1925​—Takudi bipua lukama

LUKULUPILO LUABO TALUBAADI LULOMBANE

Mu 1925 balongi ba Bible be bungi abaadi abatengiela’shi nsenga ayikashua Mpaladiso. Buakinyi? Mukuetu mulume Albert Schroeder, baadi mufikie kunyima bu muina Kasaka ka Bakunkushi-Bakulu, baadi mupatuule’shi: “Tui bashinkamishe’shi mu 1925, bedibue muimu boso abende muiyilu, na bantu basha lulamato bu Abalahama na Davide abakebasangula bua kukunkusha nsenga.” Pabaadi mieshi ayende na kukila na lukulupilo luabo talubaadi alulombana, bangi ababangile kubofula.​—Nki. 13:12.

Sunga bibaadi lukulupilo luabo lukutue kulombana, balongi ba Bible be bungi abaadi batungunukie na kulungula mukandu wi buwa na kuata na muulo bushito buabo bua kuikala Tumonyi tua Yehowa. Bu kileshesho, tutaleyi bibabadi bafubishe bisaashi bua kulungula bantu be bungi bia binyibinyi.

ABAADI BEBAKIE BISAASHI

Mu 1924, bantu be bungi abaadi abalondo kisaashi kibabadi abetamina bu WBBR. Mu 1925, balongi ba Bible abaadi bebakie kingi kisaashi kikata pepi na kibundi kia Chicago, mu Illinois. Eshina dia kino kisaashi kipia dibaadi WORD. Ralph Leffler baadi mukuashe mu kuibaka kua kino kisaashi bambile’shi: “Mu mashika e bukopo ku kiolua, bantu be bungi be mu ma mbalo elekeene, abaadi abateemesha kino kisaashi.” Bu kileshesho, kingi kifuko kibaadi mu Alaska mu bilometre bikile pa 5 000 na mbalo ibaadi kisaashi, abaadi balonde emisio a kumpala. Kunyima kuabo kuteemesha, abaadi bafundile baaba abaadi abafubu ku kisaashi bua kuibatumbula bua yawa programe a mu kikudi baadi muibanyingishe.

Kitenta kia Mulami kia 1/12/1925 akipatuula buakinyi bantu mpa na abaadi bashale ma mbalo e kula, abaadi na mushindo wa kulonda kino kisaashi. Akiamba’shi: “WORD nyi kimune kia ku bisaashi bi bukome bia mu États-Unis, nkia 5 000 watts. Bantu boso abaadi abekiteemesha, kubanga kutunduka na kupona nguba kua États-Unis, mu Cuba, mpa na mu ma mbalo e kula mu Alaska. Bantu be bungi bashibaadi babande kupusha bia binyibinyi abaadi bakumiine kulonga, muanda abaadi abateemesha kino kisaashi.”

Nka mu ano mafuku amune, balongi ba Bible abaadi abakumiina kufubisha kisaashi bua kulungula mukandu wi buwa mu Canada. Mu 1924 abaadi bebakie kisaashi kibabaadi abetamina bu CHUC, mu kibundi kia Saskatoon, mu province a Saskatchewan. Nyi kisaashi kia kumpala kibaadi akiakula mianda ya kipuilo mu Canada. Mu 1925 abaadi na lukalo lua mbalo ikata ya kutuula kino kisaashi. Biabia Watch Tower Society baadi muule Regent Building, nshibo ibabadi abakitshina ma teatre mu Saskatoon bua kutuula kino kisaashi.

Ku bukuashi bua kino kisaashi, bantu be bungi abaadi bashale mu tu bibundi tupela tua mu Saskatchewan, abaadi bapushe mukandu wi buwa bua musango wa kumpala. Bu kileshesho, mu kangi ka ka kibundi ke kula, ungi muana mukashi abetamina bu Graham bafundile bua kuteka mikanda kunyima kuaye kuteemesha kisaashi. Mukuetu mulume George Naish amba’shi bibaadi abimueka’shi e na lukalo lukata lua mikanda mu mushindo ubatudi bamutumine Études des Écritures oso mushima. Musango umune, Graham babangile kupalakasha mukandu wa Bufumu mpa na mu ma mbalo e kula ngofu.

