Ambula Yehowa na Yesu mu ngielelo oobe a binangu

1-2. Kufula Yehowa nkutale kinyi, na mushindo kinyi ubaadi Yesu muibileshe?

“ABITUNGU ofule Yehowa Efile Mukulu oobe n’eshimba diobe dioso, na anyima oobe oso, na bukome bobe boso na binangu biobe bioso.” (Luk. 10:27) Yesu baadi muleshe patooka’shi, uno nyi muiya ukile bukata mu Muiya wa Moyise. Lamiina’ shi kifulo kietu bua Yehowa nkitale bi muishimba dietu, biatuipusha, nkalo yetu mpa na bi mu binangu bietu. Mbitale dingi anyima etu oso na bukome buetu boso. Na dingi, kufula Yehowa nkutale binangu bietu, na mushindo watunangushena pabitale mianda. Biabia, tatuanaa tupushe bioso abinangushena Yehowa. Anka, tuibalombene kupusha kalolo abinangushena Efile Mukulu pa kulonga “binangu bia Nkidishitu,” muanda Yesu muambule mushindo wa kunangushena wa Nshaye mu mushindo upuidikie.​—1 Ko. 2:16.

² Yesu baadi mufule Yehowa na binangu biaye bioso. Baadi auku kibaadi akikumiina Efile Mukulu’shi akite, na baadi na kitshibilo kia kuibikita sunga biabibadia kumutuadila makienga. Pa muanda wa’shi baadi akumiina kusankisha Nshaye, Yesu tabaadi mutadiile kintu su nkimune buakidia kumukumba binangu ku kepatshila kaaye.

3. Mpiele baadi mulongiele kinyi kui Yesu, na baadi munyingishe bena Nkidishitu buabadia kukita kinyi? (1 Mpiele 4:1)

³ Mpiele na bangi batumibua abaadi bapete mushindo wi pabuao wa kukisha nsaa i bungi na Yesu, na kulonga mushindo ubaadi anangushena. Nsaa ibaadi Mpiele mufunde mukanda waye wa kumpala ku bukuashi bua kikudi kiselele, baadi munyingishe bena Nkidishitu buabadia kuikala na mmueneno umune a mianda bu a Nkidishitu. (Badika 1 Mpiele 4:1.) Mu ludimi lua ku kibangilo, Mpiele baadi mufubishe kishima kia basalayi, pabafundile’shi: “Ikalayi na yawa mmueneno umune a mianda,” bua kulesha abilumbulaa basalayi kumpala kua kuenda mu ngoshi. Biabia su bena Nkidishitu bambula mushindo wa kunangushena wa Yesu abekala balombane bua kulua na binangu bi bubi bia uno ndumbuluilo akunkushibua na Satana.​—2 Ko. 10:3-5; Ef. 6:12.

4. Uno muisambo awitukuasha naminyi buatudia kutumikila elango dia Mpiele?

⁴ Mu uno muisambo atumono mushindo wa kunangushena wa Yesu, na biatudia kumuambula. Ku kileshesho kiaye atulongo bia (1) kuambula mushindo wa kunangushena wa Yehowa, awitukuasha buatudia kuikala na binangu bimune na bangi (2) kuikala beyishe, na (3) kuikala na binangu bi buwa pa kukulupila mui Yehowa mu luteko.

AMBULA MUSHINDO WA KUNANGUSHENA WA YEHOWA

5. Ungi musango, mushindo kinyi ubaadi Mpiele mukutue kuambula mushindo wa kunangushena wa Yehowa?

⁵ Tubande kutala musango ushibaadi Mpiele muambule mushindo wa kunangushena wa Yehowa. Yesu baadi mulungule balongi baye’shi, abitungu ende ku Yelusalema, bakamupaane ku masa kua bakata ba bipuilo, anyingiile mutshi wa makienga, na akupu ayipayibue. (Mat. 16:21) Bibaadi bukopo bua’shi Mpiele akumiine’shi, Yehowa atadiila’shi Yesu, lukulupilo lua Isalele na Mesiya mulayibue ayipayibue. (Mat. 16:16) Biabia, Mpiele bayile na Yesu ku lupese na amulungula’shi: “Muanana, leka kuakula muanda wi biabia; uno muanda t’aukukitshikila nya.” (Mat. 16:22) Yesu na Mpiele ta babaadi na mueneno umune pabitale uno muanda, muanda Mpiele ta baadi anangushena mu mushindo umune na Yehowa.

