kumpala. Yesu ta baadi muibasumbushene nya, na t’aketusumbushena namu n’atue nya. (Kbf. 2:4, 7) Yesu awuku’shi tui kualushuula kifulo kibatudi nakio pabaatudi tuki’ababanga kulonga bia binyibinyi.
4. Nkinyi ki’atukalongo mu uno muisambo?
4 Mu uno muisambo, atukesambila mushindo watudia kutungunuka na kutamisha kifulo kietu bua Yehowa na bua bakuetu balume na bakashi. Dingi atukalongo pabitale ingi mianda i buwa ayikakitshika nsaa y’atufulu Yehowa na kufula bakuetu balume na bakashi ngofu.
TAMISHA KIFULO KIOBE BUA YEHOWA
5-6. Mpoolo mutumibua baadi mupete nkalakashi kinyi mu mudimo waye, kadi nkinyi kibaadi kimutakule buadia kutungunuka na kufubila Yehowa?
5 Mpoolo mutumibua baadi na muloo bua kufubila Yehowa, anka misuusa yooso ta bibaadi bibofule nya. Mpoolo baadi ende nyendo i bula, na yaya nyendo ta ibaadi ibofule misuusa yooso nya. Mu nyendo yaye, Mpoolo baadi ingi misuusa “mupete masaku pa muanda wa miela” na “masaku pa muanda wa ba ntomboshi.” Mpoolo baadi dingi mukupilue ngofu dingi efuku na beshikuanyi baaye. (2 Ko. 11:23-27) Na bakuabo bena Nkidishitu ta babaadi abamutumbula bua bibaadi ekitshisha bua’shi ebakuashe nya.—2 Ko. 10:10; Fid. 4:15.
6 Nkinyi kibaadi kikuashe Mpoolo buadia kutungunuka mu mudimo wa Yehowa? Mpoolo baadi mulongie mianda i bungi pabitale bu muntu bua Yehowa mu Bifundue, na ku mianda yadi mumone aye nabene. Mpoolo bekeele mushinkamishe’shi Yehowa Efile mukulu mmu mufule. (Lom. 8:38, 39; Ef. 2:4, 5) N’aye namu bafikile mu kufula Yehowa ngofu. Mpoolo balesheshe kifulo kiaye bua Yehowa, “p’aye kufubila beselele na p’aye kutungunuka na kuibafubila.”—Eb. 6:10.
7. Mmushindo kinyi umune watudi balombene kutamisha kifulo kietu bua Yehowa?
7 Tui kutamisha kifulo kietu bu’Efile Mukulu p’atuilongiela Eyi diaye nsaa yooso. Nsaa y’obadika Bible, ekitshishe bodia kutundula akilesha verse ooso pabitale Yehowa. Eyipushe’shi: ‘Mmushindo kinyi awundesha uno muanda’shi Yehowa mmunfule? Uno muanda awumpa tubingilo kinyi bua kufula Yehowa?’
8. Luteko lui kuitukuasha buatudia kutamisha kifulo kietu bu’Efile Mukulu naminyi?
8 Ungi mushindo watudi balombene kutamisha kifulo kietu bua Yehowa, mpa kumufunguila eshimba dietu mu luteko. (Mis. 25:4, 5) Yehowa namu ku luaye lupese, akaluula nteko yetu. (1 Yo. 3:21, 22) Ungi mukuetu mukashi Khanh mushaleele mu Asie, amba’shi: “Kifulo kiande bua Yehowa kibaadi kimeene ku mbangilo nka pa kiukilo, anka kiakia kifulo nkinyiishe kutama nsaa inammuene mushindo w’aluula ku nteko yande. Bino mbintakule buandia kukumiina kukita mianda ayimusankisha.”b
TAMISHA KIFULO KIOBE BUA BAKUENU BALUME NA BAKASHI
9. Timote balesheshe naminyi’shi e na kifulo ki bukopo bua bakuabo balume na bakashi?
9 Kunyima kua Mpoolo kufika muina Nkidishitu, baadi muimoneene na ungi nsongua baadi na muikeelo wibuwa bukile abetanyinaa bu Timote. Timote baadi mufule Yehowa, na kufula bantu. Mpoolo balunguile bena Fidipe’shi: “Muanda ntshi na ungi muntu e na binangu bibuwa bu bia [Timote] apasukila nkalo yenu n’eshimba dimune.” (Fid. 2:20) Pano Mpoolo t’akuila bua ngobesha ya Timote ya kulumbuula mianda sunga ya kuela miisambo ya bantu booso kalolo nya, kadi baadi mukaanye bua kifulo kia Timote kui bakuabo balume na bakashi. Kushi mpaka, mu tukongie tubaadi Timote afubila, babaadi abatengiela kufika kuaye ngofu.—1 Ko. 4:17.