MPUSHISHO MUPIA

Mu Kitenta kia Mulami kia 1/3/1925, mubaadi muisambo ubaadi na muulo ukata ubaadi awamba’shi: “Kutandikua kua muilo.” Buakinyi uno muisambo ubaadi na muulo ukata? Balongi ba Bible abaadi abauku’shi Satana e na ndumbuluilo, muanka mui ba demo, bipuilo bia madimi, mbulamatadi ya bana ba bantu, na mianda ya busunga pa nsenga. Anka, ku bukuashi bua uno muisambo “mpika a lulamato na mudimukie,” baadi mukuashe bakuetu be pa nsenga ishima bua kuuka’shi mpa na Yehowa namu e na ndumbuluilo, ndumbuluilo muilekene kula na ndumbuluilo a Satana. (Mat. 24:45) Dingi, mpika baadi mupatuule’shi Bufumu bu’ Efile Mukulu bubabangile kumunana mu 1914, na mu kiakia kipua ‘ngoshi ibatuukile muiyilu’ mu 1914, Satana na ba demo baye abaadi bebabingie muiyilu, na bebasumbula pa nsenga.​—Kbf. 12:7-9.

Bangi balongi ba Bible ta babaadi bakumiine uno mpushisho mupia. Anka uno muisambo ubaadi awakula dingi bino: “Atukunyingisha’shi obe abadikaa Kitenta kia Mulami kadi sha’kumiina uno mpushisho mupia, bodia kukulupila Yehowa na otungunukie na kumufubila na lulamato loso.”

Tom Eyre, baadi bu colporteur (binobino abebetamina bu ba mbala-mashinda) a mu Grande-Bretagne, baadi muakule bibaadi bipushe balongi ba Bible be bungi pabitale uno muisambo: “Bakuetu be bungi abaadi na muloo wi bungi pabitale uno mpushisho mupia a Kibafumbuilue shapitre 12. Kunyima kuatue kutundula’shi abatuulu Bufumu muiyilu, tu baadi na muloo wi bungi wa kulungula bangi mukandu wi buwa. Bibaadi bitutakule bua kunyisha kulungula mukandu wi buwa na kuitukuasha bua kumona’shi Yehowa akakitshi mianda i buwa mu mafuku aafiki.”

KUTUUSHA BU KAMONYI PABITALE YEHOWA

Lelo uno, Tumonyi tua Yehowa atuuku kalolo mayi e mu Yeeshaya 43:10, aamba’shi: “Yehowa amba’shi ‘Tumonyi twande’mi nnaanwe, nwibafubi bande bandi musangule.’” Anka, kumpala kua 1925, tatubaadi atukamba kufubisha kino kifundue mu mikanda yetu. Kadi mianda ibashintulukile. Mu 1925, Kitenta kia Mulami kibaadi kisambile Yeeshaya 43:10 na 12 misango 11!

Ku fundiilo kua mueshi wa Muanda mu 1925, balongi ba Bible abatuelele ku kikongeno mu kibundi kia Indianapolis, mu Indiana. Mu mayi a kuibakukila nao abaadi ku programe, mukuetu Joseph Rutherford bambile’shi: “Tubafiki ku kino kikongeno bua kupeta . . . bukome abufiki kui Muanana, bua’shi tualukie na bukome bua kutusha bukamonyi pabimutale.” Munda mua mafuku Muanda abakitshine kikongeno, abaadi bebanyingishe bua kutuusha bukamonyi pabitale Yehowa nsaa yoso.

