Wa kabidi wa Samuele

18 Akupu Davide nkubadika bantu babaadi nabo, na nkutuula ba nfumu ba bantu kinunu na ba nfumu ba bantu lukama. 2 Davide batumine bantu babaadi nabo mu bisaka bisatu, kisaka kia kumpala ku bukunkushi bua Yoabe, kisaka kia kabidi ku bukunkushi bua Abishai mukuabo na Yoabe muana a Seruya, na kisaka kia kasatu ku bukunkushi bua Itayi muina Gate. Akupu nfumu bebalunguile’shi: “Ami namu nende nenu.” 3 Kadi babamulunguile’shi: “Tue mulombene kuenda netu, muanda su tubasuuku, tabebimono bu kintu, na su kia bibidi kia bantu ba kuatudi bafua, tabebimono bu muanda nya, muanda obe we mukile bantu 10 000 ba kuatudi. Biabia mbikile buwa bua’shi oshale mu kibundi, wekale wetutumina bukuashi.” 4 Paapa nfumu nkuibalungula’shi: “Bioso abimueneka buwa ku meso kuenu nebikitshi.” Biabia nfumu baadi muimane ku bukunkula bua kiibi kia kibundi, pabaadi bantu boso abatuuku mu bisaka bia bantu lukama na mu bisaka bia bantu kinunu. 5 Biabia, nfumu baadi mutumine Yoabe, Abishai na Itayi dino eyi’shi: “Tanukitshinanga muana ande Absalome bibubi pa muanda wande.” Bantu boso babapushishe pabaadi Davide atumina ba nfumu ba bisaka eyi pabitale Absalome.

6 Bantu ba Davide nkuenda mu kisuku bua kulua na bena Isalele, na bababangile kulua ngoshi mu mutamba wa Efraime. 7 Babatshokuele bena Isalele kui bantu ba Davide, na mu diadia efuku babayipayile bantu be bungi bukile—bantu 20 000 bishima. 8 Ngoshi ibapalakene mu kiakia kipindi kioso. Dingi, mutamba ubadiile bantu kukila bantu babafuile ku lupete lua ngoshi mu diadia efuku.

9 Nfudiilo a bioso, Absalome bafumankene na bafubi ba Davide mpala kua mpala. Absalome baadi mukaamine ku mpunda, na mpunda nkukidila muushi mua ntabi ipindakane ya mutshi ukata, mutue wa Absalome nkupatama munkatshi mua wawa mutshi ukata, mpunda nkutungunuka na kuenda, aye nkushala muembeele mu lupunga.* 10 Ungi muntu bamumuene, aye nkulungula Yoabe’shi: “Talanga, namono Absalome mmuembeele mu mutshi ukata.” 11 Yoabe nkulungula yawa muntu’shi: “Su omumonanga, buakinyi tue mumuipee musango umune? Paapa nadia kukupa na muloo oso makuta ekumi a kiamo kia arja na mukaba.” 12 Kadi yawa muntu nkulungula Yoabe’shi: “Sunga biekala’shi bodia kumpa makuta a arja 1 000, ntshinadia koola eyasa diande kui muana a nfumu nya, muanda tupushishe nsaa inutumiine nfumu eyi, obe, Abishai na Itayi’shi: ‘Nukaluile muana ande Absalome.’ 13 Su naadia kukutua kukookiela namuipaa, uno muanda taubadia kukutua kuukibua kui nfumu, na obe tobodia kunkaluila.” 14 Paapa Yoabe nkuakula’shi: “Ntshi na dingi nsaa yandia kukisha nobe!” Akupu baatshile mikietue isatu muiyasa diaye, nkuiyikinkila Absalome mu kiadi,* aku namu Absalome baadi ki na muwa munkatshi mua ntabi ya mutshi ukata. 15 Akupu, bafubi ekumi babaadi abasemuna bina ngoshi bia Yoabe, babafikile abo nkukupila Absalome mpa na pabafuile. 16 Yoabe belele mpungi, aye nkulungula bantu bua kuimika ngoshi, abo nkualukiila, na nkuleka kuibingena na Isalele. 17 Babatshile Absalome, abo nkumusumbula mu mutamba mu buina bukata, na nkumupuuta mutuuto wa mabue ukile bukata. Bena Isalele boso babasuukile, abo nkualuka ku mashibo kuabo.

18 Binyi biabia, pabaadi Absalome ki na muwa, baadi muikitshine aye nabene musungo muibanda dia nfumu, muanda bambile’shi: “Tshi na muana mulume a kutungunusha eshina diande.” Biabia baudikile wawa musungo eshina diaye, na abewitanyinaa bu musungo wa Absalome mpa na lelo uno.

