“Nkonko inaadi nayo ibaadi ikile myaluulo inaadi nayo bungi”

BINAADI KALA

Ne mutandikye mu kibundji kya La Ceiba, mu Honduras. ne kamukala ka mu bana batano na mulume penda umune. Naadi penda ami nabene kamaama mu kifuko. Kifuko kyetu kibaadi kishale mbalo i masaku akile, na tubaadi na bulanda bukile. Myanda ibabangile kulwila ngofu kunyima kwa lufu lwa nshetu pabaadi mupete masaku ku mudimo panandi na bipwa pepi na binanka.

Nyin’etu baadi mukite mwaye mooso bwa kwitulama ami na batata bande, anka misango ibungi tabaadi na makuta alombane bwa kungudila bilamba. Apanoko mpeshi, misango ibungi naadi napusha mashika ngofu mwanda ntshinadi na bilamba bya mashika.

Panaadi nakulu, nalongyele ludimi lwa tumama lwa mu Honduras (LESHO), lubaadi lunkwashe bwa kwisamba na bangi bantu bashy’abapushaa. Kadi tabo na batata bande tababaadi abauku ludimi lwa LESHO, na abaadi abobesha penda ndambo ya bishima na bitundwilo byabo’bo banabeene bwa kwisamba naami. Sunga mbyabya, tabo baadi munfule ngofu na baadi ankalwila ku masaku. Penda na ndambo ya bitundwilo bya bishima bibaadi auku, tabo baadi andimusha pabitale myanda ibi bu kutoma nfwanka na bunkolwenkolwe. Pa wawa mwanda, namutumbula bu byandi mukule kushi kutoma bino bintu.

Panaadi nki mukinga, tabo baadi antwala mu kipwilo kya Katolike, anka ntshinaadi napusha kintu su nkimune mwanda takubaadi muntu angalulwila mu ludimi lwa tumama. Bibaadi abinkokyesha, ami nkuleka kwenda ku kipwilo panaadi na bipwa ekumi. Kadi, naadi nka na lukalo lwa kuuka Efile Mukulu kalolo.

Mu 1999, panaadi na bipwa 23, naadi mwipetene na mukashi umune baadi mufikye mu Etats-Unis, mwina kipwilo kya église évangelique. Baadi mundongyeshe Bible na kundongyesha Ludimi lwa tumama lwa mu Amerike (ASL). Naadi musangale ngofu na myanda inandi mulongye mu Bible ami nkwata kitshibilo kya kufika pastere. Akupu, naadi mwende ku Porto Rico bwa kutwela mu kalasa ka malongyesha a Bwina Kidishitu bwa tumama. Panangalukiile ku La Ceiba mu 2002, naadi mukite kipwilo kya bantu bashy’abapushaa ku bukwashi bwa bangi benami bakashi. Umune a ku bano balole, Patricia, baadi mufikye kunyima bu mukashi ande.

Bu binandi pastere a kipwilo kyetu, naadi nakitshi misambo mu ludimi lwa LESHO, naadi nalesha bifwatulo bya miisambo ya mu Bible, na kukita bu alesha bibaadi bikitshikye myanda bwa kukwasha tumama tupushe kalolo. Naadi nende mu kutala tumama twi mu bibundi bi pepi bwa kwitunyingisha na kwibakwasha mu myanda yaabo. Naadi mpa na mwende mu lwendo lwa bu misionere mu Etats-Unis na mu Zambie. Anka bwa kwakula eyendo, ntshinaadi nanguku ngofu pabitale Bible nya. Naadi penda nebalungula myanda ibabadi bandungule na kumpushisha ku bukwashi bwa bifwatulo. Eyendo shi, Nkonko inaadi nayo ibaadi ikile myaluulo inaadi nayo bungi.

Dingi efuku, bakashi babidi ba mu kipwilo kyande ababangile kungipula na kupalakasha madimi. Abambile shi ne na bunkolwenkolwe na shi nadimbaa mukashi ande. Naadi mutshimbe kwishimba ngofu ami nkufita munda. Mafuku apela kunyima kwa byabya, ami na Patricia tubakatukile mu kipwilo.

MUSHINDO UBAADI BIBLE MWALUULE NSHALELO ANDE

Batemwe ba Yehowa abaadi misango ibungi abafiki mu kwitutala ami na Patricia, anka misango ibungi tatubaadi atwibatemesha nya. Kadi, kunyima kwa kukatuka mu kipwilo, Patricia baadi mukumiine kubanga kulonga Bible na mulume na mukashi beyibakishene babaadi Batemwe ba Yehowa​—Thomas na Liccy. Naadi mukeme ngofu kumona shi ta ntumama anka abauku ludimi lwa tumama. Byabya nabangile kulonga pamune na Patricia.

