Ba nsushi
5 Mu diadia efuku Debora na Barake muana a Abinoame babayimbile luno loono:
2 “Muanda wa nyene* ishi yanyibue mu Isalele,
Muanda wa bantu bepaane mu kukumiina kuabo,
Tumbishayi Yehowa!
3 Teemeshayi, anue ba nfumu! Teyi matui, anue bakunkushi!
Nayimbila Yehowa.
Nayimbi ngono* bua kutumbisha Yehowa, Efile Mukulu a Isalele.
4 Yehowa, poboodi mukatukie mu Seyire,
Poboodi mutuukie mu nsenga ya Edome,
Nsenga ibaadi itshinkietshinkie, na mayilu abaadi apongolokie,
Makumbi abaadi apongoole mema paashi.
5 Miengie ibaadi isungulukie* kumpala kua Yehowa,
Mpa na Sinayi baadi musungulukie kumpala kua Yehowa, Efile Mukulu a Isalele.
6 Mu mafuku a Shamagare muana a Anate,
Mu mafuku a Yaele, mu mashinda tamubaadi bantu;
Bena nyendo babaadi abayila mu tushinda tua ku mpese.
7 Mu Isalele tamubaadi* dingi bantu ba mu tu bibundi;
Tababaadi muanka mpa na panaadi muibuee, ami Debora,
Mpa na panaadi muibuee bu nyina bana mu Isalele.
8 Afbaadi basangule b’efile bapia;
Akupu kubaadi ngoshi ku biibi bia kibundi.
Ngabo sunga mukietue, tabibaadi abimueka,
Munkatshi mua bantu 40 000 mu Isalele.
9 Eshimba diande di kui bakata ba basalayi ba Isalele,
Babayile na muilo mu kukumiina kuabo.
Tumbishayi Yehowa!
10 Anue abatambushaa mpunda itookolokie,
Anue bashale pa ma tapi ebuwa,
Na anue abatambuka muishinda,
Nangushenayi pa uno muanda!
11 Mayi a bantu abaabilaa mema abaadi apushikie mu ma mbalo abatapilaa mema;
Kuakua abaadi abalondo bikitshino bia kululama bia Yehowa,
Bikitshino bia kululama bia bantu baye ba mu tu bibundi mu Isalele,
Akupu muilo wa Yehowa nkualaala ku biibi bia kibundi.
12 Buuka, buuka, Debora!
Buuka, buuka, imba loono!
Ebuee, Barake! Nda na bantu bobe bakuatshibue, muana a Abinoame!
13 Akupu baba babaadi bashale babalalele kui ba sha kinemo;
Muilo wa Yehowa ubalalele kuandi bua kuluisha ba sha bukome.
14 Baba be muibanda, mbatuukile mu Efraime;
Bakuete abakulondo, obe Benyamine, munkatshi mua muilo oobe.
Bakata ba basalayi abalalele kukatukila ku Makire,
Na baba abaata* bantu ku busalayi, abafiki ku Zabulone.
15 Ba nfumu ba kisamba kia Isakare, babaadi na Debora,
Nka bu bibaadi Isakare, nyi bibaadi Barake.
Abamutumine lua ngua muibanda.
Kubaadi kuiyela nkonko kukata mu mashimba mua bisaka bia Rubene.
16 Buakinyi we mushale pankatshi pa mifuko ibidi yanyibue ku kishalelo kia mpunda,
Webateemeshanga ku’abayimbi milengie yabo bua bisaka bia nyema?
Muanda kubaadi kuiyela nkonko kukata mu mashimba mua bisaka bia Rubene.
17 Gileade mmushale abua bushiya bua Yordane,
Na Dane, buakinyi mmushale na maato?
Ashere ekeele mushale ku kiese kia kalunga kushi kia kukita,
Na ekeele mushale pepi na ma mbalo aemenaa maato.
18 Bena Zabulone abaadi batuule miuwa* yabo mu masaku pepi na kufua;
Bena Neftali namu abaadi batuule miuwa yabo mu masaku ku miengie.
19 Ba nfumu mbafikie, abo nkulua ngoshi;
Ba nfumu ba Kanaana nkulua ngoshi
Mu Tanake, pepi na mema a Megido.
Tababaadi bapaule kiamo kia arja.
20 Nyenyenyi ngilue ngoshi kukatukila muiyilu;
Ngilue na Sisera kukatukila mu mashinda aayo.
21 Muela wa Kishone nguibalaashe,
Muela wa kala, muela wa Kishone.
Obe anyima* ande, we muashine sha bukome.
22 Mikona ya nfualasa, ngifunte nsenga
Pabaadi nfualasa yaye ilume ayisuuku lubilo lui bukopo.
23 Muikeyilu a Yehowa amba’shi: ‘Mulua kui Meroze,’
‘Olo, mulua kui bantu ba muanka,
Muanda ta mbafikie mu kukuasha Yehowa,
Ta mbafikie mu kukuasha Yehowa na ba sha bukome.’
24 Mukashi muedibue miabi ngofu nyi Yaele
Mukashi a Hebere muina Keni;
Nyi muedibue miabi ngofu ku bana bakashi bashale mu tushibo tua mapema
25 Mmumutekie mema; aye amupa mabeele.
Bamupa mabeele e bushito mu kibakudi ki buwa.
26 Batshile mutshi wi na nsongo w’abashimikaa nao kashibo k’epema n’eyasa diaye,
Mboko yaaye ibalume nkuata kitootua kia ba nsendue.
Na aye nkukookola Sisera, nkumusoosa mutue,
Na aye nkutanya na nkumutubula lupese lua mutue.
27 Bakuluka munkatshi mua ngua yaye; bapono; na bashaala mulaale;
Bakuluka munkatshi mua ngua yaye na bapono;
Mbalo yekeele mukulukile nyi yekeele mupone mutshokolue.
28 Muana mukashi atadila p’edidishi,
Nyinaye na Sisera atadila pa tu miasa tua tukano tua kuididishi,
‘Buakinyi etempu diaye dibayisha bua kufika?
Buakinyi ntambandile kupusha tuleo tua nfualasa ya matempu aaye?’
29 Bana bakashi ba sha binangu bibungi ba ku bana bakashi baye ba kinemo abaadi abamualula;
Olo, aye namu baadi eakuila’shi,
30 ‘Be kuikala abeabishena bintu biabadi bapaule,
Nsonguakashi* umune, ba nsonguakashi* babidi, kui kilobo kioso kia ngoshi,
Kilamba ki na malangi kiabadi bapaule bua Sisera, kilamba ki na malangi kiabadi bapaule
Kilamba kiabadi basole na buanda, kilamba ki na malangi, bilamba bibidi biabadi basole na buanda
Bua nshingo ya bapaudi.’
31 Biabia Yehowa, beshikuanyi bobe boso babutudibue,
Anka baba bakufule bekale nka bu nguba atunduka mu ntumbo yaye.”
Na nsenga ibekeele mu butaale munda mua bipua 40.