Buakinyi Tumonyi tua Yehowa t’atukitaa misangeelo y’eumbo?

Tumonyi tua Yehowa atunemekaa mbulamatadi na kunemeka bintu abilesha mpala yabo. Atukumiina’shi bangi mbalombene kukumiina kuitshipa bua kushala balamate eumbo, kutshibila ebendela mpala, na kuyimba loono lu’eumbo.

Anka, Tumonyi tua Yehowa t’atukita ino mianda yoso, muanda atuuku’shi ngikutuene na abilongiesha Bible. Atukumiina’shi bangi banemekie nkumiino yetu, bu bi’atunemekaa bitshibilo biabo.

Mu uno muisambo

• Mayi kinyi a kulonda a mu Bible aebilesha?

• Tui kukita kinyi su mbulamatadi akamika’shi abitungu tukite ino mianda?

• Tumonyi tua Yehowa atukuatshishenaa kisaka kampanda kia politike su?

Mayi kinyi a kulonda a mu Bible aebilesha?

Bino bifundue bibidi abilondo nyi abitukuashaa bua kuuka kia kukita:

• Nka penda Efile Mukulu nyi mulombene lulanguilo luetu. Bible amba’shi: “Nka penda Yehowa Efile Mukulu oobe nyi odia kulanguila, na nkaye bupenka buaye nyi odia kufubila mufubo wa kishila.” (Luka 4:8) Mutshipo wa kushala balamate kuiumbo, kutshibila ebendela mpala, na kuyimba loono lu’eumbo, lui na bishima abilesha’shi abitungu muntu afule eumbo kukila kingi kintu. Biabia Tumonyi tua Yehowa atumonaa’shi bi bubi kukita ino mianda.

  Na dingi, Tumonyi tua Yehowa atumonaa’shi kutshibila ebendela mpala nyi kuidilanguila, kintu kiabadi bapele kui Bible. (1 Bena Kodinda 10:14) Bangi bantu abakimbuula mianda ya kala abamba’shi, mabendela nyi bitunduilo bia bipuilo. Bu kileshesho, Carlton Hayes bafundile’shi: “Bua bantu bafule eumbo ngofu, ebendela nyi kitunduilo kikata kia lukumiino na kintu kikata bua lulanguilo luabo.”a Pabitale bena Nkidishitu ba kumpala, Daniel Mannix amba’shi: “Bena Nkidishitu abaadi abapele . . . Kulambula emperere a [bena Loma] bua binangu biaye; bino mbilombene kuikala bu kupela kutshibila ebendela mpala lelo uno.”b

  Sunga biabidi’shi Tumonyi tua Yehowa t’atutshibilaa ebendela mpala, t’atuidibepuula, kuiditaatshisha, sunga kukita kingi kintu akilesha’shi t’atuidinemeka sunga bingi bintu bi’eumbo.

• Bantu boso be mumune kumpala ku’Efile Mukulu. (Bikitshino 10:34, 35) Bible amba’shi “ku muntu umune, [Efile Mukulu] mmukite miilo yoso ya bantu.” (Bikitshino 17:26) Bua kano kabingilo, Tumonyi tua Yehowa atumonaa’shi, bi bubi kutumbisha kabila kampanda, sunga kumona’shi eumbo kampanda dikile dingi. Atunemekaa bantu boso kushi kutala kabila, sunga mbalo yabadi bashale.​—1 Mpiele 2:17.

Tui kukita kinyi su mbulamatadi akamika’shi abitungu tukite ino mianda?

Tumonyi tua Yehowa t’atutombokielaa mbulamatadi. Atuuku’shi mbulamatadi nyi kipindi kia “mpango y’Efile Mukulu,” baadi mutadiile’shi bekale kuanka. (Bena Loma 13:1-7) Atuuku dingi’shi, abitungu bena Nkidishitu bakookiele bakata ba mbulamatadi.​—Luka 20:25.

Biabia, tui kukita kinyi su bakata ba mbulamatadi bakulungula bua kukita kintu kipele Efile Mukulu? Ingi misango, tui balombene kuteka mbulamatadi buadia kushintuula miiya kampanda.c Kadi su ta be biakuiyishintula, Tumonyi tua Yehowa atusangula bua ‘kukookiela Efile Mukulu bu nfumu pamutue pa kukookiela bantu.’​—Bikitshino 5:29.

Tumonyi tua Yehowa atukuatshishenaa kisaka kampanda kia politike su?

Nya. Tumonyi tua Yehowa t’atutuelakana mu kafutakanyi ka bisamba sunga ka mianda ya politike. P’atupele kuitshipa bua kulamata eumbo, kutshibila ebendela mpala sunga kuyimba loono lu’eumbo, ta pa muanda wa’shi atukiebe’shi bantu balonde nka bietu bi’atuamba. Anka pa muanda tui balamate ku abiamba Bible pabitale ino mianda.