Bible mmulombene kunkuasha pandi muinyongole su?
Lualuulo lua mu Bible
Oolo, muanda bukuashi bukile buwa abufikaa nka kui “Efile Mukulu, asambaa babofule.”—2 Bena-Kodinda 7:6, Biible Bifundwe Biiselele.
Kiabapeyaa bantu benyongole kui Efile Mukulu
Bukome. Efile Mukulu ‘akusaamba’ kushi pa kukatusha lukalakashi loodi nalo nya, anka pa kualuula ku nteko yoobe nsaa y’omutekie bukome bua kumona bia kukila nayo. (Bena-Fidipe 4:13) Ikala mushinkamishe’shi e kuanka bua nkuteemesha, muanda bible amba’shi: “Abamwele musaase, Yehowa ebapusha dingi eebapaasha ku mpombo yaabo yooso.” (Misambo 34:18) Biabia, Efile Mukulu, mmulombene nkupusha nsaa y’omutekie bukuashi sunga nsaa y’oshouku bia kuakula kalolo.—Bena-Loma 8:26, 27.
Bileshesho bibuwa. Mungi mufundi a Bible baadi mutekie bino kui Efile Mukulu: “Dya mmushy’a lupongo, naakwele musaase.” Uno mufundi a misambo baadi mulekie kuinyongola nsaa ibaadi munangushene dingi’shi, Efile Mukulu t’etulaminaa nsungu bua miluisho yetu nya. Anka, balunguile Efile Mukulu bino: “Su olubiila bito bya bantu, Yehowa, nnaanyi a kupanda? Anka obe we sha lusa ngi paabakutshiinyi.”—Misambo 130:1, 3, 4, Biible Bifundwe Biiselele.
Lukulupilo. Kukatusha kuitunyingisha binobino, Efile Mukulu mmulee kukatusha kua mianda yoso ayifuisha kenyongoshi. Nsaa y’akalombasha wawa mulayilo, “bantu taabakatentekyesha mianda ya kala [mpa na kenyongoshi] taayibafwila dimo ku mashimba nya.”—Yeeshaya 65:17.
Lamiina bino: Sunga atushinkamisha’shi Efile Mukulu etukuashaa, atuendaa dingi ku lupitaalo bua kukimba buanga bua kua munganga nsaa yatudi bakalakashue na kenyongoshi. (Maako 2:17) Anka, t’atutakulaa bantu pa bukopo buabadia kutoma buanga kampanda nya; atushinkamisha’shi pabitale kuibukisha, kiakia nkitshibilo kia muntu bupenka.