10. Anna na mulume aaye babaadi baleshe kifulo kibaabadi abapusha bua bakuabo balume na bakashi naminyi?
10 N’atue namu tukimbeyi mishindo yatudia kukuasha bena Nkidishitu netu balume na bakashi. (Eb. 13:16) Tutaleyi muanda wabadi bamone kui Anna mukuetu mukashi, abadi bateemune mu muisambo ushaale. Kunyima kua kipapi ki bukopo, aye na mulume aaye babayile mu kutembela kingi kifuko kia Tumonyi tua Yehowa, na babamuene’shi musaka wa nshibo yabo ngusaasukie. Ku muanda wa kiakia kipapi, kiakia kifuko kibaadi na bilamba bi butshiafu. Anna amba’shi: “Tubaadi baate bilamba biabo tuebatumpila, akupu tuebaluisha bianka bipue kukoma na kukonya kalolo. Kuatudi, kukita bino ta kubaadi bu kintu nya, kadi nkutuushe kipuano ki bukopo kiki kuanka mpaa na lelo uno.” Kifulo kia Anna na mulume aaye bua bakuabo balume na bakashi, kibaadi kibatakule buabadia kukita kintu kampanda bua kuibakuasha.—1 Yo. 3:17, 18.
11. (a) Kuikitshisha kuetu kua kulesha kifulo kui na bukitshishi kinyi kui bangi? (b) Muyile Nkindji 19:17, Yehowa akitaa naminyi p’atulesha kifulo?
11 P’atuikala na kalolo na kifulo kui bakuetu balume na bakashi, abanyiisha kumona kuikitshisha kuetu bua kunangushena na kukita mianda bu Yehowa. Na bekuikala na lutumbu lukata bua kalolo ketu biatush’atuelelanga binangu. Khanh atudi bateemune kunundu, ki’atentekieshaa baaba babaadi bamukuashe. Amba’shi: “Ne na lutumbu lukata bua bakuetu booso bakashi babaadi bankitshiine midimo. Babaadi abafiki bangatanga ku nshibo, banyitanyinanga bua nkadia nabo bidibua pamune, na babaadi abashinkamisha’shi naluka ku nshibo kalolo. Binobino natundula’shi babaadi abekitshisha ngofu. Na babaadi abebikitshi na kifulo kioso.” Mu binyibinyi, ta mbooso abaketutumbula bua kiatudi bebakitshiine nya. Khanh, akula pabitale baaba babamukuashiishe’shi: “Nawuku’shi ntshi mulombene kuibaluisha kalolo kabadi bankitshiine, na ta nguuku ma mbalo abadi bashaale booso, biabia Yehowa ngi a kuibakitshiina, ngi buakinyi namutekaa bua’shi ebakitshiine.” Khanh e na kabingilo. Yehowa amonaa mpaa na tu bikitshiino tupeela tua kalolo tu’atukitshiinaa bangi. Yehowa p’ataluulaa bianka ebimonaa bu mulambu na bu ebaasa dibatumupa diadi mulombene kufuta.—Badika Nkindji 19:17.
