MA VERSE A MU BIBLE ABADI BAPATUULE
Yeelemiya 29:11—“Nawuku mpango yandi mwinwelele”
“‘Ami nauku binangu byankwete kwinwelela,’ nyi abyamba Yehowa,a ‘binangu bya kufukama, kushi binangu bya makyenga, bwa kwinupa nshalelo ebuwa mu mafuku e kumpala na lukulupilo.’”—Yeelemiya 29:11, Traduction du monde nouveau.
“‘Nawuku mpango yandi mwinwelele,’ ngi abyakula MWANANA; ‘nyi mpango ya mwabi ishii ya malwa: anukapete buuwa na lukulupilo.’”—Yeelemiya 29:11, Biible Bifundwe Biiselele.
Kipatulwilo kya Yeelemiya 29:11
Yehowa Efile Mukulu balayile balangiwidi baye’shi mmwibalamine nshalelo a kufukama mu mafuku e kumpala. Sunga abadi beafunde bwa bantu ba kala, ano mayi akwete nka kulesha bi binangu by’Efile Mukulu. Aye nyi “Efile Mukulu apeyaa bantu lukulupilo.” (Bena-Looma 15:13) Nyi bwakinyi, badi mufundjishe ano mayi mu Bible bwa’shi “tupete lukulupilo” lwa nshalelo ebuwa mu mafuku e kumpala.—Bena-Looma 15:4.
Myanda yabadi besambile mu Yeelemiya 29:11
Ano mayi abadi kipindji kya mukanda ubabadi batumine bena Isaleele mu Babilone, babaabadi bakwete mu Yeelusaleme.b (Yeelemiya 29:1) Efile Mukulu balungwile bano be mu bupika’shi abemushaala munda mwa mafuku ebungi na’shi abemwibaka mashibo, bakune bintu, na bekale na bifuko. (Yeelemiya 29:4-9) Anka, Efile Mukulu badi mukumbashe’shi: “Apakumbana bipwa makumi musamboobidi bya bufumu bwa beena Babilone, neenutentekyesha, dingi neenukumbeesha kulaa kwande pabitale kwaluka kwenu mu ino mbalo [Yeelusaleme].” (Yeelemiya 29:10) Efile Mukulu ebapa lukulupilo lwa’shi t’ebalubu na’shi lukulupilo lwabo lwa kwalukiila kwabo alukalombana.—Yeelemiya 31:16, 17.
Efile Mukulu badi mulame mulayilo waye kwi bena Isalele. Anka bibadi mutemukye, Babilone abadi bamubutule kwi Siruse Mfumu a mu Perse. (Yeeshaya 45:1, 2; Yeelemiya 51:30-32) Kunyima, Siruse bapele bena Yuuda matalwa akwilukiila mu nsenga yabo. Abalukile mu Yeelusaleme kunyima kwa bipwa 70.—2 Myanda 36:20-23; Esela 3:1.
Kulombana kwa mulayilo wi mu Yeelemiya 29:11 akushinkamiisha boso be na lukulupilo mu milayilo y’Efile Mukulu lelo uno. Mu ino milayilo mwi butaale bwa mu nsenga ishima ku bukwashi bwa Bufumu bw’Efile Mukulu ku bukunkushi bwa Yesu Kidishitu.—Misambo 37:10, 11, 29; Yeeshaya 55:11; Mateo 6:10.
Mweneno ebubi pabitale Yeelemiya 29:11
Mweneno ebubi: Efile Mukulu ena “mpango” kampanda bwa muntu oso pa bupenka.
Bya binyibinyi: Efile Mukulu mulekyele bantu matalwa akwisangwila eshinda daybadya kwenda. Mayi aye e mu Yeelemiya 29:11 badi mwialungule bena Isalele mu Babilone boso bwabo, na badi na mpango bwabo mu kibungi bwabadya kwikala na—kufukama mu mafuku e kumpala. (Yeelemiya 29:4) Anka, Efile Mukulu badi mutadile muntu oso bwadya kwisangila su akumina kupeta myabi Yaaye sunga kwiyipela. (Miiya Ikituulwe 30:19, 20; Yeelemiya 29:32) Boso abakumina kukimba Efile Mukulu abebikitshi ku bukwashi bwa kwila nteko kwadi na mashimba abo oso.—Yeelemiya 29:12, 13.
Mweneno ebubi: Efile Mukulu atungunuka na kupa balanguidi baye bupeta bua bintu bia ku mbidi.
Bya binyibinyi: Muaku “kuiyikela” ausanganyibua mu angi ma Bible mu Yeelemiya 29:11 mbewaluluile ku muaku wa mu kina Ebelu apatuula “butaale, mbidi bukome, na kuikala biya.” Muyile biabadi baleshe mu muisambo, Efile Mukulu balayile bena Isalele abaadi mu bupika’shi ebapa butaale na mbidi bukome ta mbupeta bua bintu bia ku mbidi nya. Abadi balombene kutungunuka na kuikala nka bi bantu boso na kualuka mu Yeelusaleme dingi efuku.—Yeelemiya 29:4-10.
Badika Yeelemiya shapitre 29 pamune na mayi e kushi kw’esaki abadi bapatuule na ingi mikanda ayakwila wanka.
b Pabitale Yeelemiya 29:11, ungi mukanda wa The Expositor’s Bible Commentary aulesha’shi: “Bi bukopo kupeta mulayilo wi buwa mu Bifundwe kukila uno, aulesha lusa lwa Yahweh [Yehowa] kwi bano be mu bupika, na kwibapa kabingilo kabadya kwikala babatamishe mashimba abo na kwikala na lukulupilo.”—Volime 7, esaki 360.