6. Mbikunyi bibaadi Yesu muleshe’shi, mushindo waye wa kunangushena nguipushene na wa Yehowa?

⁶ Yesu baadi anangushena nka bu Nshaye e muiyilu. Balunguile Mpiele’shi: “Kila kumongo kuande, Satana! We kikokoshi kuandi, muanda binangu bi’okuete kuela, ta mbia Efile Mukulu, kadi mbia bantu.” (Mat. 16:23) Yesu baadi auku’shi bua kukita kikiebe ki’eshimba dia Yehowa, abitungu akiengie na kufua. Biabia baadi mupele elango dia Mpiele, sunga bibaadi Mpiele na binangu bi buwa. Uno muanda ubaadi ulongieshe Mpiele’shi, abitungu ambule mushindo wa kunangushena wa Yehowa. Na awitulongiesha natue namu dilongiesha di na muulo ukata.

7. Muenda mafuku, mushindo kinyi ubaadi Mpiele muleshe’shi akumiina kuambula mushindo wa kunangushena wa Yehowa? (Tala kifuatulo.)

⁷ Muenda mafuku, Mpiele baadi muleshe’shi, akumiina kulonga bia kunangushena bu Yehowa. Nsaa ibalombene bua’shi bantu ba mu bingi bisamba bashi basadibue, bafikie muilo w’Efile Mukulu. Abaadi batume Mpiele bua nkalungula muntu a mu ungi muilo Korneye, akekala mu kisaka kia kumpala kia bano balanguidi bapia. Bena Yunda ta babaadi abakumiina kuikala pamune na bantu ba mu ingi miilo, biabia bibaadi abitungu’shi Mpiele alumbuule binangu biaye kumpala kua kuenda mu kulungula mukandu wi buwa kui bantu ba mu ingi miilo. Nsaa ibaadi Mpiele mutundule bi mueneno a Efile Mukulu pabitale uno muanda, baadi mulumbuule mueneno aaye. Nyi buakinyi bayile “kushi kuela mpaka,” nsaa ibabaadi bamutume. (Bik. 10:28, 29) Baadi mulungule Korneye na ba mu nshibo muaye mukandu wi buwa, na abo nkubatshishibua.​—Bik. 10:21-23, 34, 35, 44-48.

8. Mbikunyi biatudia kulesha’shi atuambule mushindo wa kunangushena wa Yehowa? (1 Mpiele 3:8)

⁸ Kunyima kua bipua, Mpiele baadi munyingishe bena Nkidishitu bua badia kuikala na “binangu bimune.” (Badika 1 Mpiele 3:8.) Bu biatudi muilo wa Yehowa, tui kuikala na binangu bimune na bakuetu balume na bakashi, pa kuambula mushindo aunangushenaa Yehowa wi mu Bible. Bu kileshesho, Yesu baadi munyingishe balongi baye buabadia kutuula Bufumu pa mbalo ya kumpala mu muwa wabo. (Mat. 6:33) Na uno muanda mu binangu, bangi balungudi be kuata kitshibilo kia kubanga mudimo wa nsaa yoso. Pamutue pa kuibabofusha, tuakuleyi mianda i buwa pabitale kepatshila kabo na kuibakuasha.

IKALA MUIYISHE

9-10. Mushindo kinyi ubaadi Yesu muleshe kuiyisha mu mushindo wa kukaanya?

⁹ Mu bufuku bua muladilo wa lufu luaye, Yesu baadi mulongieshe Mpiele na bangi batumibua pabitale muulo wa kuiyisha. Kumpala kua biabia, Yesu baadi mutume Mpiele na Yowano buabadia kulumbuula bintu bua kidibua kia nfudiilo kibaadi Yesu na kia kudia nabo kumpala kua’shi afue. Mu bintu bibabadi na kia kulumbuula, bibaadi abitungu bashinkamishe’shi kui elonga dia mema na kilamba bua’shi bantu abafiki, betumpa ku mikoolo kumpala kua kudia. Kadi, nanyi baadia kuiyisha bua kusuula benaye mikoolo?