Apende muntu kumpala mu kikudi, akimbaa mishindo ya kukuasha bangi (Tala kikoso 12)
12. Bakuetu balume na bakashi be kulesha kifulo kiabo bua kakongie naminyi? (Tala dingi bifuatulo.)
12 Su we mukuetu mulume, we kulesha kifulo bua bakuetu balume na bakashi na kukita kintu kampanda bua kuibakuasha naminyi? Jordan mukuetu mulume ki nsongua, bayipuishe mukulu kiadi mulombene kukita bua kunyiisha kukuasha kakongie. Mukulu bamukaanyishe bua bibaadi mupue kuenda kumpala na amupa dingi alango dia biadia kukita bi bungi. Bu kileshesho, baadi mulungule Jordan’shi, ikadika ofiki kumpala ku Nshibo ya Bufumu bodia kuisemeshena na bangi na kutuushanga ngaluulo mu bisangilo, na kutukanga mu mudimo wa bulungudi pamune na kasaka keenu ka mudimo wa bulungudi misuusa yooso, na kukimba mishindo yodia kukuasha bangi. Pa baadi Jordan mutumikile dino elango, ta baadi mulongie nka penda mayele apia nya, kadi baadi dingi mutamishe kifulo kiaye bua bakuabo balume na bakashi. Jordan baadi muukie’shi apafiki mukuetu mulume bu mufubi a midimo mu kakongie, t’abanga nka penda na kukuasha bangi nya; kadi atungunuka na kuibakuasha.—1 Ti. 3:8-10, 13.
13. Kifulo kibaadi kitakule Christian mukuetu mulume bua kulombasha ngikashi itekibue bua kuikala dingi mukulu naminyi?
13 Bi kuikala naminyi su kala boodi ofubu bu mufubi a midimo mu kakongie sunga bu mukulu? Yehowa atentekieshaa mufubo ooso oodi mukite kala, na kifulo kibaadi kikutakule bua kuiwukita. (1 Ko. 15:58) Kuete amono dingi kifulo ki’okuete atungunuka na kulesha. Christian mukuetu mulume baadi mutshobolokie pa baabadi bamukatushe bu mukulu mu kakongie. Ngi buakinyi amba’shi: “Naadi muate kitshibilo kia kukita kiakia kioso akitungu bua kufubila Yehowa na kifulo kioso, bia ngikala mukulu sunga kukutua kuibuikala.” Kunyima kua mafuku, baadi mutudibue dingi bu mukulu. Christian amba dimo’shi: “Napetele lukalakashi lupeela lua kufuba dingi bu mukulu. Anka naadi muate kitshibilo kia’shi, su nkukiila ku lusa lua Yehowa, Nnaye mukumiine bua’shi mmufubile dingi bu mukulu, nebufubu muanda ne mumufule na nafula bakuetu balume na bakashi.”
14. Mianda yabadi bakule kui mukuetu mukashi a mu Georgie ibakulongiesha kinyi?
14 Bafubi ba Yehowa abaleshaa dingi kifulo kiabo kui bankungishanyi nabo. (Mat. 22:37-39) Bu kileshesho, Elena mukuetu mukashi mushaleele mu kibundi kia Georgie, amba’shi: “Kintu kia kumpala kibaadi kintakule bua kulungula mukandu wibuwa, nkifulo kiande bua Yehowa. Biabia, apanyiisha kutama kifulo kiande bua Nshami e muiyilu, kifulo kiande bua bantu akinyiisha kutama na akio. Natompaa kunangushena ku nkalakashi y’abafumankana nayo, na muanda ulombene kuibakuma ku mashimba aabo. P’anyiishaa kuibelela binangu mu uno mushindo, ngi p’anyiishaa kukumiina kuibakuasha.”—Lom. 10:13-15.
YEHOWA ETUFUTU P’ATULESHA BAKUETU BALUME NA BAKASHI KIFULO
Kikitshiino kimune kia kifulo ki kutuadila bangi bantu be bungi miabi (Tala kikoso 15-16)
15-16. Nka bu abilesha bifuatulo, mmiabi kinyi ayitukilaa mu kulesha kua bangi kifulo?