Munda mwa myeshi tubaadi balongye ku bukwashi bwa video ya ASL. Kadi bangi balole betu babidi abaadi bafunde Batemwe ba Yehowa shi mbalondji ba bantu, na tubalekye kulonga Bible. Sunga mbibaadi Thomas mundeshe patooka shi Batemwe ba Yehowa ta mbalondji ba bakata ba bantu, ntshinaadi mukumiine nya.

Kunyima kwa myeshi, pabaadi Patricia mukalakashwe na mukumbo wa binangu, baadi mutekye Efile Mukulu bwashi Batemwe ba Yehowa bafikye dingi ku nshibo. Kunyima kwa kapindji kapeela, mwikungishanyi umune baadi Temwe a Yehowa bafikile mu kutala Patricia, aye nkumwipusha su mmulombeene kulungula Liccy bwashi afikye mu kumutala dingi. Liccy baadi muleshe shi ndole a binyibinyi. Baadi afiki mu kutala Patricia lubingo looso bwa kumunyingisha na kulonga naaye Bible. Anka, naadi na yande mpaka pabitale Batemwe.

Mu 2012, Batemwe ba Yehowa abaadi bakite kampanye kakata bwa kulesha video a Okyebe kuuka bya binyibinyi mu ludimi lwa LESHO. Liccy baadi mwitutwadile etu video. Panatadile uno video, bibaadi binkanyishe ngofu kumona shi myanda ibungi ibatudi batudile lukumino na inaadi nalongyesha, bu kalunga ka kalo, na anyima shy’afwiyaa, tayi mu Bible.

Mu lubingo ubalondele, naadi mwende mu Nshibo ya Bufumu bwa kwisamba na Thomas. Namulungwile shi nakumiine kulongyesha tumama bya binyibinyi bya mu Bible, kadi kushi bu umune a ku Batemwe ba Yehowa. Binangu byande bibaadi bya kukita kyanda kipwilo kya tumama. Thomas baadi muntumbule bwa katshintshi kande na kundesha abyamba Beena-Efeso 4:5, mwabalesha muulo wa buumune bwa kakongye ka beena Kidishitu.

Thomas bampele dingi video a Les Témoins de Jéhovah​—La foi en action, Partie 1: Ils sortent des ténèbres mu ASL. Uno video baadi muleshe bibaadi kisaka kya bantu balongye Bible bwa kupusha bya binyibinyi pabitale myanda ikata itale lukumiino. Panaadi mutale uno video, naadi mupushe bibaadi abipusha bano bantu. Anka bu abo, naadi nakimbi bya binyibinyi. Yawa video baadi munkuminyishe shi Batemwe abalongyeshaa bya binyibinyi mwanda malongyesha aabo ooso aafiki nka mu Bible. Nabangile dingi kulonga Bible, na mu 2014, ami na Patricia tubaadi babatshishibwe bu Batemwe ba Yehowa.

MILOO YANDI MUPETE

Ne mufule kakongye ka Batemwe ba Yehowa mwanda keselele, anka bi Efile Mukulu e selele. Balangwidi be selele mu ngakwilo na mu bikitshino byabo kwi bangi. Be na butaale na abenyingishenaa. Batemwe be na buumune na abalongyesha myanda imune ya binyibinyi ya mu Bible sunga bekala mwiumbo kinyi sunga kwakula ludimi kinyi.

Ne mupete muloo wa kulonga akilongyesha Bible eyendo. Bu kileshesho, ne mulongye shi Yehowa nyi Efile Mukulu Sha Bukume-booso, Nfumu a byooso pa nsenga ishima. Mmufule booso, bashy’abapushaa na abapushaa. Naata kifulo kimpe Efile Mukulu na muulo. Ne mulongye dingi shi nsenga ayikekala mpaladiso ebuwa na atwikala na mwabi wa kupeta muwa wa looso na mbidi bukome. Ndukulupilo kinyi lwandi nalo lwa kumona apakumbana bino byooso!

Ami na Patricia twi bafule kwisamba na bangi bantu bashy’abapushaa bwa kwibalongyesha Bible. Binobino tukwete kulonga Bible na bangi beena kipwilo kyetu kya kala. Anka binobino ntshi na nkonko pabitale kyankumiina kulongyesha, bu panaadi pastere nya. Kadi, na mupete myaluulo ku nkonko yande pa’mi kulonga Bible na Batemwe ba Yehowa.