¹⁰ Kushi kuikoka, Yesu baadi muleshe kuiyisha kua kukaanya. Batumibua abaadi bakaanye ngofu pa kumona Yesu akitshi mudimo wa ba mpika. Yesu baadi mufuule kilamba kiaye kia panuundu, epombeela sume mu kifuka, eela mema muilonga na aye nkubanga kusuula mikoolo yabo. (Yo. 13:4, 5) Bibaadi biate kapindi bua kusuula mikoolo ya batumibua 12, mpa na ya Yundase, baadi na kia kumupaana. Anka, na kuiyisha koso, Yesu baadi mukite uno oso mudimo. Akupu, na luishinko loso, Yesu baadi muibalungule’shi: “Nubapusha kinenukitshina? Anungitanyina bu ‘Mulongieshi’ na bu ‘Muanana,’ na nnabio muanda nyi biandi. Biabia su ami Muanana na Mulongieshi, nenutumpu ngua, abitungu n’anue namu nuitumpene ku ngua.”​—Yo. 13:12-14.

11. Mushindo kinyi ubaadi Mpiele mulongie bia kuikala muiyishe? (1 Mpiele 5:5) (Tala dingi kifuatulo.)

¹¹ Mpiele baadi mulongiele kuiyisha kui Yesu. Kunyima kua Yesu kuenda muiyilu, Mpiele baadi mupaashe kishetshi kia butandua. (Bik. 1:8, 9; 3:2, 6-8) Kibumbu kia bantu pabakimuene kino kilengieleshi, kibaadi kifunyishe Mpiele. (Bik. 3:11) Anka Mpiele tabaadi mukakie binangu bia bantu kuadi, sunga bibaadi mukudile mbalo ibaadi bantu abakumiina kinemo. Na kuiyisha koso, Mpiele baadi mutumbishe Yehowa na Yesu, pa kuamba’shi: “Nku bukuashi bu’eshina diaye [Yesu] na ku lukumiino luetu muishina diaye kubekashua uno muntu anumono na bukome.” (Bik. 3:12-16) Kishima kibaadi Mpiele mufubishe mu mukanda ubaadi mutumine bena Nkidishitu pabitale kuikala beyishe, akitutentekiesha musango ubaadi Yesu muianye kilamba mu kifuka na kutumpa ngua ya batumibua baye.​—Badika 1 Mpiele 5:5.

12. Mbikunyi biatudia kuikala bu Mpiele na kutungunuka na kulonga bia kuiyisha?

¹² Tui kuambula Mpiele na kutungunuka na kulonga bia kuikala na kuiyisha. Tentekiesha’shi, kuiyisha kua binyibinyi ta nkutale penda bi’atuakula nya. Kishima kifubishe Mpiele bua “kuiyisha” akilesha’shi, kuiyisha nkutale mushindo w’atunangushena pabitutale’tue banabene mpa na bangi.” Atukitshinaa bangi mianda na kalolo muanda tuibafule Yehowa na muilo waye, kushi bua’shi bantu betutumbishe. Atulesha’shi tui na kuiyisha kua binyibinyi su atufubila Yehowa na bakuetu na muloo, sunga bangi bakutua kumona bi’atukitshi.​—Mat. 6:1-4.

IKALA NA “BINANGU BI BUWA”

13. Patuula akipushisha kuikala na “binangu bi buwa.”

¹³ Kuikala na “binangu bi buwa” akupushisha kinyi? (1 Mp. 4:7) Muina Nkidishitu e na binangu bi buwa, akitaa muaye moso bua kuata bitshibilo bi buwa bipushene na abinangushenaa Yehowa. Uno muina Nkidishitu auku’shi, ta kui kintu su nkimune kikile kipuano kiaye na Yehowa muulo. E na nkatshinkatshi pabimutale aye nabene, ashinkamisha’shi tauku mianda yoso. Na aleshaa lukulupilo luaye mui Yehowa, pa kumuteka misango yoso na kuiyisha koso.

