Mukanda wa kumpala wa Samuele

25 Kunyima kua mafuku, Samuele bafuile; bena Isalele boso babebungile bua kumudila, abo nkumushiika pepi na nshibo yaye mu Rama. Akupu Davide bayile mu kabaaka ka Parane.

2 Binobino, kubaadi ungi muntu mu Maone baadi akitshina mudimo ku Karmele. Yawa muntu baadi na bupeta buibungi bukile, baadi na mikooko 3 000, na mbushi 1 000, na mu aa mafuku baadi akuula buaa bua mikooko yaye ku Karmele. 3 Eshina dia yawa muntu nyi Nabale, na mukashi aaye babaadi abamuitanyina bu Abigaile, mukashi baadi na binangu bibungi na baadi buwa bukile, kadi mulume aaye baadi muina Kalebe, baadi na mianda ibukopo na baadi akitshi mianda ibubi. 4 Davide pabaadi mu kabaaka baadi mupushe nkumo ya’shi Nabale kuete kukuula buaa bua mikooko yaye. 5 Biabia, Davide batumine ba nsongualume ekumi kuadi, aye nkuibalungula’shi: “Ndayi ku Karmele, na p’anufiki kui Nabale, numungipuishe biadi. 6 Akupu numulungule’shi: ‘Okite mafuku ebungi na wekale bi buwa,* nshibo yobe ishima ikale bi buwa, na bintu biobe bioso bikale kalolo. 7 Biabia, ne mupushe’shi okuete kukuula mikooko yobe buaa, pabaatudi na balami ba mikooko yobe, tatui bebakitshine muanda su ngumune wi bubi, na ta mbashimishe kintu su nkimune mafuku oso abaabadi ku Karmele. 8 Ipusha bantu bobe abakulungula. Biabia kuukila namu bantu bande kalolo muanda tui bafikie mu nsaa ya muloo, nakusendeela bua’shi ope namu bafubi bobe na muana oobe Davide kioso kiodi nakio.’”

9 Paapa bantu ba Davide babayile abo nkulungula Nabale ino mianda yoso muishina dia Davide. P’ababapuile kumulungula, 10 Nabale nkualuula bafubi ba Davide’shi: “A Davide namu nnanyi, muana a Yesee nnanyi? Ano mafuku bafubi bebungi bakuete kusuuka ba nfumuabo. 11 Ne kuata mikate yande, mema ande na muita wandi mulumbuule bua bantu abakuula buaa bua mikooko yande, nebipe bantu banshanguku sunga kuabafiki?”

12 Paapa bafubi ba Davide nkualukiila na nkumulungula ano mayi oso. 13 Musango umune Davide nkulungula bantu baye’shi: “Muntu oso aate lupete luaye lua ngoshi!” Biabia abo boso babasomekiele mpete yabo ya ngoshi mu mikaba, Davide namu nkusomeka luaye lupete. Bantu bafikie ku 400 babayile na Davide, kadi bantu 200 babashadile bua kulama mabofo.

14 Mu yaaya nsaa, umune a ku bafubi balunguile Abigaile mukashi a Nabale’shi: “Talanga! Davide batumu bafubi baye kukatukila mu kabaaka buabadia kusema nfumuetu, kadi nfumuetu bebakaa. 15 Aku namu baba bantu bekeele netu kalolo biabia, ta mbetukitshine muanda wibubi, tatui bashimishe kantu su nkamune mafuku oso atuikalanga nabo mu mapia. 16 Bekeele nka bu mudimba wituifunyishe awitukaluila, biabikala bufuku sunga kanya munda mua nsaa yoso yatubaadi atulama mikooko pepi nabo. 17 Binobino, kimba kiodia kukita muanda masaku aafikila nfumuetu na ba mu nshibo yaye yoso ishima, na nfumuetu mmuikale muntu a bisumanga, takui muntu e kuisamba naye.”

18 Paapa Abigaile nkuata bukidibukidi mikate 200, malondo akata abidi a nfinyo, mikooko itano yabadi bapue kulumbuula, bipimo bitano bia sea* bia ntete ikangie, tu mikate 100 tua tukuba tua nfinyo tuume, na tu mikate 200 tukitshibue na tumuma tua nfigiye tuume, aye nkutenteka bino bintu bioso ku mpunda. 19 Akupu aye nkulungula bafubi baye’shi: “Badilayi; nenulondo.” Kadi ta mmulungule mulume aaye Nabale muanda su ngumune.

20 Pabaadi mukaamine ku mpunda ende na kualaala muengie ngumushikiile, baadi mufumankane musango umune na Davide na bantu baye abafiki batadiile kuadi. 21 Paapa Davide baadi akula’shi: “Ne mulame mu bisumanga bintu bioso bia uno muntu mu kabaaka, takui kintu su nkimune kiekele mushimishe, kadi binobino bangaluisha bubi ku buwa. 22 Su naleka muana mulume* su ngumune na muwa mu nshibo ya Nabale, Efile Mukulu anyokie ngofu beshikuanyi ba Davide.”*