15 P’atulesha bakuetu balume na bakashi kifulo, t’abibakuasha nka penda abo nya. Kunyima kua kipupa kia Corona-Virus kubanga, Paolo mukuetu mulume na mukashi aaye, babaadi balongieshe bakuetu bakashi be bungi batabadi banunu, biabadia kufubisha tuamo tuabo bua kulungula mukandu wibuwa. Ungi mukuetu mukashi baadi amono ku mbangilo bu bi bukopo, bua kufubisha kaamo, nfudiilo a bioso baadi moobeshe bia kuikafubisha. Baadi mupete mushindo wadia kufubisha kaamo bua kuitanyina bakuabo ba mu kifuko ku Kitentekiesho kia lufu lua Yesu. Bantu makumi asamombo ba kuabadi, babaadi batuele ku Kitentekiesho kukiila ku videoconférence! Mukuetu mukashi na bakuabo bena kifuko booso babaadi bakuashibue kukiila kui Paolo na mukashi aaye. Kunyima, mukuetu mukashi baadi mufundile Paolo’shi: “Bofuambuka bikata p’abe kuitulongiesha atue batabadi banunu bia kufubisha tuamo. Ntaa na ngiluankane misuusa bungi ayitupasukilaa Yehowa na biodi muikitshishe bua’shi wetukuashe nya.”
16 Ino mianda yabadi bamone kui Paolo, ngimupe malongiesha e na muulo. Baadi mutentekieshe’shi, kifulo ki na muulo kukila kiukilo sunga ngobesha ya butandua. Atentekiesha dingi’shi: “Baadi mufube bu mukunkushi a kifunda. Lelo uno, ne mumone’shi sunga balungudi bayiluankana miisambo inaadi neele, anka baki’abatentekieshaa bukuashi bua bintu bia ku mbidi binaadi muibape.”
17. P’atulesha kifulo akikakuasha na bantu kinyi?
17 P’atulesha bakuetu balume na bakashi kifulo, n’atue banabene atupete miabi mu mishindo yatush’abatengielanga. Jonathan mukuetu mulume mushaleele mu Nouvelle-Zélande, ngi biadi mumone. Dingi efuku mu dia Mpooso kunyima kua midi kubaadi kaanya ke bukopo, bamuene ungi mukuetu mulume baadi mbala-mashinda alungula mukandu wibuwa mu kilayi bupenka. Mukuetu mulume Jonathan batshile kitshibilo kiadia kumushindikila nka yaya nsaa. Jonathan ta baadi muukie mu yaya nsaa bungi bua miabi ibaadi mulombene kupeta ku kiila ku kikitshiino kiaye kia kalolo nya. Jonathan amba’shi: “Uno ubaadi muanda ukata mu nshalelo ande.” Amba dingi’shi: “Ntshi naadi mufule kutuuka mu bulungudi nya. Anka pa naadi nateemesha mushindo ubaadi yawa mbala-mashinda alongiesha na binaadi mumone bipeta bibaadi bituukie mu bulungudi buaye, naadi muate kitshibilo kia kufula wawa mudimo. Uno mukuetu mulume mbala-mashinda, baadi mufikie dingi kuuku ande a p’eshimba, baadi munkuashe biandia kuenda kumpala mu kikudi, biandia kusangeela mudimo wa bulungudi, na biandia kunyiisha kuifubuila peepi na Yehowa.”
18. Yehowa akumiina’shi tukite kinyi?
18 Yehowa akumiina’shi atue booso tutamishe kifulo kietu muadi na kui bangi. Nka bu bibatukatuka mu kuibilonga, tui kunyingisha kifulo kietu bua Yehowa, pa kubadikanga Eyi diaye na kunangushena ku bi’atubadika, na kumulungulanga mianda yetu mu nteko nsaa yooso. Tui kutamisha kifulo kietu bua bakuetu balume na bakashi, pa kuibakuashanga na bintu abimueneka. Apatama kifulo kietu, aatunyiisha kuifubuila kui Yehowa na kui kifuko kietu kia mu kikudi. Na atukasangeela kipuano ki buwa naabo bua losoo!
LOONO 109 Efuleneyi bikata mu mashimba enu
a Biatuikala tu ki beenyi mu bia binyibinyi sunga bapue kufubila Yehowa muanda mua bipua bi bungi, abitungu atue booso tutungunukie na kuenda kumpala mu kikudi. Mu uno muisambo, atukalongo mushindo watudi balombene kutungunuka na kuenda kumpala mu kikudi: P’atutamisha kifulo kietu bua Yehowa na bua bakuetu balume na bakashi ngofu. P’onangushena ku uno muisambo, taluula biodi mupue kuenda kumpala mu kikudi, na mushindo oodi mulombene kunyiisha kuanda kumpala ngofu mu kikudi.
b Angi mashina mbeashintule.