14. Ungi musango, mushindo kinyi ubaadi Mpiele mukutue kukulupila Yehowa?

¹⁴ Mu bufuku bua muladilo wa lufu luaye, Yesu baadi mudimushe balongi baye’shi: “Buno bufuku anue boso anukakokola pa muanda wande.” Na kuikulupila koso, Mpiele bamulunguile’shi: “Sunga bangi boso bakokola pa muanda oobe, ami ntakakokola’mi!” Buabua bufuku, Yesu baadi mulungule bamo ba ku balongi baye’shi: “Shalayi bapasukie na nutungunukie na kuteka.” (Mat. 26:31, 33, 41) Su Mpiele baadia kulonda diadia elango, badia kuikala n’eshimba dinyingie dia kukumiina’shi mulongi a Yesu. Anka Mpiele baadi mupele’shi tauku Yesu, kunyima aye nkuinyongola ngofu.​—Mat. 26:69-75.

15. Mushindo kinyi ubaadi Yesu mulame binangu bi buwa bufuku bua muladilo wa lufu luaye?

¹⁵ Yesu baadi nka akulupila Yehowa n’eshimba diaye dioso. Sunga bibaadi mupuidikie, baadi mutekie misuusa na misuusa bufuku bua muladilo wa lufu luaye. Bino bibaadi bimukuashe bua kunying’eshimba bua kukita kikiebe ki’eshimba dia Yehowa. (Mat. 26:39, 42, 44; Yo. 18:4, 5) Kushi mpaka, Mpiele tamuilue bibaadi Yesu mutekie misango i bungi mu bufuku buaye bua nfudiilo.

16. Mushindo kinyi ubaadi Mpiele muleshe binangu bi buwa? (1 Mpiele 4:7)

¹⁶ Muenda mafuku, Mpiele baadi mulongie bia kukulupila mui Yehowa mu luteko. Kunyima kuaye kusanguka, Yesu baadi mushinkamishe Mpiele na bangi batumibua’shi abakapete kikudi kiselele bua’shi balombashe mudimo wa bulungudi. Anka Yesu baadi muibalungule buabadia kuikitengiela ku Yelusalema mpa na pakikafiki kuabadi. (Luk. 24:49; Bik. 1:4, 5) Mpiele baadi mukite kinyi pabaadi atengiela? Mpiele na bangi bena Nkidishitu abaadi “abatungunuka na kuteka.” (Bik. 1:13, 14) Kunyima kua mafuku, mu mukanda waye wa kumpala, Mpiele baadi munyingishe bena Nkidishitu naye buabadia kuikala na binangu bi buwa na kukulupila Yehowa mu luteko. (Badika 1 Mpiele 4:7.) Mpiele balongiele bia kukulupila mui Yehowa, na baadi na mushindo wa kunyingisha bakuabo balume na bakashi.​—Nga. 2:9.

17. Sunga tuekala na ngobesha i naminyi, nkinyi akitungu’shi tutungunukie na kukita? (Tala dingi kifuatulo.)

¹⁷ Bua kuikala na binangu bi buwa, abitungu tuikale atutekie Yehowa misango na misango. Abitungu tutekie Yehowa sunga tuanangushena’shi mbibofule bua kukita mianda kampanda. Bikishekishe nsaa ayitungu’shi tuate bitshibilo bi na muulo, tutekie Yehowa bukunkushi, bakulupile’shi aye nyi auku ki buwa buetu.

18. Mbikunyi biatudia kuambula mushindo wa kunangushena wa Yehowa?

¹⁸ Tui na lutumbu lukata muanda Yehowa muitupangie na ngobesha ya kuambula nyikashi yaye. (Kib. 1:26) Eyendo, ta tui balombene kuambula Yehowa mu mushindo upuidikie. (Yesh. 55:9) Anka bu Mpiele, tui kutungunuka na kuambula mushindo wa kunangushena wa Yehowa. Tui kuibikita pa kuikala beyishe na kuikala na binangu bi buwa.