Mukanda wa kumpala wa Samuele
22 Biabia, Davide bakatukile kuakua aye nkukafuama mu lubuebue lua Adulame. Pabaadi bakuabo na bantu boso ba mu nshibo ya nshaye bapushe wawa muanda, babayile kuakua kubaadi. 2 Bantu boso babaadi mu lukalakashi, babaadi na mabaasa na babaadi benyongole, babayile kuadi, aye nkufika nfumuabo. Bantu babaadi naye babaadi bafikie ku 400.
3 Kunyima Davide bakatukile paapa, aye nkuenda ku Misepa mu Moabe, alungula nfumu a Moabe’shi: “Tadiila namu nshami na nyinami bashale nobe mpa na panguku biabakankitshina kui Efile Mukulu.” 4 Biabia aye nkuibaleka kui nfumu a Moabe, na babashalele naye munda mua kipungo kioso kibaadi Davide mufuame.
5 Kunyima kua mafuku, mutemuki Gade balunguile Davide’shi: “Toshalanga mu ino mbalo yodi mufuame, alukiila mu nsenga ya Yunda.” Paapa Davide bakatukile aye nkuenda mu mutamba wa Erete.
6 Saule bapushishe’shi mbamone Davide na bantu baye. Yaaya nsaa Saule baadi mushale mu Gibeya muushi mua mutshi wa tamarise ubaadi pa ka muengie, baadi na mulumbu waye muiyasa, na bafubi baye boso babaadi bamuifunyishe. 7 Paapa Saule nkulungula bafubi baye babaadi bamuifunyishe’shi: “Nteemesheyi namu anue bena Benyamine. Muana a Yesee akenupa namu boso mafuba na mafuba a tukuba tua nfinyo su? Akenutuulu namu boso bu ba nfumu ba bantu kinunu, na ba nfumu ba bantu lukama su? 8 Anue boso nui bandiile lukuku, takui muntu su ngumune mundungule’shi muana ande mmukite kilombeno na muana a Yesee! Takui muntu e nami lusa su ngumune. Na takui muntu su ngumune mundungule’shi muana ande mmutakule mufubi ande buadia kuntombokiela na kundiila lukuku bu biabidi lelo uno.”
9 Paapa Doege muina Edome baadi muimane paapa na baadi mukata a bafubi ba Saule baluluile’shi: “Mmuene muana a Yesee p’afikile ku Nobe kui Akimeleke muana a Akitube. 10 Baadi mumuipuishe mianda kui Yehowa aye nkumupa bia kudia, bamupeele mpa na lupete lua ngoshi lua Goliate muina Filistine.” 11 Musango umune, nfumu nkuitanyisha tshite muakuidi Akimeleke muana a Akitube, na ba tshite muakuidi boso ba mu nshibo ya nshaye babaadi ku Nobe. Biabia, boso buabo babafikile kui nfumu.
12 Saule bambile’shi: “Nteemeshe namu muana a Akitube!” Yawa nkumualuula’shi: “Nankuteemesha nfumuami.” 13 Saule nkumulungula’shi: “Buakinyi nuibandiile lukuku, obe na muana a Yesee? We mumupe mikate na lupete lua ngoshi, na we mumuipuishe mianda kui Efile Mukulu, aku namu mmuntombokiele na mmufuame atengiela buadia kunduisha nka bu biabidi lelo uno.” 14 Paapa Akimeleke nkualuula nfumu’shi: “Munkatshi mua bafubi bobe boso kui muntu a kukulupila* kukila Davide su? Aye mmuko a nfumu na mmukata a baba abakulama, na abamunemekaa mu nshibo yobe. 15 Lelo nyi efuku dia kumpala ndiangipuisha Davide mianda kui Efile Mukulu su? Efuku su ndimune ntshi mulombene kukudiila lukuku obe nfumu! Tonyenyekanga ami mufubi oobe sunga nshibo ishima ya nshami kino kilumbu, muanda ami mufubi oobe ntangukanga muanda su ngumune wa ku bino bioso.”
16 Kadi nfumu nkumulungula’shi: “Obe Akimeleke abitungu ofue, obe na nshibo yoso ishima ya nshobe.” 17 Paapa nfumu nkulungula bantu abamulamaa babaadi bamuifunyishe’shi: “Endayi nuipee ba tshite muakuidi ba Yehowa, muanda mbakuatshishene Davide, abaukanga’shi kuete kusuuka kadi ta mbandungule.” Anka bafubi ba nfumu ta mbakumiine koola maasa aabo bua kuipaa ba tshite muakuidi ba Yehowa. 18 Paapa nfumu nkulungula Doege’shi: “Obe enda okayipee ba tshite muakuidi!” Musango umune Doege muina Edome bayile, aye nkuipaa ba tshite muakuidi aye nabene. Mu diadia efuku bayipayile bantu 85 babaadi bafuale bilamba bia efode bia lin. 19 Babutuile’nyi Nobe, kibundi kia ba tshite muakuidi, aye nkuipaa na lupete lua ngoshi, balume, bakashi, bana mpa na bana bakinga, ngombe, mpunda mpa na mikooko.
20 Anka, muana umune a Akimeleke, muana a Akitube abetanyina bu Abiatare bapandile, aye nkusuuka bua kulonda Davide. 21 Abiatare nkulungula Davide’shi: “Saule bayipaa ba tshite muakuidi ba Yehowa.” 22 Paapa Davide nkulungula Abiatare’shi: “Mu diadia efuku pabaadi Doege muina Edome paapa, naukile’shi akalungula Saule. Lufu lua baba bantu boso ba mu nshibo ya nshobe lui pa mapampa ande ami nabene. 23 Shala nami. Totshinanga nya, muanda muntu akimbi muwa oobe akimbi muwa wande; nakukaluila kalolo.”