Mu dia Mposo 29/8, Mukuetu Rutherford baadi muele muisambo awamba’shi “Tulunguleyi mukandu wi buwa.” Mu uno muisambo, baadi mushimikie kasele pa muulo wa kutuusha bukamonyi, bambile’shi: “Yehowa alungula muilo waye’shi . . . : ‘Tumonyi twande’mi nnaanwe. . . Ami n’Efile Mukulu.’ Akupu baadi muibanyingishe na ano mayi: ‘Tanyayi eshinda bua muilo.’ Muilo umune pa nsenga ulombene kutuusha bukamonyi pabitale Yehowa nyi wawa wakuasha na kikudi kiaye na wikale tumonyi tuaye.”​—Yesh. 43:12; 62:10.

Kunyima kua mukuetu Rutherford kukita muisambo, babadikile mukanda wabetamina bu “Mukandu wa lukulupilo.” Bantu boso abaadi bakumiine uno mukandu ubaadi aubanga’shi nka penda Bufumu bu’Efile Mukulu nyi abuitutuadila “miabi bu butaale, kuiyikeela, mbidi bukome, nshalelo e buwa, bulungantu na muloo wa loso.” Uno mukanda abaadi bewaluule mu ndimi i bungi na abo kuiutusha bu trakte. Abaadi babile masaki afikie ku midiyo 40.

Balongi ba Bible ta babaadi baate eshina dia bu Tumonyi tua Yehowa munda mua bipua bi bungi. Anka, ababangile kupusha’shi bi na muulo bua’shi bekale tumonyi tuaye.

KUALUKIILA MUKUTALA BAABA ABALESHA LUKALO

Bu bibaadi abiende na kufuima bungi bua balongi ba Bible mu nsenga ishima, bakuetu abaadi bebanyingishe bua kualukiila bantu abaadi baleshe lukalo lua kupusha mukandu wi buwa. Kunyima kua kampanye ka kuabila trakte a Mukandu wa lukulupilo, Bulletina bibaadi abibanyingisha’shi: “Alukiilayi nukatale bantu banuikeele balekiele trakte a Mukandu wa lukulupilo.”

Bulletin bia mueshi wa Kumpala 1925 bibaadi na uno rapore a mulongi a Bible a mu kibundi kia Texas: “Tukuete kukaanya pakumona’shi terituare atudi bapue kualukiila misango i bungi, enka bu ki mupia. Mu ka kibundi kapela ke mu terituare eetu, tuibemualukiile misango itano bua kulungula mukandu wi buwa munda mua bipua ekumi bibashala. . . . Binobino, mama na mukuetu mukashi Hendrix mbemualukiile, na abo nkuabila mikanda i bungi [kukila] kumpala.”

Muiumbo dia Panama, ungi mbala-mashinda bafundile’shi: “Bantu be bungi abaadi abambingi kuabo, abaadi abashintula mueneno aabo panadi nebalukiila bua musango wa kabidi sunga wa kasatu. Kino kipua nemuipaane mu kualukiila mu kutala bantu na nkuete kupeta bipeta bi buwa bukile.”

KUTENGIELA MIANDA AYIFIKI KUMPALA

Ku nfudiilo kua 1925, mukuetu Rutherford baadi mufundile ba mbala-mashinda mukanda na alesha bioso biabaadi bakite mu bulungudi kiakia kipua na kiabadia kukita kipua akifiki. Bambile’shi: “Mu kino kioso kipua, nuikeele na kinemo kia kunyingisha boso abekalanga benyongole. Uno mudimo nguinupe muloo wi bungi . . . Kipua ki kumpala akinupa mushindo wa kutuusha bukamonyi pabitale Efile Mukulu na Bufumu buaye, na kulesha patooka’shi ba nnanyi bekale bafubi baye. . . . Atue boso tufubisheyi mayi eetu bua kutumbisha Efile Mukulu eetu na Nfumu eetu.”

Ku nfudiilo kua 1925, bakuetu abaadi abelumbuula bua kutamisha Betele a mu Brooklyn. Kipua kia 1926 kibaadi mbangilo a luibako lukata luatushibaadi babande kukita mu ndumbuluilo eetu.