Mushindo aukapu ngoshi

EFILE MUKULU AKABUTULA MBULAMATADI YA BANA BA BANTU

Efile Mukulu akabutula mbulamatadi ya bana ba bantu ku ngoshi y’abetamina kui Bible bu Armagedone.a (Kibafumbuilue 16:16) Mu aa mafuku, “ba nfumu ba pa nsenga ishima” abakebabungu boso bua “ngoshi y’efuku dikata di’Efile Mukulu Sha bukome boso.” (Kibafumbuilue 16:14) Armagedone nyi ngoshi y’Efile Mukulu, ayikafudiisha ngoshi yoso.

Efile Mukulu akapianyisha mbulamatadi ya bana ba bantu na Bufumu buaye, mbulamatadi akekala muiyilu abashabakabutula. (Ndanyele 2:44) Efile Mukulu musangule Muana aaye, Yesu Nkidishitu bu Nfumu a Bufumu buaye. (Yeshaya 9:6, 7; Mateo 28:18) Uno mbulamatadi nyi Bufumub bubaadi Yesu mulungule balongi baye bua kuteka kufika kuabo. (Mateo 6:9, 10) Bantu boso abakekala mu buumune ku bukunkushi bua mbulamatadi umune e na Yesu bu Nfumu.

Mu kuilekena na ba nfumu ba pa nsenga, Yesu t’akafubisha matalua aaye bua kulombasha nkalo yaye’ye nabene nya. Muanda mmululame na te na ntondo, na ta kui muntu abakasumbushena pa muanda w’ekoba, eumbo, sunga kisamba. (Yeshaya 11:3, 4) Ta kui muntu akalu bua kukaluila matalua aaye. Buakinyi? Muanda Yesu akapasukila muntu oso pa bupenka. ‘Apaasha mulanda eele musaase kwadi, naa bee mu mpombo bashii naa pa kwimeena. . . . Ebakaaluila kwi baaba abebamuesha malua na ku kifita kia bantu.’​—Misambo 72:12-14, BB.

Bufumu bu’Efile Mukulu abukakatusha bi na ngoshi bioso bi pa nsenga. (Mika 4:3) Abukakatusha dingi bantu boso babi abapele kuleka kulua ngoshi na abaluisha butaale bua bangi. (Misambo 37:9, 10) Muana mulume, muana mukashi na muana mukinga oso abakekala mu kukaluilua mbalo yoso yabakende pa nsenga.​—Ezekiele 34:28.

Bantu abakekala na nshalelo e buwa mu Bufumu bu’Efile Mukulu. Abukakatusha mianda yoso ikale bu nsulo ya ngoshi, bulanda, nsala, na kukutua kua mbalo i buwa ya kushala. Muntu oso akekala na bidibua bi bungi bi buwa na mbalo i buwa ya kushala.​—Misambo 72:16; Yeshaya 65:21-23.

Bufumu bu’Efile Mukulu abukakatusha bukitshishi boso bui bubi bua ngoshi. Tabukapaasha penda bantu ku mbidi nya, kadi mpa na mu binangu na ingi mianda yoso i bubi ayikitshikaa mu ngoshi. Mpa na baaba bapue kufua, abakasanguka bua kuikala dingi na muwa pa nsenga. (Yeshaya 25:8; 26:19; 35:5, 6) Bifuko abikekala dingi pamune, na mianda yoso i bubi ya ngoshi ayikekala mu ‘mianda ya kala ayikashimina.’​—Kibafumbuilue 21:4.

EFILE MUKULU AKAKATUSHA MULUISHO

Bufumu bu’Efile Mukulu abukabungu bantu boso mu lulanguilo lu’Efile a binyibinyi, Yehowa,c “Efile Mukulu a kifulo na butaale.” (2 Bena Kodinda 13:11) Bantu abakalongo bia kushala pamune mu butaale. (Yeshaya 2:3, 4; 11:9) Bantu boso abakatumikila biabalongo, abakapoososhibua ku bupika bua muluisho.​—Bena Loma 8:20, 21.

EFILE MUKULU AKABUTULA SATANA NA BA DEMO BAYE

Bufumu bu’Efile Mukulu abukabutula yawa kuete kutakula bantu’shi balue ngoshi, Satana na ba demo baye. (Kibafumbuilue 20:1-3, 10) Kushi bukitshishi buabo bui bubi, “kufukama kukata akukekala kwanka.”​—Misambo 72:7, EEM.

Ikala mushinkamishe’shi mulayilo w’Efile Mukulu wa kupua ngoshi, aukalombana. Muanda e na ngobesha na lukalo lua kupua ngoshi.

• Efile Mukulu e na binangu na bukome bua kupua ngoshi na bu ntomboshi. (Yobo 9:4) Ta kui kintu ki ku muelela bukopo kukita.​—Yobo 42:2.

• Efile Mukulu t’asankaa p’amono bantu abakiengie. (Yeshaya 63:9) Na dingi ‘mushikwe sh’etombo.’​—Misambo 11:5.

• Misango yoso, Efile Mukulu alombashaa eyi diaye; tadimbaa.​—Yeshaya 55:10, 11; Tite 1:2.