Mukanda wa kumpala wa Samuele
9 Kubaadi ungi muntu a mu kisamba kia Benyamine abetanyinaa bu Kishe, muana a Abiele, muana a Zerore, muana a Bekorate, muana a Apia, muina Benyamine baadi na bupeta bui bungi. 2 Baadi na muana mulume abetanyinaa bu Saule, Saule baadi nsongua na baadi buwa bukile, takui muntu su ngumune mu Isalele baadi buwa kumukila, baadi mukile bantu boso bula na babaadi abamufikila nka pa mapampa.
3 Pabaadi mpunda ya Kishe, nshaye na Saule ishimine, Kishe balunguile muan’aye Saule’shi: “Ata namu mufubi umune nuende nukakimbe mpunda.”* 4 Babaadi bakiile mu nsenga ya ku miengie ya Efraime na mu nsenga ya Shalisha, anka tababaadi bapete mpunda. Abo nkukiila mu nsenga ya Shalime, anka mpunda tayibaadi kuakua. Abo nkukiila mu nsenga yoso ya bena Benyamine, anka tababeyipetele.
5 Pababafikile mu nsenga ya Zufe, Saule balunguile mufubi aaye abaadi naye’shi: “Fika tualukie, tala nshami abanga kuikalakasha buetu pamutue pa kuikalakasha bua mpunda.” 6 Mufubi baadi mumualule’shi: “Tala, mu kino kibundi mui muntu a Efile Mukulu, nyi mmuntu abanemekaa ngofu. Mianda yoso y’akula ikuete kukumbana. Fika tuende kuanka. Pangi mmulombene kuitulesha eshinda diatudia kuyila.” 7 Paapa Saule nkualuula mufubi aaye’shi: “Su tubende kuakua, atutuadila yawa muntu kinyi? Tatui na mikate mu ma mpaya eetu; tatui na kia buntu kiatudia nkapa yawa muntu a Efile Mukulu a binyibinyi. Nkinyi kiatudi nakio?” 8 Mufubi nkualuula Saule’shi: “Tala! Ne na kia binanka kia shekele* a kiamo kia arja. Nakekipa muntu a Efile Mukulu a binyibinyi, na aketulungula eshinda diatudia kuyila.” 9 (Kala mu Isalele, muntu baadi ende mu kukimba Efile Mukulu baadi akula’shi: “Fika tuende kui muntu amonaa mianda.” Muanda yawa atuitanyina bu mutemuki lelo uno, kala babaadi abamuitanyina bu muntu amonaa mianda.) 10 Akupu Saule nkulungula mufubi aaye’shi: “Biabia bibuakula bi buwa. Fika tuende.” Biabia abo nkuenda mu kibundi mubaadi muntu a Efile Mukulu a binyibinyi.
11 Pababaadi abakaamina mu kibundi, babafumankene na ba nsonguakashi babaadi abatuuku, abende mu kutapa mema. Abo nkuibepusha’shi: “Muntu amonaa mianda e mu ino mbalo su?” 12 Babaluluile’shi: “E kuanka. Tala, enka kumpala kuenu’ku. Ndayi bukidi, muanda lelo mmufikie mu kibundi, muanda bantu abalambula mulambu lelo pa mbalo i kunundu. 13 Anka nukianutuele mu kibundi, anumupete kumpala kua’shi akaamine ku mbalo i kunundu mu kudia. Bantu ta mbalombene kudia kumpala kua’shi afikie, muanda nnaye elela mulambu muabi. Kunyima ku’aye kuiwelela miabi, baba betaminyibue mbalombene kudia. Biabia kaaminayi bukidibukidi, na anumupete.” 14 Biabia babakaamiine mu kibundi. Pababatuelele mu kibundi, babamuene Samuele afiki mu kufumankana naabo bua kuenda naabo ku mbalo i kunundu.
15 Efuku dimune kumpala kua Saule kufika, Yehowa balunguile Samuele’shi: 16 “Malooba mu ino nsaa, nakakutumina muntu a mu nsenga ya Benyamine. Abitungu omuele muimu bu mukunkushi a muilo wande wa Isalele, na akapaasha muilo wande ku maasa kua bena Filistine. Muanda nemumone dikienga dia muilo wande, na kudila kuabo nkufikie kuandi.” 17 Pabaadi Samuele mumone Saule, Yehowa bamulunguile’shi: “Uno nyi muntu ankulunguile’shi, ‘Naye akunkusha muilo wande.’”
18 Paapa Saule nkuisesela kui Samuele ku kiibi kia kibundi, nkumuipusha’shi: “Ndungule namu, a nshibo ya muntu amonaa mianda i kuikunyi?” 19 Samuele nkualuula Saule’shi: “Muntu amonaa mianda nnami uno. Kila kumpala kuande tukaamine ku mbalo i kunundu, na anukadi nami lelo uno. Ku namashika nakulekie wende, na nakulungula mianda yoso y’okiebe kuuka.* 20 Tuekalakashanga bua mpunda ishimiine takudi mafuku asatu, muanda tabapuile kuiyipeta. Bintu bioso bi buwa bia mu Isalele mbia nnanyi? Ta mbiobe na nshibo ishima ya nshobe su?” 21 Paapa Saule nkualuula’shi: “Ami ntshi muina Benyamine a mu kisamba kikile bupeela kia mu Isalele su? Na kifuko kiande, ta nkifuko kikile bupeela kia mu kisamba kia Benyamine su? Kadi buakinyi bondungula biabia?”
22 Biabia Samuele batshile Saule na mufubi aaye enda nabo mu nshibo ya kudiila, aye nkuibapa mbalo ikile buwa munkatshi mua bantu babaabadi betamine, kubaadi bantu bafikie ku 30. 23 Samuele balunguile muntu baadi ateekie’shi: “Fika na muita wankupeele nakulungula’shi, ‘Eutuule ku lupese.’” 24 Paapa muntu baadi ateekie nkuibuesha kioko na bintu bibaadi panka, aye nkuibituula kumpala kua Saule. Samuele nkulungula Saule’shi: “Babatuulu kumpala kobe bintu biabekalanga balame. Dia, muanda babaadi bakulamine bianka bua nsaa bu ino. Muanda nebalunguile’shi, ‘Ne muitanyine beenyi.’” Biabia Saule badiile na Samuele diadia efuku. 25 Akupu babayikile ku mbalo i kunundu benda mu kibundi, na Samuele batungunukile na kuisamba na Saule kunundu kua nshibo. 26 Bababuukile kumpala kua nsaa, na ku namashika Samuele nkuitamina Saule kunundu kua nshibo, nkumulungula’shi: “Elumbuule bua’shi nkutueshe kuishinda.” Biabia Saule nkuilumbuula, aye na Samuele nkutuuka paasha. 27 Pababadi abalaala dia ku nfudiilo kua kibundi, Samuele balunguile Saule’shi: “Lungula mufubi oobe bua’shi abadiile,” biabia mufubi nkubadiila. “Kadi obe imana, bua’shi nkulungule eyi di’Efile Mukulu.”