Bible mmulombeene nkukwasha su wekala na mukumbo ushy’aupwiyaa?

Lwaluulo lwa Bible

Oolo. Efile Mukulu kwete kupasukila bafubi baaye bakwete kukumba. Pabitale mufubi aaye sha kululama, Bible amba shi: ‘Yehowa nabeene akyebe kumukwasha mu lusala lwaye lwa kukumba.’ (Misambo 41:3) Su we na mukumbo ushy’aupwiyaa, ino myanda isatu ngilombeene nkukwasha:

1. Teka bwa kupeta bukome bwa kunyingiila. We mulombeene kupeta “butaale bw’Efile Mukulu butabukile binangu byooso,” bulombeene kutshimbisha kinyongwa kyoobe na nkupa bukome.​—Bena-Fidipe 4:6, 7.

2. Ikala na binangu bibuwa. Bible amba shi: ‘Eshimba ditooka adilama mbidi bukome. Eshimba dinyongole nyi nkwiyipaa kapelakapela nsaa yooso.’ (Nkindji 17:22, Good News Translation) Ikala wele miseku, mwanda kukita bino t’akukyebe penda nkukwasha bwa kuluba nkalakashi yoobe nya, akukyebe nkupa mbidi bukome.

3. Ikala na lukulupilo pabitale mafuku e kumpala. Lukulupilo lwibuwa ndulombeene nkukwasha bwa kwikala na muloo sunga wekala na mikumbo ishy’ayipwiyaa. (Bena-Looma 12:12) Bible atemuka pabitale mafuku aekala “muntu su ngumune a mwiumbo takula dingi shi: ‘Ne na mukumbo.’” (Yeeshaya 33:24) Efile Mukulu akyebe kupasha mikumbo yooso ishi na bwanga, yabashi bobeshe kubuka kwi beena sianse. Bu kileshesho, Bible alesha mushindo awaluka banunu bafikye dingi bakinga shi: “Yawa nguba mbidi yaaye aipete dimo bukome buu ku mafuku a bukinga bwaye.”​—Yoobo 33:25.

Kya kuuka: Sunga abauku bukwashi abwibapa Efile Mukulu, ba Temwe ba Yehowa abakimbaa dingi bukwashi bwa munganga pabitale mikumbo ishy’ayipwiya. (Maako 2:17) Sunga mbyabya, tatunyingishaa bantu pabitale bwanga kampanda nya; atuuku shi muntu ooso e na kya kwata kitshibilo kyaaye’ye nabeene pabitale kukimba bukwashi bwa munganga.