Mbadiko
24 Pabamuene Balame’shi kuelela Isalele miabi kubaadi akusankisha* Yehowa, tabaadi dingi muende mu kukimba bitunduilo bia mianda i bubi, anka baadi mutadiishe mpala yaye mu kabaaka. 2 Pabaadi Balame mubuushe meso na amona Isalele mmushale muyile bisamba biaye, kikudi ki’Efile Mukulu kibaadi kimuikile. 3 Aye nkuakula luno lukindi’shi:
“Mayi a Balame muana a Beore,
na mayi a muntu abababuula meso,
4 Mayi a muntu ateemesha eyi di’Efile Mukulu,
mumone kimonua kia Sha Bukome boso,
muiname na meso aaye abuule:
5 Tushibo tobe tua mapema tui buwa, ô Yakobo,
tabernakele yobe, ô Isalele!
6 Mbiate kipindi kila nka bu mabanda,*
nka bu mafuba e ku bukunkula bua muela,
nka bu alowe abadi bakune kui Yehowa,
nka bu mitshi ya sedre i ku bukunkula bua mema.
7 Mema aatungunuka na kutuuka mu mbeketshi yaye ibidi ya misokia,
na mbio* yaye ngikunyibue ku bukunkula bua mema e bungi.
Dingi nfumu aye ekala mukata kukila Agage,
na bufumu buaye abukatumbishibua.
8 Efile Mukulu kuete kumutuusha mu Ejipitu;
kuabadi e nka bu nsengua ya mbo.
Akadi miilo, baba abamukiengiesha,
Akasoso mifufua yabo, na akebabutula na mikietue yaye.
9 Mmubutame, mmulaale nka bu ntambue,
na nka bu ntambue nnanyi e kumubuusha?
Baba abakuelela miabi, mbedibue miabi,
na baba abakuele mulua, mbedibue mulua.”
10 Balake nkufiitshila Balame nsungu. Balake nkukupila bikufi bia kapeesha na nkulungula Balame’shi: “Nekeele mukuitanyine bua kuela beshikuanyi bande milua, anka binobino tuemukite kintu su nkimune nka penda kuibelela miabi ino misusa isatu. 11 Binobino alukiila ku nshibo kobe nka binobino. Nakimbanga nkupa kinemo kikata, anka Yehowa bakukutshishua kiakia kinemo.”
12 Balame nkualula Balake’shi: “Ntangikalanga mulungule mikiendi y’otumine’shi, 13 ‘sunga Balake ampa nshibo yaye iule na kiamo kia arja na ôlo, tankitshi kintu su nkimune mumi nabene* kikutuene na eyi dia Yehowa, biakikala ki buwa sunga ki bubi. Nakula nka penda abindungula Yehowa su’? 14 Binobino tanende kui muilo wande. Fika nkulungule kiabakakitshina muilo oobe kui uno muilo mu mafuku aafiki.”* 15 Biabia aye nkuakula luno lukindi’shi:
“Mayi a Balame muana a Beore,
na mayi a muntu abababuula meso,
16 Mayi a muntu ateemesha eyi di’Efile Mukulu,
na a yawa e na kiukilo kia Sha kuiyilu kula,
mumone kimonua kia Sha bukome boso
pabaadi muiname na meso aaye abuule:
17 Nakamumono, anka ta mbinobino;
Nakamubandila, anka kushi binobino.
Luenyenyi alukatuukila kui Yakobo,
na mukombo wa Bufumu aukebo mu Isalele.
Na akatshokola binyibinyi mpala ya Moabe*
na kabaala ka bana boso ba kafutakanyi.
18 Na Edome akekala kintu kiatshibue,
oolo, Seyire akekala kintu kiatshibue kui beshikuanyi baye,
apekala Isalele alesha eshimba diaye dinyingie.
19 Mui Yakobo amukatuuku yawa akamunana,
na akabutula yawa oso mushale na muwa mu kibundi.”
20 Pabamuene Amaleke, batungunukile na kuakula lukindi luaye’shi:
“Amaleke baadi a kumpala ku miilo,
anka ku nfudiilo akabutuka.”
21 Pabamuene bena Keni, batungunukile na kuakula lukindi luaye’shi:
“Mbalo yobe ya kushala ngilamibue kalolo na kishalelo kiobe nkibakue p’ebue.
22 Anka kui muntu ashiiki Kayine kaalo.
Kubashala mafuku bungi kinyi kumpala kua’shi Asiri akukuate ende nobe?”
23 Na aye nkutungunuka na kuakula lukindi luaye’shi:
“Malua! Nnanyi akashala na muwa apakakitshi Efile Mukulu bino?
24 Maato aakakatukila ku kiese kia Kitime,
na abakakiengiesha Asiri,
na abakakiengiesha Ebere.
Anka aye namu akabutuka.”
25 Akupu Balame nkuibuaa na nkuenda, nkualukiila kuaye. Balake namu nkuenda diaye eshinda.