19 Paapa Akimase muana a Zadoke bambile’shi: “Ndekie namu nyende lubilo, nkalungule nfumu uno mukandu, muanda Yehowa bamukitshina mianda na kululama, p’aye kumupoososha kui beshikuanyi baye.” 20 Kadi Yoabe nkumulungula’shi: “T’otuala uno mukandu lelo nya, omutuadila mukandu dingi efuku, kushii lelo, muanda mmuana a nfumu bafu.” 21 Akupu Yoabe balunguile ungi muina Kushe’shi: “Enda, okalungule nfumu biabia bibomono.” Paapa yawa muina Kushe nkuinama kumpala kua Yoabe, na nkubanga lubilo. 22 Akimase muana a Zadoke nkulungula dingi Yoabe’shi: “Sunga kuakitshika muanda kinyi, ntadiile namu nsuukie ndonde muina Kushe.” Kadi Yoabe bamulunguile’shi: “Buakinyi okimbi nka kuenda muana ande, aku namu takui mukandu odia kukakula?” 23 Kadi bambile’shi: “Sunga kuakitshika kinyi, ntadiile nka nyende.” Biabia Yoabe bamulunguile’shi: “Enda!” Paapa Akimase bayile lubilo muishinda dia distrike dia Yordane, na nfudiilo a bioso aye nkukila muina Kushe.

24 Penyi paapa, Davide baadi mushale pankatshi pa biibi bibidi bia kibundi, mulami a kibundi bakaamine kunundu kua kiibi kibaadi pepi na ku kimano. Bebuesheshe meso aye nkumona muntu e bupenka asuuku lubilo. 25 Biabia mulami a kibundi belele musaase, aye nkulungula nfumu. Nfumu nkumualula’shi: “Su e bupenka, e na mukandu wa kuakula.” Pabaadi yawa muntu anyisha kuiseesela pepi, 26 mulami a kibundi bamuene ungi muntu afiki lubilo. Yawa mulami a kibundi nkulungula muntu baadi alama ku kiibi’shi: “Talanga, kui ungi muntu kuete kufika lubilo bupenka!” Paapa nfumu nkuakula’shi: “Yawa namu’nyi, afiki na mukandu.” 27 Mulami a kibundi bakuile’shi: “Namono’shi muntu a kumpala asuuku nka bu Akimase muana a Zadoke,” biabia nfumu nkuakula’shi: “Mmuntu e buwa, na afiki na mukandu wibuwa.” 28 Pabafikile Akimase, belele nfumu musaase, nkumulugula’shi: “Mianda yoso ayende kalolo!” Paapa aye nkuinama kumpala kua nfumu, na nkukupila mpala paashi. Akupu nkuakula’shi: “Yehowa Efile Mukulu oobe atumbishibue, aye batuulu mu maasa mobe bantu abatombokielanga muanana nfumuami!”

29 Anka nfumu bamuipuishe’shi: “Muana ande Absalome e biiya su?” Akimase bamulunguile’shi: “Petutumanga Yoabe na mufubi oobe bua kufika kodi, mmonanga’shi kui kafutakanyi ke bukopo, anka ntanguku’shi mbuakinyi.” 30 Biabia nfumu bamulunguile’shi: “Eseesele ku lupese, oyimane paapa.” Biabia Akimase beseesele ku lupese, aye nkuimana paapa.

31 Akupu, muina Kushe bafikile, aye nkuakula’shi: “Muanana nfumuami akumiine namu uno mukandu: Lelo uno Yehowa bakukitshina mianda na kululama p’aye kukupoososha ku maasa kua baba boso babaadi bakutombokiele.” 32 Kadi nfumu nkuipusha muina Kushe’shi: “Muana ande Absalome e biiya su?” Muina Kushe nkumualula’shi: “Beshikuanyi boso ba muanana nfumuami, na baba boso bakutombokiele abakiebe kukukitshina bibubi, bekale’nka bu yawa nsongualume!”

33 Uno muanda ubaadi ukalakashe nfumu ngofu, aye nkukaamina mu kadimbo ka kunundu, kabaadi kunundu kua kiibi kia lupata na aye nkubanga kudila, baadi ende na kuakula’shi: “Muana ande Absalome, muana ande, muana ande Absalome! Su nadia kuikala sunga mufue pa mbalo yobe, muana ande Absalome, muana ande baboo!”