23 Pabaadi Abigaile mumone Davide, bayikile bukidibukidi ku mpunda, nkuinama kumpala kua Davide na nkuiyela mpala paashi. 24 Aye nkupona ku ngua yaye na nkuakula’shi: “Nfumuami, kilema kikale kuandi, tadiila namu mufubi oobe esambe nobe na oteemeshe mayi a mufubi oobe mukashi. 25 Obe nfumuami, totuulanga namu binangu kui uno muntu a bisumanga Nabale, muanda nka bu abilesha eshina diaye dia bu Nabale,* te na binangu. Kadi ami mufubi oobe mukashi nfumuami, ntshikeele mumone bantu buekele mutume. 26 Binobino nfumuami, bu bikale binyibinyi Yehowa na muwa, na biodi obe na muwa, Yehowa nyi bakukanda bua’shi tuekalanga muibaasa dia mase, na tueobuelanga obe nabene. Beshikuanyi bobe obe nfumuami na baba boso abakimbi kukukitshina bibubi, bekale nka bu Nabale. 27 Binobino nfumuami, kumiina namu kino kia buntu kibakutuadila mufubi oobe mukashi, wekipe bantu bobe abakulondo nfumuami. 28 Fuila namu mufubi oobe mukashi lusa nfumuami, Yehowa akakitshi bia’shi bekulu bobe bakunkushe bu ba nfumu munda mua mafuku ebungi, muanda obe nfumuami okuete kulua ngoshi ya Yehowa, na tue mukite muanda wibubi su ngumune munda mua mafuku oobe oso. 29 Su muntu kampanda ebuaa, akulonda bua kukuipaa, Yehowa Efile Mukulu oobe akakukaluila, alame muwa oobe nka bu muiwanye mu kibuta kia muwa ki kuadi. Kadi miuwa ya beshikuanyi bobe akeyisumbula nka bu mabue abasumbula na ndundo a tonyi. 30 Nsaa y’abakukitshina obe nfumuami mianda yoso ibuwa yabadi bakulee kui Yehowa na p’akutuulu bu mukunkushi a Isalele, 31 t’okekala na muanda aukukalakasha muishimba diobe sunga kuinyongola muanda wa’shi bodi mupongoole mase kushi muanda, na muanda wa’shi bodi muiobuele obe nabene. Nsaa ayikakitshina Yehowa nfumuami ino mianda ibuwa, ontentekieshe namu ami mufubi oobe mukashi.”

32 Paapa Davide nkulungula Abigaile’shi: “Yehowa Efile Mukulu a Isalele atumbishibue, aye bakutumu lelo uno bua kufumankana nami! 33 Efile Mukulu akuelele miabi bua binangu biobe bi buwa, muanda lelo uno bonkutshisha bua’shi ntshikalanga muibaasa dia mase sunga kuiobuela ami nabene. 34 Bisumanga, bu bikale binyibinyi Yehowa Efile Mukulu a Isalele na muwa, aye bankanda bua kukukitshina bibubi, su tue mufikie bukidibukidi mu kufumankana nami, maloba ku namashika, takubadia kushala muana mulume su ngumune na muwa mu nshibo ya Nabale.” 35 Biabia Davide nkukumiina bintu bibaadi Abigaile mumutuadile na nkumulungula’shi: “Alukiila kobe mu butaale. Tala, nateemesha mayi oobe na nakalombasha biabia bibontekie.”

36 Paapa Abigaile nkualukiila kui Nabale, bamupetele mu nshibo yaye akitshi musangelo nka bu nfumu, Nabale baadi na muloo na baadi mukolue ngofu. Abigaile tabamulunguile muanda su ngumune mpa na pabaabutookiele ku namashika. 37 Ku namashika, pabaadi malofu atandukie Nabale, mukashi aaye Abigaile bamulunguile ino mianda. Eshimba diaye nkufika nka bu dia muntu mufue, aye nkushala muume nka bu ebue. 38 Akupu, kunyima kua mafuku afikie ku ekumi, Yehowa bayipayile Nabale.

39 Pabapushile Davide’shi Nabale baafu, bambile’shi: “Yehowa atumbishibue aye batshibi kilumbu kiande ku bibaadi Nabale munkee, na kunkanda ami mufubi aaye bua’shi ntshikitanga muanda wibubi su ngumune, Yehowa baaluisha Nabale mianda yaye ibubi.” Kunyima, Davide batumine bantu buabadia kulungula Abigaile’shi akimbi kumuibakila. 40 Paapa bafubi ba Davide nkuenda kui Abigaile ku Karmele, na nkumulungula’shi: “Davide betutumu bua’shi tukuate wekale bu mukashi aaye.” 41 Abigaile nkuibua musango umune nkuinama mpala paashi na nkuakula’shi: “Nakumiina kuikala bu mufubi bua kusuula ngua ya bafubi ba nfumuami.” 42 Paapa Abigaile nkuibuaa bukidibukidi nkukaamina ku mpunda aaye, bafubi baye bakashi batano babaadi abamulondo kumongo kuaye, abo nkushindikila bantu babaadi Davide mutume, na Abigaile nkufika bu mukashi aaye.

43 Davide baadi dingi muibakile Akinoame a ku Izreele, na abo nkufika boso babidi bakashi baye.

44 Kadi Saule baadi mupue kuata muana aaye mukashi Mikale baadi bu mukashi a Davide, aye nkumupa Paleti muana a Laishe a mu Galime.